المشاركة الأصلية كتبت بواسطة hh
أنا بس عايزة اعلق على الكلام بتاع طلبات أهل العروسة لأن ده اللي بيتقال في أي موضوع بيتفتح فيه سيرة الجواز في المنتدى.
أولا طبيعى جدا ان أهل العروسة يكون عندهم طلبات, يعني المهر االلي انتوا بتتكلموا عليه ده المفروض انه يكون هدية للعروسة لكن الواقع ان فلوس المهر ابو العروسة بيكمل عليه عشان يجيب الجهاز, رغم انكوا لو رجعتوا للأسلام الزوج هو اللي ملزم بكل حاجة, يعني احنا في الزمن الحالي بقى فيه ظلم كبير واقع على البنت اللي بقت مطالبة هي و أهلها بمصاريف كتير و تجهيزات رغم ان ده مش من الاسلام لكن ماعتقدش ان فيه أهل بيقولوا لعريس بنتهم انت عليك كلحاجة و احنا مالناش دعوة.
ثانيا طبيعي لما يكون واحد رايح يتقدم لواحدة بطريقة جواز الصالونات انه يكون عنده الحد الأدنى من متطلبات الجواز و الا العروسة و أهلها بيحسوا انه بيستهبل أو طمعان. و الصح انه من البداية يوضح لهم امكانياته كويس عشان ميبقاش ده محل خلاف بعد كدة. و برده لو ما قبلهوش مينفعش نتهمهم بالطمع لأن هو بالنسبالهم عريس زيه زي غيره معندهمش سبب للتمسك بيه.
مش معنى كدة ان المعيار الوحيد هو المادة, بالعكس انا اللي شفته مع كل صاحباتي و قرايبي ان الأغلب ان الواحدة بتتخطب للي بتكون هي و أهلها مستريحنله و متوسمين فيه خير حتى لو مكانش الأفضل ماديا بين خطابها انما اللي أقصده انه مينفعش واحد يروح يتجوز جواز صالونات و هو مش محدد ايه اللي حيعملوا في متطلبات الجواز.
ثالثا لازم الشباب يكونوا فاهمين ان البنت لما بتتخطب بتكون مستنية من خطيبها هي و أهلها انه يعمل أقصى ما في وسعه عشان يجيبلها كل اللي نفسها فيه. المسألة مش مسألة فلوس بس, المسألة ليها علاقة بأحساسها بأهميتها عنده و بيديها انطباع انه بعد الجواز حيبقى كويس معاها و لا حيستخسر فيها. طبعا الكلام ده كل واحد حسب امكانياته. يعنى كمثال أنا لما جيت اتجوز جوزي كان لسة متخرج و في بداية حياته و كانت امكانياته على قده, فأنا والدي كان بينصحه انه ميعملش فرح و يوفر الفلوس لحاجة في البيت, انما هو عمل الفرح عشان أنا كنت حموت و نعمله. لما جت أختى الصغيرة تتجوز جوزها مكنش عايز يعمل فرح عشان شايفها مصاريف ملهاش لازمة انما والدي و والدتي هما اللي أصروا على الفرح و قالولوا انهم عايزين يفرحوا بيها. الفرق بين الموقفين انه جوزها امكانياته كانت تسمح انه يعمل فرح و هو اللي مش عايز فهما تمسكوا برأيهم, انما انا عشان جوزي امكانيته كانت ضعيفة كانوا بيحاولوا يوفروا عليه.
انا أسفة ان أنا طولت عليكوا و خرجت بره الموضوع أنا بس عايزة الشباب ميكونش حاطط في دماغه حكاية ان العروسة و أهلها ماديين دي لأن الموضوع حسب الظروف و فيه ناس كتير كويسة و مش هدفها الأول الماده انما ساعات يبان غير كدة.