الموضوع: لعمل خصومات وتخفضيات لملاك نيسان

والله يا جماعة الواحد مش ساكت بجد ,خصوصا لما الواحد اتعرف على ناس محترمة فى القسم هنا زيكم والله عاوز يخدكم من القلب

المشكلة بجد فى العقليات المصرية فى التسويق مش عارف ازاى وليه بقفلوا الدنيا كدا !!! وبعدين ده المصلحة حتكون ليهم قبل مننا

بالنسبة الى السبع المهندس حاتم انا كلمته قولتله يبقا يدخل هنا معانا ويبلغكم كمان بنفسه ويوضح الامور اللى حصلت هناك مع المسئولين فى خدمة ما بعد البيع
اللى قاله وبلغنى بيه ان المسئول اللى هناك قال احنا كدا كدا حنعمل تخفضيات الفترة الجاية والكل حيستفاد بيها

طبعا مفروض ان معاه العروض فى ايده وقرائها كمان وعارف احنا اتعاقدنا مع مين
وكان من العروض اللى راحتله , عرض فيات ومتسويشى وهيونداى ورينو وكيا وبريدج ستون , وكل العروض اللى عملها المنتدى مع التوكيلات الكبرى
الهم هو رفض بشياكة

ربنا يكرم ونخلص على خير الاتفاق مع مودرن ,ساعتها حروح السبع بس يكون فى ايدى عقد مودرن

قريب باذن الله حنروح انا والدكتور امير الى توكيل نيسان نفسه ونجبها من فوق على طول
بس هو الموضوع عاوز صبر وطولة بال , مع ان كل ده بيصب فى مصلحة مراكز الخدمة

بالنسبة بقا الى قصة مودرن رئيس القطاع لخدمة ما بعد البيع الاستاذ هانى المشكلة انه مش بقعد فى مكانه ومش ليه معاد تعرف تروح فيه وتلقيه, لان مرة يكون فى الدقى ومرة تلاقيه فى ابو رواش ومرة فى اسكندرية , وحتى المكان اللى بيرحوا مش بيقعد فيه الا ساعة مثلا
بس انا حفضل وراه لغاية ما التقى بيه باذن الله وهما على كلام اللى بيبلغنى جو انهم مرحبين , وناس متفاهمة
ويارب يكون الكلام ده صح

وبجد يا جماعة الواحد سعيد انى وسطيكم واتمنى اننا نلتقى كلنا فى مرة ونقعد مع بعض ونتكلم ونتناقش فى امور كتيرة فى الحياة و فى السيارات وخصوصا سياراتنا النيسان عشان نفيد بعض باى تعديلات على عربيتنا