الموضوع: حكايتي مع النيو اكسنت وغبور-ما حدث وماأتخذته من اجراءآت وما سوف اتخذه

المشاركة الأصلية كتبت بواسطة slim_shika

بدأت أحس إن التوكيل بيعند وخلاص, مش شايف أي صعوبة في تغير العربية ولا حتى يرضوا الفلوس مع تعويض كمان, يعني هو غبور يا حرام فقير مثلا؟؟

انا ليل نهار بسأل نفسي السؤال ده ف التوكيل عارفين اكتر مني الحق فين و عارفين حقي ايه ليه بقى الظلم و الافترى انا مش عارف
يمكن عشان ميفتحوش على نفسهم باب جهنم زي ما ناس بتقول يمكن الله اعلم

المشاركة الأصلية كتبت بواسطة mmffor

ثانيا وجهة نظر العميل:
انا راجل كنت راكب مستعمل عربيه بقالها معايا 10 سنين و الحمدلله مريحاني بس قدمت خلاص شكلها بقى مش ولا بد و اعطالها كترت عن الاول و مبقيتش مناسبه للاسرة او لاي سبب و حبيت اغير العربيه و لكن لاني شخص واعي و مدرك عارف ان العربية الجديده على الاقل زي ما الدنيا كلها ما عارفه عمرها ما حتفتح بقها في اول سنتين و يبقى انا وفرت وقتي و فلوسي و عطلتي و بهدلتي! رحت فاضلت و قارنت و استلفت و حوشت و عملت جمعيات او اخدت قروض بفوائد و سألت و قررت اني اجيب العربيه دي و رحت دفعت و خلصت و خدت العربيه من المعرض و فرحان ان العربيه بشوكها و كيسها و متوقع 100% ان العربيه زي ما سعرها اغلى 100% من العربيه اللي كانت عندي اكيد اداءها حيبقى على الاقل 50% افضل اجي اروح بالعربيه الاقي غياراتها تقيله!! و الاقيها بتكركر ولا اجدع حشاش و السحب بتاعها ولا ال 128 اللي كانت عند والدي من 30 سنه! تاني يوم اتصل بالمعرض يقوللي اسفين العربيه ضمان وكيل فعليك و على التوكيل ! اتصل بالتوكيل يقولولي يا افندم دي حاجه طبيعيه العربيه جديده و بعد متليين شويه كله حيبقى تمام و ممكن تجيلنا عند صيانة الالف و حنقرط على العفشة و الفرشه و كله يبقى تمام! الاقي العربيه مش مريحاني خالص و الاداء 50% اقل من السياره القديمة اللي شغاله بقالها 10سنين و بتكنولوجيا بقالها 10 سنين!!!!! اروح بعد اسبوع او 10 ايام لاني كملت الالف اخيرا و مش قادر استنى ان اشوف ايه المشكله بالضبط! الاقي العربيه باشا اللي مكملتش اسبوع جابت اسطوانه!!!! ياللي العربيه القديمه بتعملها كل 60 الف كيلو على الاقل مع الهلك!

الله ينور عليك انت كنت معايا و لا ايه

المشاركة الأصلية كتبت بواسطة smax

رأي ان مبداء خدمة او احترام العميل اساسا مش موجود في مصر او لسة لم تطبق بالصورة المطلوبة و دية مش مشكلة غبور بس دية مشكلة كل حاجة في مصر و راي ان دة علشان القوانين الي بتحمي المستهلك لسة جديدة علينا و لم تصبح بعد بالقوة و لا السهولة و لا السرعة المطلوبة ( الدليل ان الاخ صاحب الموضوع طالع عينة و لسة مأخذش حقة ) و دة الي خلي كلام التاجر او الموظف "اخبط رأسك في الحيط" او " اعلي ما في خيلك اركبة" لانة عارف انك هتكبر دماغك من المشاكل و لاو فعلا ركبت اعلي ما في خيلك مش هتوصل لحاجة و ان وصلت لحقك هو مش هيضر الضرر المخيف.
تحيا لصاحب الموضوع و اتمني انة يأخذ كامل حقة علشان لاو كلنا عملنا زية اكيد هيكون في نتيجة جيدة في احترام المستهلك.

+111111111
بس انا عايز اقول حاجه انا لما عرفت ان العربيه بايظه وفيها دبرياج و انا واقف مع المهندس وجدي ف الاستقبال رديت وقلتله يبقى تاخدوها انا شاري زيرو دي مش عربيتي يعني كنت عايز عربيه زيرو وبس
نفس الكلام قلته للمهندس ياسر رغم انكاره عليا الحق ده
وكررته برده للمهندس عاطف و رغم عرضه ليا بعمل خصومات او صيانات رديت ببساطه وقلتله طالما مش حقي مش عايزه و لما قالي مفيش قانون حماية المستهلك على العربيات و اتأكد بنفسك من قراية الضمان قولتله برده مش هاخد حاجه مش من حقي

