دليل; تجنب بعض الحوادث.

**slim_shika** · 22-03-2010 04:36 PM

=تجنب بعض الحوادث=

كنت بأتكلم أنا واصحابي في الموضوع ده من يومين ولقينا إن أهم حاجة علشان تتجنب الحوادث لازم يبقى عندك خلفية عن بعض اخطاء الغير أو الاخطاء اللي ممكن تقع فيها.

يعني لو كل واحد يقدر يشارك بتجربته (سواء كانت حادثة أو غلطة كانت هتكلفه على الطريق) سواء كانت منك أو من الطريق نفسه أو من الغير.

مثلا لو إنت عارف إن الحارة اليمين خالص على الدائري فيه ميكروباصات بتقف تنزل أو تحمل ناس , مش هتفكر تاخد الحارة ديه بعد كده , حتى لو مشفتش حاجة زي ديه بعنيك بس سمعت عنها مش هتغلطت نفس الغلطة بتاعت حد تاني.

مثلا إنك متعديش حد من على اليمين , بالذات الماقطورات علشان اليمين بتعهم يعتبر كله Blind Spot , وهكذا كنوع من التعلم من اخطاء الغير.

بالطريقة ديه إن شاء الله نقدر نتجنب بعض المواقف الخطيرة اللي ماأكترها على الطريق بسبب عدم الوعي أو الاستهتار أو - الستات (بهرج )

- طبعا مع فرض إنك مركز مع الطريق ومش بتجري في طريق مش مستحمل فسبة تجري فيه..

**abogogo** · 22-03-2010 10:08 PM

للأسف الحذر لا يمنع القدر وفي السواقة في مصر مهما كنت ملتزم ومتمكن في السواقة هتلاقي العجب في الطريق نفسه او من بعض السواقين حولك فعلا اقل ما يقال انه سيرك على الطريق مثلا انا كنت على الدائري وماشي في نص الطريق ويميني مقطورة وفجأة الاقي على شمالي مقطورة و كنت ماشي على ال100 وهما في نفس السرعة وفجأه الاقي مقطورة امامي وانا في النص تحس انها عملية اغتيال وناس مستأصداني وما ادارك من الماروتي خوفت من الهوا اللى بين المقطورتين انه يجبني تحت وحدة منهم المهم هديت عشان اطلع من الموكب الغريب ده فعلا وانت راكب العربية وخارج بيها اكنك طالع على الجبه ... حرب يعني ....وربنا يسترها علينا جميعا

**romeo_6887** · 22-03-2010 10:21 PM

لو الواحد مايكل شوماخر او الونسو هيتلاقي سواق بأف بيزنق عليه او يقف قدامه فجأه ... العيب من الاخرين

**Mostafa.Mahran** · 22-03-2010 10:27 PM

الغلطة الى كانت هتموتنى انى مرة ركنت ورا مقطورة فى نصفها بالظبط ولا يمين ولا شمال بس الكلام ده كان فى الموقع بتاع الشغل

فالسواق ربنا يكرمه قبل ما يمشى لقيته رجع ورا و بيقولى وقفتك كده غلط انا مش شايفك فى المرايات عندى و انت بعد كده لو واقف ورا عربية كبيرة يا تقف يمين يا شمال

**Ahmed Galal** · 22-03-2010 10:30 PM

1-ما تمشيش فى جسر السويس ده مقبرة السيارات الملاكى و غابة الميكروباص
2- خلى بالك من اى يوتيرن فى مصر ابعد عنه لو مش هاتلفه و لو داخل فيه اعمل حسابك انك تلاقى واحد جى فى وشك
3- دايما و انت داخل على كل تقاطع هدى و شغل انتظار كانك هاتقف لان هاتلاقى واحد بيعديه و هوا مش باصص خالص و بيقطع الطريق عليك
4-ما تدخلش ميدان المطرية و لو هاتموت لان فيه هناك سيرك دائم و منصوب على طول و ما حدش عارف منين بيروح فين
5-دايما تطلع ايدك فى كل لفة عشان نور الاشارة ده زينة
6-لو كلاكس العربية واطى او بايظ ما تخرجش بيها من اساسه لان الكلاكس اهم جزء فى العربية و دايما و انت ماشى و شاكك فى حد ما تتردش و اديله كلكس انا يا ما صحيت ناس على الطريق
7-لو واحد كابس عليك من ورا و عمال يكلكس و ينور عديه و ما تحطش دماغك معاه و اوعا تجرى و تفتحله طريق يجرى و يشد اعتبره عربية اسعاف ووسع له انا كنت باقفل دماغى و ربنا نجانى فى مرة و بطلت
8-لو شاكك للحظة و انت فى طريق بيجرى ان سرعة الطريق بتهدا و الناس بتقرب تقف ادى انتظار على طول و ما تترددش لان الخبط من ورا بقا موضة اليومين دول

و كل ما افتكر حاجة هاقولها ان شاء الله

**M.Osman** · 22-03-2010 11:38 PM

احب اضيف..
خللي بالك انك ممكن تلاقي واحد شبه البني آدمين بيرجع بضهر العربية في الحارة الشمال بالليل من غير نور عشان يدخل اليوتيرن اللي فاته

**mimohamada2** · 23-03-2010 12:08 AM

لا تمشى ورا اتوبيس هيئة ولا ست سايقة ههههههه مع العلم والله فى ستات اروبة فى السواقة بس قليل لكن الباقى ربنا ما يوريكم .

