خلوا بالكو من محلات الكاوتشات في البنزينات!!!!!

**modo88** · 25-08-2010 09:27 AM

شكرا ياباشا ع النصيحه وفعلا اكترهم حراميه وبيحصل الموضوع دا كتير

**Hegazio** · 25-08-2010 09:43 AM

المشاركة الأصلية كتبت بواسطة marsguy

..لو قال لك: الكاوتش مهوي يا بيه

قول له: أيوه أنا عارف وسيبه وإمشي،

بالظبط كده

**msfahim** · 25-08-2010 12:26 PM

احذر من بنزينة اول عباس مدينة نصر ......نصًابين

**Adham** · 25-08-2010 12:34 PM

ماتتعاملش ابدا م بتاع كاوتش في محطة كلهم تقريبا كدة باستثناء واحد بس اللي شفتة محترم - عم جمال اللي في كالتكس اللي ورا السراج مول

و اوعي يقولك (و هوة بيكشف عالكاوتش) خش و لف الدركسيون يمين او شمال يا استاذ و بالذات لو هوة واقف بيشوف العجلة القدام يمين لانها الوحيدة اللي مش حاتشوفها في المرايات او من الشباك و انت قاعد في كرسي السواق

بيخليك تدخل العربية تلف الدركسيون

و بيخرم العجلة بمفك مسنون في ايدة, اللي بيركب بية الخوابير بتاعه اللحام

عملها معايا بتاع البنزينة اللي في الماظة قدام سينما الماظة من سنين

و خرم لي فردة كاوتش (و كنت لسة جايب الكاوتش في يومها) 3 اخرام

**tutankhamoun** · 25-08-2010 01:20 PM

حصلت معايا من 4 سنين .
دفعت 50 جنيه زي الباشا و مكونتش واخد بالي خالص ان الموضوع فيه نصب .

محطة توتال اللي في مخرج الدائري المتجهة للهرم عند مخرج المريوطية

**Eng_Mostafa_89** · 25-08-2010 10:26 PM

الموضوع دة بقى بيكرر كتير جدا الفترة الاخيرة دى

حسبنا الله ونعم الوكيل فى كل واحد معندهوش ضمير

**elfashn** · 26-08-2010 01:31 AM

خد الجديد

النهاردة بعد العشاء لاحظت ان عندى عجل مريح شوية فروحت اعمله عند بتاع الكاوتش الى جنبى وده راجل نضيف ومحترم المهم لقى مسمار واثناء ما بيعمل اللحام سألته عن خدع بتوع الكاوتش قعد يحكى فى كل الى اتذكر هنا فى الموضوع وبعدين حكالى على موقف مع واحد زبونه وهو نازل من الدائرى ماشى فى شارع النفق بتاع المريوطية وعند مطب موجود قبل مدرسة هناك لقى واحد كبير فى السن بيعدى الشارع وبيقوله الكاوتش مريح مفيش 20 م وكان فية واحد بتاع كاوتش دخل علية قاله 12 خرم واخد منه 125 ج المهم العربية كانت لسة جديدة والكاوتش ملحقش يمشى بية فراح لبتاع الكاوتش الى جنبى وحكاله على الى حصل بتاع الكاونش قاله الراجل الكبير ده هتلاقيه شغال مع المحل وعملو عليك شغل ولو مش مصدق روح ادام المحل من الناحية التانية وهتلاقى الراجل واقف هناك .فعلا الراجل ملى عربيتة رجاله وطلع على المحل ووقف ادامه لقى الراجل واقف بيعمل شغله نزل هو الرجاله الى معاه جابوه وراحو بيه على المحل ونزلو ضرب فى كل الناس الى شغالة فية واخد منهم 125 ج... الواحد مش مصدق الى بيحصل فى البلد والناس الى معندهاش ضمير وبتحب تاكل حرام