او لما روحت اسأل على حقي فجهاز حماية المستهلك مكنتش عايز اعمل ثورة و لا عايز الناس تقول ده برافو عليه متمسك بحقه لا ابدا - لاني شايف انه شييء عادي جدا
حاجه بديهيه اشتريت عربيه زيرو عايزها تطلع زيرو غير كده انا مفهمش

ويمكن ده السبب اللي مخليني مستحيل اسوق العربيه دي لانها مش العربيه اللي روحت اشتريها باكياسها
ويمكن كمان فيه سبب تاني مركبتش عشانه العربيه اني بصراحه بتعذب يوميا ف الموصلات و كمان عندي اسره من 4 افراد بنتبهدل عشان نروح مشوار فتقريبا بدرب نفسي بعذابي اليومي على كره الناس اللي قابله عليا كده عشان اخرة اللي بيحصلي ده اني اكون عندي من الدوافع و المقدره اني اخد حقي بايدي و و الله ما بهزر

المشاركة الأصلية كتبت بواسطة mmffor

بقولك ايه يا ابو مارو. احنا شعب منستهلش الحسنه ولا المعامله الحلوه ولا نستاهل احترام انسانياتنا و ادميتنا و لا احترام حقوقنا!!!
يا جماعه يا اللي بتطبلوا و بتنشدوا معزوفه فرديه الراجل مقالش العربيه الهيونداي وحشه و كون ان التوكيل ابتسم في وش واحد واللا واحد عربيته الحمدلله مطلعش فيها عيوب صناعه ده معناه يطلع يغني معزوفة انا بعشقك!! انت و هوا و هوا حط نفسك مكان الشخص اللي حصله الموقف السئ مش موقفك. انا معايا عربيه الحمدلله حلوه و جميله و مفيش فيها اعطال و التوكيل شايف شغله, كلام جميل و حلو ! واحد غيره بعد ما جاب نفس العربيه بالضبط طلعت بايظه بعد 3 او 4 ايام !!! راحوا مريضيوش يبدلوهالوا بالمخالفه للقانون! و راحوا هددوه! و بعدين قالولوا اعلى ما في خيلك اركبوا!! و في الاخر راحوا المستهلك ادوهم رشوه واللا هددوهم!!!!!!! و بعدين كدبوا و قالوا ان صاحب العربيه دخليعمل صيانة الالف العاديه و هوا ده بس اللي اتعمل!!!!!!!!! يعني عصابة علي بابا كانوا حراميه بس مكانوش بيكدبوا! دول غلبوا عصابة علي بابا نفسها!
و نيجي نقول يا عم و انا مالي ما انا عربيتي زي الفل!!! واللا تطعن في نزاهة ابو مارو انه بيلفق كلام و اللا بيبالغ؟ انا مش شاري عربيه مستعمله! انا شاري عربيه زيرو و عايزها زيرو لمدة سنه واللا اتنين على الاقل!!!! يعنب ميتفكش فيها خلال السنة الاولى الا فلتر الزيت و بس!
تيجي تطلع عين اهلي في اول اسبوع؟!؟!؟!؟! بلاش منها احسن!
و يا رب يا رب كل اللي قعد يمدح في العربيه دي و يشكر في التوكيل يشتري عربيه هيونداي بعد اللي معاه و يجراله فيها نفس اللي جرى مع ابومارو و ساعتها لما يكتب عن اللي حصلوا هنا انا حفتكروا و اقوللوا مش انت اللي كنت بتشكر في غبور! اشرب و ادعيلي زي ما دعيتلك!
يا جماعه الوقفه اللي ابو مارو بيعملها و كلنا بنطالب بيها ببساطه لدفع التوكيل الى معاملة عملائه (اللي عندهم عربيات بايظه مش سليمه ) معامله ادميه و احترام القانون ببساطه كده!
اللي موسلطلوش الفكره , مع احترامي ليك مش عايزين رأيك ممكن تفتح موضوع مخصوص عن مدى حلاوة التوكيل و ازاي طبطبوا عليك و ازاي ادولك رز بلبن و انت في الاستراحة بتشرب السيجار بتاعك مستني الصيانه اللي خلصت في فيمتو ثانيه و في الاخر ادولك هدية العميل المثالي و انتا ماشي.

انما اللي وصلتلوا الفكره ارجو المشاركه لدعم ابومارو على الاقل معنويا طالما احنا مش عارفين ندعمه ماديا.
معاك يا ابو مارو و طمنا و انشاء الله لا يضيع حق وراءه مطالب

بجد مش عارف اقول ايه انت رائع في ردك
فعلا خلاصه الكلام اللي ممكن يتقال

معلش يا ابو مارو انا كنت مسافر اسبوع ولسه راجع وقبل ما اغير لبسي دخلت عشان اشوف انت وصلت لايه طمنا

معلش اعزرني مش قادر اشوف ادامي ومش هقدر ادور في الصفحات اللي فاتت


قلوبنا كلها معاك والله قبل ما اغير هدومي قلت ادخل اشوفك وصلت لايه طمنا الله يكرمك

حصل اية يا ابو مارو