الموضوع: حكايتي مع النيو اكسنت وغبور-ما حدث وماأتخذته من اجراءآت وما سوف اتخذه

المشاركة الأصلية كتبت بواسطة mmffor

مع احترامي للهيونداي كعربيه بس اللي عايز يشتري انا رأيي يشتري خليجي! حيوفر اقل حاجه 5 الاف جنيه و كماليات اكتر, جودة تصنيع افضل, عوامل امان افضل و اهو كدا واللا كدا التوكيل ولا حيضمن ولا حيصون. مش حينوب اللي بيجيب التوكيل الا الاهانه و العطله و الانتظار في طوابير و الحمدلله مليون مركز صيانه بيفهم في الهيونداي و الشيفروليه و مليون محل بيبيع قطع الغيار بكل انواعها! و اوعى حد يفتكر ان الصيانات ببلاش في غبور ! دا حتى الصيانه بتاعة الالف بتعدي ال500 جنيه علشان غيار زيت و تقريط على العفشه و اهوا زي ما كلنا شايفين لو في عيب بيبهدلوك!

معلش انا ليا تعليق بس ع الموضوع بتاع صيانة الالف بتعدي ال 500 جنيه ده
معلش حضرتك الكلام ده حصل فين ومع مين؟

انا معايا هيونداي ونيو اكسنت وعملت صيانة الالف بمبلغ 200 وشوية يعني لم يتعدي ال 300 جنيه وده تمن الزيت والفلتر (زيت 10 الاف على فكرة) ومفيش اي مصنعية اتحسبت عليا خالص لإنها المفروض انها صيانة مجانية.
وصيانة ال 5000 عملتها عندهم برده والمفروض ان تمنها حوالي 145 قبل الخصم و انا كلفتني 130 بعد الخصم بتاع الاستيكر وده تمن المصنعية ومفيش قطع غيار اتحملتها انا خالص والكاسيت كان بيعلق وغيرهولي على حسابهم في الضمان (رغم ان العيب طلع من ان السي دي اللي كنت بستخدمه كان بايظ ومتجرح على فكرة).
انا مش بدافع عن التوكيل بكلام محصلش (دي شهادة اتحاسب عليها) لكن انا فعلا لحد دلوقتي مشوفتش منهم حاجة وحشة وروحت تاني من غير صيانة وكان عندي حدفة وصفارة في الملفات والفرامل والكاسيت رجع يعلق تاني وغيرهولي تاني على حسابهم برده ومن غير مادفع ولا مليم ومعاملة في منتهي الاحترام والذوق ووالله الكلام ده حصل معايا فعلا وربنا شاهد وفعلا اتمني انهم يفضلوا كويسين كدة وميحلصش بيني وبينهم اي مشاكل.

انا متعاطفة مع ابو مارو واتمني ان مشكلته تتحل ويقدر الجهاز ينفذله اللي هو عايزه ويرجعلة العربية وكل انسان ليه حق يقدر يسترده بإذن الله.
بس ياجماعة من ساعة مالموضوع ده اتعمل والناس كلها بتقول ابعد عن الاكسنت دي عربية زبالة وابعد عن غبور ده توكيل زي الزفت.
رغم ان في هنا ملاك كتير للاكسنت ولهيونداي عموما قالوا ان عربياتهم كويسة وان التوكيل بيتعامل معاهم كويس (ومنها مشاركات في الموضوع ده على فكرة) وانا واحدة من ملاك الاكسنت وبقول ان العربية الحمد لله كويسة معايا (رغم ان ببهدلها وبمشي بيها في شوارع منيلة وبستخدمها استخدام يومي وكل مشاويري بيها) لكن مهياش مزبلة اوي زي مالناس كلها هنا متصورة يعني وشايفة ان التوكيل معقول هو مش ممتاز يعني لكنه معقول وبالنسبة لتوكيلات تانية هو افضل بكتير على فكرة.
على فكرة انا عمري ماكنت بدافع عن عربية معينة عشان لمجرد اني من ملاكها وبدافع دفاع اعمي وخلاص بس لما الاقي الناس نازلة شتيمة في عربية انا بستعملها وبيقولوا عيوب كتير منها مش موجود (على الاقل في عربيتي مع اني مش واخدها بواسطة او توصية، يعني معملوهاليش مخصوص دي كانت في معرض وموزع معتمد ليهم مش منهم مباشرة كمان) يبقي لازم اتكلم عشان ابين ان دي مش حالة عامة.
حالة ابو مارو وغيره من اللي اشتكوا ممكن تكون حالات خاصة (واللي يحكم فيها لجان مختصة ومهندسين سيارات) وكل توكيل وليه عيوبه ولو جيت سألت اي حد عن توكيل عربيته حتى تويوتا حتى نيسان حتى بروتون حتى دايهاتسو حتى رينو نفسه هاتلاقي فيه مشاكل وتلاقي ناس كتير بتشتكي برده وادخلوا باقي الاقسام وشوفوا اراء الناس ايه.

فبلاش نعمم ونقول كلام كتير منه مش حقيقي

كلنا عرفين ان اسعار الصيانات في كل التوكيلات في مصر غالية وياريت حضراتكم تتابعوا اسعار صيانات الماركات الاخري وقطع غيارها ولو طلعت ارخص من هيونداي قولولي على الاقل اغير عربيتي واجيب عربية صيانتها ارخص وقطع غيارها ارخص وابقي وفرت لنفسي مبلغ كويس.

اردجوك متزعلش مني ياابو مارو انا عارفة ان حضرتك رغم انك بتعاني من مشكلة عربيتك لكن حاولت تكون محايد ومعيبتش في كل العربيات الاكسنت او هيونداي (بدليل ان حضرتك كان معاك هيونداي قبلها برده ولحد دلوقتي بتشيد بيها وبكفائتها) وانا بدعيلك ان ربنا يقويك ولو ليك حق تقدر تسترده وربنا يكرمك وتستبدل عربيتك بواحدة جديدة بس اعتقد ان لو ده حصل حضرتك هاتبيعها وتجيب ماركة تانية (لأن حضرتك اكيد اتعقدت من هيونداي كلها بعد اللي حصلك ده) وان شاء الله ربنا يكرمك بعربية افضل من هيونداي تريحك من كل المشاكل اللي واجهتها دي وبجد ربنا معاك.
احنا مشكلتنا فعلا اننا بنعمم كل حاجة
يعني واحد حصلتله مشكلة معينة في عربيته يقولك العربيات اللي من النوع ده كلها زبالة
واحد حصللته حادثة بسبب بنت يقولك البنات كلها مبتعرفش تسوق
واحد حصلتله مشكلة في منطقة معينة يقولك المنطقة دي كلها ناسها اخلاقهم زبالة
واحد حصلتله مشكلة في بلد معينة يقولك البلد دي كلها معفنة
معلش ياجماعة ياريت نحاول نكون موضوعيين اكتر من كدة ونقدر ان في حالات فردية مينفعش تتعمم ونشوف ابعاد اخري للموضوع ممكن تكون غايبة عننا ومنبقاش عنصريين في كل تصرفاتنا كدة.
وياريت محدش يزعل مني