للأسف وأنا طالع النهاردة من البيت قابلت واحد مش باحب أشوفه ، قلت مش مشكلة أهو يسليني في الطريق
فركب معايا العربية وقاللي العربية رائعة رائعة وصوتها ناعم جدا في المطبات وهادية جداا بعد كده نزل وكملت الطريق لوحدي / النهاردة طارت العربية مني بتاع 9 مرات في مسافة 150 كيلو
طبعا اللي عايز يعرف بتطير إزاي هاشرح بالتفصيل
1- الجو بيكون كويس وهابدأ الإقلاع
2- بتوصل من 0-40 بدون أي مشاكل دائما
3- لما بتوصل 60-120 الثبات بيكون ممتاز في حالة عدم وجود هواء ورياح أو عربية ضخمة بتعدي جنبي مسرعة
4- 60 -80 لما بتعدي عربية ضخمة في المقابل مني العربية بتتحرك ككل في اتجاه اليمين مسافة نص متر إلى متر ونص حسب السرعة
طبعا جربت وصية الأستاذ سمير أكلبش في الدريكسيون ----------> مفيش فايدة
أسيب ايدي خالص -----------> العربية بتفضل تنقل بالجنب وتتزحلق لليمين لغاية ما تأثير الهواء يروح
أقفل الزجاج أو أفتحه -----------> مش فارق
النهاردة أعصابي اتحرقت في مرتين من طيرانها وزحلقتها الغامضة وكنت هاخبط في الرصيف من الطيران
اللي بيؤكد إنها بتطير إن العربيات اللي جنبي بيبعدوا عني وبيوسعولي على طول في لحظات الطيران
العربية فعلا بتطير مش تهيؤات بتطير بتطير
الكاويتش بتاعي زي كاويتش العربية اللي مش بتطير بنفس المقاس
الكاويتش مظبط 32 وبتطير !!!!
لكن بعد ما رجعت قلت خلاص العمر مش بعزقة أنا هاشتري العربية اللي مش بتطير بأي تمن وأخليها مع بتاعتي علشان أقارن بينهم وأشوف جميع القطع وممكن أبدلهم
فعرضت عليه أشتريها منه هي موديل 99 راشة برة ومخبطة شوية كنت هاشتريها ب 60 ألف بعد تفاوض طويل وللأسف وهو مش عايز يبيعها بأي تمن
العربية الوحيدة اللي مش بتطير دي باحس فيها إنها تقيلة جدااااااا على الأرض ومتماسكة جدااا أنا كنت باقفل بيها العداد في ذهول تام وفرامل جبارة بسم الله ما شاء الله مش زي أي دايو تانية
أنا هجرب يوم الجمعة القادم إن شاء الله أفك العلايات وسأخبركم بالنتائج