الموضوع: الخفايا المبهمه و دليل نجوم الرمرمه, فاست فود نايل موتورز!!!

يخرب عقلك يا شنوري فتحت نفسي لايام الرمرمة من تاني لاني كنت نسيتها من ساعة ما اتجوزت و بقيت رمرام من نوعية اكتو كده يعني مؤمن و كووك دوور و تشليز - اصل الرمرمة برضه مسئولية يا شنوري عشان لما يبقي عندك اجيال بتربيها لازم تعلمهم الرمرمة بالتدريج يعني مش معقول حاخد مازن اللي عنده 8 سنين و أوديه عند عبده النتن اللي انا كنت من مدمينينه و علي فكرة سر عبده النتن في المرمرمين اللي بياكلوا عنده بصراحة شكلهم و هما بيرمرموا يفتح نفس الواحد و تبقي رايح تضربلك ساندويتشين تلاقي نفسك دخلت عشرة او خمساشر من شكل المرمرمين
و ازاي يا شنوري تنسي جيمي اللي في كليوباترا ده رهيب و ده الوحيد اللي مراتي معترفة بيه من مطاعم الرمرمة ده كفاية ساندويتش (.....*) المشوية اللي عنده مالوش حل ولا الكبده المشوية رهيبة
مرة كنت عنده و مراتي كانت في المتستشفي بتولد مالك و بايتة في المستشفي و كان مازن عنده 4 سنين و الواد مش عايز يبات عند اي تيته من تيتاته و اصر انه يبات معايا فطلعنا من المستشفي و قولت له حعشيك بقي عشوة يا مازن حتعجبك قوي و روحنا عند جيمي و ضربنا بتاع 15 ساندويتش ضربت انا منهم 5 ساندويتشات (.....*) من اللي انت عارفه و الباقي كبده و لحمة و روحنا علي البيت بعد ما ضربنا الكانز و كانت ليلة ما انسهاش الواد مازن يا حبة عيني ما استحملش و جاب كل اللي في بطنه و احتست بيه حوسة ..المهم الواد بعد ما فاق قالي يا بابا مافيش ساندويتش كبده فاضل
بس بصراحة و الحق يتقال ان التلوث و الرمرمة في مصر ( القاهرة) اجمد و اشد لاني علي فكرة رمرمت في مصر كتير من اول فرع لمؤمن اللي في جسر السويس سنة 90 لغاية واحد كان في مدينة نصر في الحي السابع كشك كده بتاع ساندويتشات مش فاكر اسمه كان اول من اخترع السكلانس و ده كان عبارة عن ساندويتش حلاوة بالقشطة بالمربي بالعسل بالكريمة بس مالوش حل و كمان كان فيه واحد في مصر الجديدة قرب مول الحرية بس ده كان حلواني انما كان تحفة برضه يعمل كنافة بالبسبوسة باللبن و القشطة و المكسرات
و طبعا الركيب ما يتنساش بتاع الكوارع و الكرشة و الممبار و الفشة بس انا ماليش في الفشة اللي في السيدة زينب
يعني في مصر رمرمة اصلي بصراحة و اكل يكيفك بجد
انا عايزك يا شنوري تفتح معهد لاعداد المرمرمين من الاجيال الجديدة وحبقي ابعتلك مازن و مالك عشان تأسسهم صح زي ما اتأسسنا كده لاني عندي رقابة طاغية في البيت منعاني من ممارسة اي رمرمة و بصراحة الواحد فعلا صحته اتدهورت من اكل البيت و المطاعم الخمس نجوم و بقي كل لما يحن لاكلة من حودة جندل او عبده النتن ما يقدرش يكملها ..قال ايه قرفان...
ده انا كنت لسه في حلقة السمك اللي في النايل سيتي اللي في الزمالك علي الكورنيش انا و العيال واكلين اكلة سمك و جمبري و بدون حلو و الفاتورة 700 جنيه - حرااام ده و لا حلال

المشاركة الأصلية كتبت بواسطة human12

او من الراجل الجبار بتاع الحواوشى اللى فى الاول من ناحيه دار القضاء العالى

شلبي؟