الموضوع: تحب تهدى أية لمصر و لتراب مصر

بسم الله الرحمن الرحيم
السلام عليكم ورحمة الله و بركاتة


الموضوع عجيب شوية للى يعرف المواضيع إلى أنا بعملها أو إلى يعرف دماغى عمتا بتبقى عامله أزاى تقدروا تقولوا أننا فى أغلب أوقاتى دماغى دى فى الترالالى
(منفض لكل حاجة يعنى)


بس موضوع إنهاردة بجد يختلف عن كل مواضيعى الموضوع دة أن كل واحد يدخل يرد يقول حاجة لمصر أو يهدى تراب مصر بحاجة (كلمة-يكتبلها شعر دماغة-أسم أغنية بيحس بيها- هكـــــذا)




أنا عارف ان الموضوع غريب شوية و أكيد إلى هيحس بيه ناس كتيرة برة مصر أو إلى مسافرين أو حتى إلى عايشين فيها عادى أو إلى جربوا البعد عن مصر و أهلهم و أعز أصحاب ليهم و إلى ساب زوجته و أولاده و إلى ساب والدته أو والده عشان يسافر برة ساعات أكيد بيبقى نفسه يصحى يبص من الشباك أو من البلكونة على الشارع بتاعة أو يصحى الصبح يلاقى والدته أو والدة أو زوجته أو ولادة بالهم بتاعهم أو بالفرحه بتاعتهم بأى وضع من الأوضاع المهم يكونوا أهله جمبه ساعة الشده أو ساعة الخنقه هيقدر يتكلم معاهم فى إلى بيحس بيه و حتى لو جواة كتم الخنقه بتاعتة على الأقل النظرة منهم هتخفف عنه كتير

بلدنا إلى أتحس بيها بترابها و بجوها و بدخانها و بحلوها و بمرها بشكل النيل و بجمال البحر و أوقات المصيف و أوقات الشتا و الرعد و كل يوم الصبح لما تنزل تقول لأبو محمد سلاموا عليكم و تحضن دة و تبوس دة و تسلم على كدة و تهزر مع دة (أطيب شعب فى الوجود) (خير جنود الله فى القتال)

الكورة جمعتنا و عرفتنا مين إلى معانا و مين إلى مش معانا يعنى من النهاية طلعتلنا مين إلى بيحقد علينا و فرح فينا و عرفتنا مين إلى بيحبنا و مين إلى جمبنا حسينا أن الموضوع سياسى مش كورة كأننا فى مخابرات بس مكانش حد يقدر يتكلم كلمة عن مصر و ساعتها ظهر حبنا لمصر و أفتخرنا أننا مصريين قولنا أحنا أسياد العرب قولنا أن العرب إلى معانا ليهم الفخر أننا منهم و لينا الفخر إنهم منا الأمهات فى مصر كانت بتبكى الشباب المصرى كان متعاطف و لا يسمح لأى مخلوق المساس بكلمة مصر البنات فى مصر بقيت تلبس طرحة مكونه من 3 طرح أحمر وأبيض و أسود بجد حسينا بشكل العلم بتاعنا و عرفنا الفرحه بعد كدة كل دة بسبب الكورة بجد شكرا للكورة إلى صحيت فى معظم الناس حب مصر

الحرب فى مصر و تاريخ الحرب أة كتير جدا مننا محضرش لكن سمع عن الحرب أو والدة كان بيحكيله أو عمه أو أى شخص بجد الناس كانت بتحب مصر أوى الناس كانت بتعيط من حبها لمصر كانوا زى الأسود بجد دافعوا عن شرف البلد دى و خلونا عايشين فى نعيم كبير و ريحونا و ريحوا الجيل إلى جاى الناس دى ماتت عشان أحنا نعيش أتجنوا عشان عقلنا يفكر فى التطور عجزوا عشان أحنا صحتنا تبقى أحسن أتعموا عشان أحنا نشوف الطريق الصح إلى نمشى فيه بجد كل تقديرى لأبطال الحرب و أبطال مصر و كل من شارك فى تحرير رمل أو تراب مصر كل دة بيخلينى أرفع راسى و أفتخر و أقول أنا مصرى بكل فخر