لو فى طريق كنت عايز تدخله او لفة وعديته من غير ما تاخد بالك اوووووووووووووووعى ترجع بظهرك عشان تدخله كمل ولف من الى بعديه عشان عملت حادثة وحيدة وكانت بسبب كدة انى رجعت بظهرى عشان ادخل اللفة والحمد لله واحدة ست رشقت فيا من ورا .... الحمد لله

#cc361e

**M.Osman** · 23-03-2010 12:18 AM

و فى طريق كنت عايز تدخله او لفة وعديته من غير ما تاخد بالك اوووووووووووووووعى ترجع بظهرك عشان تدخله كمل ولف من الى بعديه عشان عملت حادثة وحيدة وكانت بسبب كدة انى رجعت بظهرى عشان ادخل اللفة والحمد لله واحدة ست رشقت فيا من ورا

.... الحمد لله

مش بس الستات اللي هيرشقوا في اللي زيك لما تعملوا الحركة دي..
لسة عامل حادثة بسبب واحد زيك برضه

**slim_shika** · 23-03-2010 12:23 AM

المشاركة الأصلية كتبت بواسطة m.osman

احب اضيف..
خللي بالك انك ممكن تلاقي واحد شبه البني آدمين بيرجع بضهر العربية في الحارة الشمال بالليل من غير نور عشان يدخل اليوتيرن اللي فاته

انا شفت الموضوع بتاعك بس معرفتش أكتب حاجة زيادة عن إن الناس ديه فعلا مفيش تفكير..

يبقى ده لو اتقفش واتسجن مش يبقى حلال أحسن ماحد ملوش ذنب يحصله حاجه..

**slim_shika** · 23-03-2010 12:29 AM

المشاركة الأصلية كتبت بواسطة agmgranturismo2006

1-ما تمشيش فى جسر السويس ده مقبرة السيارات الملاكى و غابة الميكروباص
2- خلى بالك من اى يوتيرن فى مصر ابعد عنه لو مش هاتلفه و لو داخل فيه اعمل حسابك انك تلاقى واحد جى فى وشك
3- دايما و انت داخل على كل تقاطع هدى و شغل انتظار كانك هاتقف لان هاتلاقى واحد بيعديه و هوا مش باصص خالص و بيقطع الطريق عليك
4-ما تدخلش ميدان المطرية و لو هاتموت لان فيه هناك سيرك دائم و منصوب على طول و ما حدش عارف منين بيروح فين
5-دايما تطلع ايدك فى كل لفة عشان نور الاشارة ده زينة
6-لو كلاكس العربية واطى او بايظ ما تخرجش بيها من اساسه لان الكلاكس اهم جزء فى العربية و دايما و انت ماشى و شاكك فى حد ما تتردش و اديله كلكس انا يا ما صحيت ناس على الطريق
7-لو واحد كابس عليك من ورا و عمال يكلكس و ينور عديه و ما تحطش دماغك معاه و اوعا تجرى و تفتحله طريق يجرى و يشد اعتبره عربية اسعاف ووسع له انا كنت باقفل دماغى و ربنا نجانى فى مرة و بطلت
8-لو شاكك للحظة و انت فى طريق بيجرى ان سرعة الطريق بتهدا و الناس بتقرب تقف ادى انتظار على طول و ما تترددش لان الخبط من ورا بقا موضة اليومين دول

و كل ما افتكر حاجة هاقولها ان شاء الله

نصايح كلها من القلب...خصوصا لو حد كابس عليك من ورا,, الناس ديه اللي عايشة في دور ال Street Racing

الموضوع: دليل; تجنب بعض الحوادث.

LinkBack

أدوات الموضوع

عرض

دليل; تجنب بعض الحوادث. - انشر الموضوع فى :

-

-

-

-

-

المواضيع المتشابهه

هو الفيديو ده دليل على ان الكروز ثباتها خرافى ولا دليل على ان سوقها محترف بجد

(دليل الخدمات الشرطية للمواطنين) - ( دليل حقوق المواطن وواجباته عند التعامل مع أجهز

الإلتزام بقواعد القيادة وطرق تجنب الضغط العصبي

الكلمات الدلالية لهذا الموضوع

المفضلات

المفضلات

ضوابط المشاركة