الموضوع: تقييم اللوجان فول اوبشن بعد 1000 كم

المشاركة الأصلية كتبت بواسطة korkor

انا عارف طبعا ان الموضوع ده قتل بحثا بس انا قولت برده أضيف تقييم يكون لسه من مالك جديد ممكن يكون أضافه للناس اللى لسه بتدور ومحتارة وعاوزه اراء جديدة شويه , حاجه مهمه عاوزه اقولها ا فى اثناء التقييم هيكون المرجع عربيتين عربيتي القديمة الشاهين وعربيه مراتى كيا سيراتو sx

1 – الشكل الخارجي والمساحة الداخلية
شكل شبابي مميز لا خلاف عليه وإضافات النيكل فى أسفل الشنطه والموتور مدينلها شكل مميز وجميل , الوسع الداخلى وسع مش ممكن تتخيله لان شكل العربية مدملك كده ومدكوكه بس فعلا وسع كبير سواء للراكبين فى الخلف او كرسى السواق بالمقارنه بالسيراتو وسع ممتاز ويمكن نفس الوسع او اكتر مافيش مقارنه مع الشاهين طبعا مساحه الشنطه وهميه ممكن تقعد واحد مستريح فيها مع شويه شنط .
2- العفشه والثبات
العفشه ناعمه جدا فعلا عاشقه المطبات وثبات ممتاز طبعا لا تقارن بالشاهين وانعم بكتير من السيراتو ومكان بعد ما حطيت نتيروجين .
3- السحب ونظام النقل
بسم الله ماشاء الله سحبها ممتاز بس زمن النقل سريع يعنى بتنقل بسرعة من الأول للتانى بتجيب الخامس على 60-70 كم/ساعه وممكن تمشى بيه كتير لغايه لما يوصل 50 كم / ساعه من غير ماتنقل عكسى وده طبعا ماكنتش متعود عليه فى الشاهين انت مجرد ماكنت تدوس فرامل كان لازم تنقل , الفتيس بينقل بسهوله فى الاتجاه الطبيعى للحركه اول – تانى كده لكن بتحس ببعض الممانعه فى الغيار العكسى بس طبعا لا يقارن بالنقل العكسى بتاع الشاهين الدبرياج ناعم جدا بس مشواره طويل شويه موضوع العضه اللى فى الفتيس فعلا فى عضه عندى فى الاول مش فى المارشدير بس العضه لا تقارن بعضه الشاهين وكمان بدات تتحسن جامد بعد الاستعمال بس ممكن تبقى احسن ولما اروح صيانه 5000 ابقى اقولهم على الموضوع ده , موضوع هزه الفتيس برده موجوده بس لما بتشيل رجلك من على البنزين وبرده مش ملحوظه قوى مافيهاش حاجه .

4- الصالون الداخلي والتكييف

هو يمكن العيب الوحيد اللى قالبته فى العربية لغاية دلوقتى هو الترتيب العجيب للزاير فى الصالون كل حاجه مش فى مكانها زراير التكييف , زراير المرايات الاماميه والخلفيه , الكلاكس كل الزراير بتبقى مشكله اسبوع ولا اتنين وبعد كده خلاص بتبقى حلاوه بس بتعمل مشكله لما بتيجى تركب عربيه تانيه امبارح كنت راكب السيراتو وعمال ادوس على الاشاره علشان ازمر مش راضيه تزمر لغايه لما خدت بالى وبرده اماكن زرار الانتظار بس بتتعود على الحاجات دى بعد شويه , التكييف بقى انا لسه مجربتوش كتير بس فى الكام مره اللى شغلته فيهم بصراحه تلاجه على 1 مش عارف ممكن اللى يحصل لو شغلته على اكتر من كده ليه تاثير محدود على السحب بس يمكن تداركه انك تقرص حاجه بسيطة على العربية

5- الاضاءه وكمبيوتر الرحلات والكاسيت

الاضاءه عاليه واكتر من درجه امامى وخلفى ,كمبيوتر الرحلات ساعات بيهيس فى استهلاك البنزين ساعات بس غير كده هو مش بطال , الكاسيت والسى دى صوتهم حلو والاربع سماعات عاملين شغل جامد .