عملنا للعرب كلهم كيان فى عهد عبد الناصر و حتى الأن فى عهد حسنى مبارك و دا مش تقليل ليهم بالعكس دا فخر ليهم و لينا أننا كنا أيد واحدة و الربطة دى هتيجى مع الوقت إن شاء الله و مصر كانت دايما الزعامه العربيه و الأسلاميه فى أفريقيا أحنا دافعنا عن الإسلام فى الصومال و دلوقتى جزائنا أنهم يخطفوا مراكبنا و أولادنا للأسف أعمل خير و أرميه فى البحر مع المركب إلى القراصنه هيهجموا عليها
مش أمريكا ولا أنجلترا ولا أيطاليا ولا ألمانيا أفضل مننا فأى حاجة أحنا دايما أفضل أحنا من أيام الفراعنه حتى الأن أفضل مش أفضل فى الأقتصاد ولا فى التجارة ولا فى الطرق ولا فى السيارات ولا فى الأنتاج بس أحنا أفضل بشهادة (القران الكريم و سيدنا محمد عليه الصلاة والسلام) و إلى يوم الدين أحنا أفضل و أحنا الأمن و السلام

فتره الجيش إلى كله بيقول يا عم أنا هتعطل و مش بنحس بأنه واجب و شرف أة أحنا للأسف كلنا ممكن ننتقد البلد و ساعات بنيجى عليها و بجد أحنا مديونين لمصر و لأرضها و ساعات بنهزر ونقول يا عم جيش مين و بتاع أية بس أنا عارف أن كل إلى فى الجيش ساعة الجد هيحسوا بالفرق أحنا يمكن عشان شعب طيب و بيحب الهزار يمكن أخدين كل حاجة فى حياتنا هزار حتى حبنا لأى شئ أنا عارف أن كل عسكرى أسكندرانى أو من القاهرة من المنوفية أو الأسماعيليه الصعيد و المنصورة و الفلاحين و العمال و إلى واقف و تعبان فى خدمته نفسه دلوقتى يحارب عدوه نفسه يمسك سلاح فأيده و يقتل إلى قتل المصريين فى النكسه أو فى تحرير سينا أو قتله حدود رفح أنا عارف أن أحنا كلنا نفسنا نمسك سلاح و نفسنا نحارب أعداء الأسلام و أعداء مصر إلى عاملين نفسهم أهل السلام و هما أهل النفاق و الكدب و دا إلى بيخلينى أفخر أننا مصرى

بعد كل دة بنبعد عن البلد و نكبر و نخلص الجيش و أحنا فخورين و أتعلمنا منه أننا أسياد العرب و أحنا خير شعب فى العالم و أقوى شعب فى العالم بلا فخر بشهادة القران أو حتى لو مبعدناش برضة فيه كلام كتير عايزين نقولة لمصر عايزين نعبر عن حبها لكن مش عارفين مهما أتقال فى أغانى مش هنقدر برضة نقول أى شئ جوانا من إلى بنحسه ساعة الجد بزمتكم أى حد سافر برة مصر عينه دى مدمعتش قبل كدة عشان بعيد عن أهله و عن ناسه و عن وطنه ؟
بزمتكم بتحسوا بأية ساعة كلمة مصر ماتتقال و أنت فى الغربة ؟ سواء فى خير أو فى شر
بزمتكم لما بتسمعوا أغنية يا حبيبى يا مصر بتاعة شاديه أو أغنية أة يا غاليه بتاعة هشام عباس عنيكم بتبقى عاملة أزاى ؟ تفكيرهم بيبقى عامل أزاى ؟ بتحسوا أن قلبكم بيعمل أزاى ؟
حب مصر دا جوة دمنا بجد أحنا بنتولد بيه


بصراحه أنا مش عارف أكتب و أقول أية أنا عايز أسيب ليكم كل التعليقات
تحب تقول أية لمصر أو تهديها أية ؟

واضح أن أسم المنتدى غلطة كبيرة مع أحترامى للإدارة و المنتدى بأكمله بس بدل كلمة نايل موتورز ممكن نخليها أورشاليم موتورز
و مع احترامى لكل إلى ردوا
دى مجرد وجهة نظر بعد الردود دى