المشاركة الأصلية كتبت بواسطة M.Mekawy
وليد عمّى و عم عيالى , كنت عارف انك هتخش تسكعنى الكلمتين دول :khd:
و الله يابنى مش فكرة تشاؤم و لا كمان فكرة ماديات , الماديات جزء و لكنى لا اريد تسطيح المشكلة على انها فكرة فلوس
ادينى اديتلك قائمة مشاكل غير الفلوس ..... يعنى مثلا انا شحط اهو عندى 24 سنة و بشتغل و مع ذلك لسة عايش مع ابويا و امى زى كل شباب مصر , زمان ايام الناس اللى بجد كان اسامة ابن زيد عنده 18 سنة و قائد جيش المسلمين
بلاش زمان اوى كده , زمان ايام ابويا اللى مجيش ضافر رجله يا رب يديه الصحة و طولة العمر , ابويا اول ما تخرّج من هندسة ده كان مسئول عن اسرة 5 افراد مصاريف و تربية و فى نفس الوقت كان بيحب امى و اتجوزها فى ظروف حالكة , مين دلوقتى يعمل كدة
أيام امى اللى مفيش بنت دلوقتى تيجى ضافر رجلها , كانت معيدة فى الجامعة و سابتها عشان تسافر مع ابويا يشقوا طريقهم فى بلد عربية تانية و فى الاثناء دى خلفت اخويا و اختى فى سنتين ورا بعض علطول و بتربيهم لوحدها فى بلد تانية من غير ما يكون جمبها واحد حتى من أهلها
الناس دى لا كانت معاها عربيات و لا خدّامات و لا موبايلات و لا حاجة , بينحتوا فى الصخر و لسة لحد هذا العمر " الخمسينات " ربنا يديهم الصحة و طولة العمر بينحتوا فى الصخر عشانى انا و اخواتى
السؤال باة اللى الكل بيتهرب منه : انت و انت بتفكر تتجوز , شايف نفسك ممكن تعمل نص اللى هما عملوه و بيعملوه ؟
هتقدر تسعد مراتك فى عز مانت اصلا قرفان من الدنيا ياللى فيها ؟
هتقدرى تسيبى شغلك و كيانك عشان سعادة جوزك و عيالك ؟
هتقدر فى عز تعب الدنيا و قرفها انك تفرغ وقت ثابت ليك و لاسرتك و لعيالك وتربيتهم اللى بقت اصعب من ترويض الاسود , على الاقل الاسود بتخاف من النار
مش هتخلى الملل يسيطر على حياتك الزوجية بعد 5 سنين مثلا من نفس الروتين القاتل , و تزهق من مراتك و هيا تزهق منك ؟
هتكتمى سر جوزك مهما كان و مش هتطلعيه برة ؟
هتفضل تربى ابنك لحد ما يبقى عنده 30 سنة و لما يتجوز و يخلف تقعد تربى فى عياله ؟
هتستحمل سخافات أهل مراتك و واجبتهم الاجتماعية التى لا تنتهى و التى سوف تلتهم اى وقت فراغ قد يتبقى لك ؟ ( عيد ميلاد بنت اخت اللى جابوا اخو عمة امها !!!! و الكلام اللى بالشكل ده )
.......
فكّر و تأنّى