انا تعبت خلاص (لوجان و لا لانوس )

**malta** · 02-04-2010 11:04 PM

لو سمحتوا يا جماعة بقالى اسبوع ادخل الموقع اشوف الاراء عن اللوجان و اللانوس و بصراحة انا شايفة العيب الوحيد فى اللانوس هو استهلاك البنزين لكن اللوجان حد يقول بتطلع هوا سخن عند رجل السواق و رعشة فى الفتيس و زنة الموتور فى بدال البنزين و اخر حاجة العربية بتهتز جامد لما التكيف يشتغل انا بجد تعبت خلاص و نفسى اركز على حاجة و ماندمش بعد كدة عارفة ان الموضوع بايخ و مكرر لكن بجد انا مش عارفة اسال حد و مش عارفة اعمل ايه يا ريت تساعدونى و شكرا

**rama2000** · 02-04-2010 11:17 PM

انا كمان عايزه اعرف اللوجان ولا الانوس انا عندى نافس الحيره بس انا موشكلتى مع الانوس انى مبحبش شكلاها خالص

**hishammb** · 02-04-2010 11:24 PM

حرام عليكو بجد طالعوا اللانوس من المقارنه خالص
ممكن تقارنوا بين اللوجان و الساجا

**waleedraafat** · 03-04-2010 12:08 AM

اللوجان
عالية عن الارض
سريعة وادائها افضل من الانوس
شكلها جديد
الوانها حلوة
قطع غيار مكلفة(ىمكن ترخص في المستقبل)
غير معلوم العمر التشغيلي لها (جديدة لسه)

اللانوس
ناعمة جدا بالمقارنة بالوجان (عفشة طرية)
قطع غيار رخيصة ومتوفرة
سهولة الصيانة خارج التوكيل
سعر اعادة البيع جيد
تجميع مصري منخفض الجودة عن الدايوا
اداء ضعيف مع التكييف
شكل قديم

**nomercy22** · 03-04-2010 12:36 AM

اللوجاااااااان
هي فيها عيب واحد بس هو رعشه الفتيس وهي من وجه نظري مش مؤثره خالص انا لو رجع بيه الزمن هشتريها برضه

**ahmadalsattar** · 03-04-2010 12:41 AM

المشاركة الأصلية كتبت بواسطة malta

لو سمحتوا يا جماعة بقالى اسبوع ادخل الموقع اشوف الاراء عن اللوجان و اللانوس و بصراحة انا شايفة العيب الوحيد فى اللانوس هو استهلاك البنزين لكن اللوجان حد يقول بتطلع هوا سخن عند رجل السواق و رعشة فى الفتيس و زنة الموتور فى بدال البنزين و اخر حاجة العربية بتهتز جامد لما التكيف يشتغل انا بجد تعبت خلاص و نفسى اركز على حاجة و ماندمش بعد كدة عارفة ان الموضوع بايخ و مكرر لكن بجد انا مش عارفة اسال حد و مش عارفة اعمل ايه يا ريت تساعدونى و شكرا

على فكره رعشة الفتيس موجوده لكن غير ملحوظه بسيطه جدا ولا تؤثر على اي حاجه اثناء القياده
السخونه ما حسيت بيها لغاية الان ولا دواسة البنزين دى

**khpopo** · 03-04-2010 01:46 AM

المشاركة الأصلية كتبت بواسطة hishammb

حرام عليكو بجد طالعوا اللانوس من المقارنه خالص
ممكن تقارنوا بين اللوجان و الساجا

+1

ربنا يوفق

**Eng.Geo** · 03-04-2010 02:03 AM

علي فكرة العيب اللي انت قلته في اللانوس ده مش عيب
العربية استهلاكها كويس
ولكن العيوب تعالي بقي
-ارتفاعها عن الارض بتحك في المطبات ولو محمل هتحك في الحصي بتاع الطريق ( هي طبعا مش للدرجادي بس ارتفاعها مش كويس )
-توكيل من اسوأ توكيلات مصر بل هو الاسوأ علي الاطلاق
-موتور ضعيف ولو شغلت التكييف ومحمل مش هتمش وممكن تقف منك علي مطلع كوبري ( بطة )
-الكاسيت فيه مشكلة وهو انك لما بتشغل ال mp3 الاريال بيطلع مع انه المفروض يشتغل في الراديو بس
-عداد الحرارة في بعض الدفعات به مشكلة والسبب هو صباع الحرارة ( هو ممكن تجيبه ب 30 جنيه بس برده ليه تنزل العربية فيها حاجة بايظة )
-في الموديل الجديد الفرش اللي حاطته منصور سئ جدا وخاماته سيئة علي عكس بتاعة ابو الفتوح
- فرامل في الضيااااااااااااااااااااع
اللوجان
- رعشة الفتيس شئ غير ملحوظ خالص وبرده البدالات وكمان بيظهر تحسن كبير بعد اول5000 كم
-السخونية من الدواسات ده بسبب مواسير التكييف وتم علاجها بوضع العازل في التوكيل
- موضوع انها بتتهز جامد لما التكييف يشتغل ده حاجة جديدة جدا جدا ممكن اعرف قراتها فين ؟ هو الاحتمال الوحيد ان اللي بيحصل عنده الكلام ده بيحط بنزين 80 انما لو بتحط 92 فالعربية تمام والتكييف ممتاز
-من الاخر اللوجان احسن من اللانوس كتير جدا وبالذات من بعد ما منصور خدها
-كفاية ان التوكيل بتاع اللوجان ممكن لو في حاجة في العربية مش مظبوطة يقولولك سيبها عشان نظبطها علي العكس من منصور ممكن تقعدي تحلفي انها معيوبة وتكون فعلا فيها عيب بس هما عاملين فيها انها تمام وده تهيؤات
انا كدة ماقلتش مميزات اللوجان انا بس بارد علي الكلام المكتوب وبكدة تكون المقارنة مش سليمة قوي لأننا لازم نقارن كل حاجة مع كل حاجة وده هياخد وقت كبي جدا وممكن يبقي افضل في قسم المقارنات
علي فكرة انا معييش العربيتين دول ولكن مجربهم كويس جدا ومجرب اللانوس كتيييييير جدا
ربنا معاكي تشتري الافضل

**johnmims** · 03-04-2010 02:07 AM

انا رعشه الفتيس عندي بسيطه جدا تقريبا مش موجوده اصلا هو قي خزه في دواسه البنزين لاما تيجي تخف رجللك من عليه وبسيطه بردوا بس بجد لاتقارن بالانوس
االانوس دي شكلها لوحده كفايه اللي ليه سنين مش عايزين يغيروا دي غير التوكيل الزباله اللي مش بيصلح عيوبها