استهلاك البنزين

استهلاكها فى البنزين عجيب انا فولت مرتين لغايه دلوقتى وعامله 1150 كيلو ولسه فاضل خمس التنك بس لما بتشغل التكييف الاستهلاك بيزيد بصوره ملحوظه بس برده استهلاكها اقل بكتير من عربيات تانيه لا تقارن بالشاهين واقل بكتير من اللسيراتو .

العيوب من وجهه نظرى :
طبعا لان مافيش حاجه خاليه من العيوب فانا هاقول على العيوب اللى انا شايفها ومدى تاثيرها على قرار الناس اللى عاوزه تشترى او بتقارن بعربيات تانيه
1- التقفيل سواء الخارجى او الداخلى فقير نسيبا وفى حاجات كتير كانت ممكن نكون احسن من كده بس على قد تمنها يعتبر عيب غير مؤثر على الاطلاق .
2- تنك البنزين مالوش مفتاح من جوه بصراحه حاجه رخمه اوى يعنى كل الاوبشن دى وكسلوا يحطو الزرار ده هى حاجه رخمه بس برده غير مؤثر بدره على الرغم ان الموضوع ده كان معقدنى فى الشاهين .
3- ترتيب زراير الكونسول فعلا رخم بس بتتعود عليه بعد شويه بس لو بتسوق عربيات تانيه هتبقى متلخبط جامد بس برده عيب غير مؤثر .
4- المرايات الجانبيه صغيره قوى ومش بتكشف الطريق خالص لو تنفع تتغير يبقى مصلحه جامده مرايات السيراتو الجانبيه جامده جدا وبتكشف الطريق كله ومافيش blind spot خالص , انا شايف ان ده عيب مؤثر بالاضافه الى غلو اسعار قطع الغيار نسبيا بس مادام اللوجان هتنزل فى مشروع التاكسى يبقى اكيد حاجاتها هترخص .

من الاخر العربيه على قد 67000 تعتبر ممتازه وصفقه ممتازه واى حاجه فيها عيوب بس المهم العيوب تكون مش مؤثره او خطر على الحياه وكمان من الاخر هى فعلا جباره بس مش بتطير .

اولا شكرا علي التقييم الجميل دوه انا معاك في العيوب الي قلتها ما عدا التقفيل والمرايات

التقفيل ممكن اديله 90%

المرايات الجانبيه انا شايفها كويسه جدا بس لنت عشان يمكن بتقارنها مع سيراتو

انا من المعجبين بالسيراتو بس لوجي مقدرش استغني عنها

المشاركة الأصلية كتبت بواسطة yahiazakaria

اولا شكرا علي التقييم الجميل دوه انا معاك في العيوب الي قلتها ما عدا التقفيل والمرايات

التقفيل ممكن اديله 90%

المرايات الجانبيه انا شايفها كويسه جدا بس لنت عشان يمكن بتقارنها مع سيراتو

انا من المعجبين بالسيراتو بس لوجي مقدرش استغني عنها

يعنى انا شايف ان 90 % على التقفيل كتير شويه بس انا قولت انه مناسب جدا لسعر العربيه ويمكن برده المرايات متاثر شويه بالسيراتو بس اللانسر برده مرايتها واسعه .

بالنسبة لموضوع تهييس الكمبيوتر الرحلات
هيه ممكن حضرتك حطيت بنزين وصفرت الكمبيوتر فالحسابات لسه متبقاش مضبوطة على الأقل 100 كيلو
يعنى هيه بتتظبط بعد المشى بناء على السرعة والإستهلاك

تقييم رائع احييك على اهتمامك بنقله لنا .. وحكاية المرايات الجانبية ما اعتقدش انها هتكون مشكلة بقدر مشكلة مراية الصالون اللى مش مبينة حاجة .. انا ركبت اللانسر بصراحة مراية الصالون بتاعتها تحفة وبتقرب المسافات وبفكر جدياً انى اشترى واحده زيها واركبها بدل السينسور بارك ..
- متفق معاك ان خاماتها فقيرة نسبياً .. وتفقيلها 75% .. لكن كويس بالنسبة لسعرها.
ومرة تانية الف مبروك العربية وربنا يباركلك فيها.

تقيم جيد وربنا يحفظها لك