احساس بالاحباط

**Abdallah** · 21-05-2007 03:47 PM

ينتابنى احساس وشعور عارم بالاحباط كلما اخرج الى الشارع ولا اعرف لماذا, عندما ارى عسكرى المرور النائم فى عز الظهر اشعر بالاحباط, عندما ارى العربات الكارو بحميرها القائدة والمنقادة ترمح كما السيل فى ارجاء البسيطة اشعر بالاحباط, كلما ارى طفل يشحذ ويتعلق برجل بنطلونى قائلا "ربع جنيه لبويا هيضربنى " اشعر بالاحباط, عندما اذهب الى اى مصلحة حكومية محاولا قضاء بعض المصالح اشعر بالاحباط, عندما اذهب للسوبر ماركت وارى السرقة عينى عينك والمغالاة فى الاسعار اشعر بالاحباط, عندما اشترى بعض الاشياء للعشاء ولا تتعدى بضع قطع من الجبن بانواعة وعيش وما شابه وارى الورقة ذات المائة لحلوح تتهادى من جيبى الى خزينة الماركت اشعر بالاحباط, عندما اقف عند اى صنايعى لاصلح سيارتى وارى مقدار العك الذى يحدث وعندما يغلق الكبوت ينتابنى احساس ما بان هذه السيارة ترغب فى البصق على اشعر بالاحباط, انا فعلا اشعر بالاحباط ولا ادرى شيئا يخرجنى من هذا الاحباط , انه اليأس ولا شىء سواه’ اليأس من ان اعيش اليوم الذى استمتع فيه ببدلى التى اعشق ترابها بدون احباط او بدون ان اكره نزول الشارع, والله انى لا ادرى ماذا اصبنى ولكنى اشعر بيأس واحباط جاثم على نفسى ولا استطيع التنفس منه, عذرا يا اخوانى اذا كنت اضعت وقتكم ولكنى كنت احاول اخراج ما بداخلى من شحنات وهذه هديتى لكم بعض الابيات لشاعر لا اعرف من هوا ولكن كل ما اعرفه انه مصرى مثلى ومثلكم.
جمل حداه الم تحت الحمل مدارى....
لا الجمل بيقول اه ولا الجمال بيه دارى....
دارى على بلوتك يالى ابليت دارى....
وعجبى.

**محمد المشد** · 21-05-2007 03:52 PM

ربنا ينتقم من اللى جابو لك ولغيرك الاحباط واليأس ولكن تمسك بالامل فى الله وسوف ننتشل من هذا الاحباط واليأس بأرادتنا وعزيمتنا وربنا يخلصنا ممن كان السبب !

**وائل عطية** · 21-05-2007 03:54 PM

يا أستاذ عبدالله
بكلامك السابق، أستطيع منحك لقب " المتحدث الرسمى باسم الشعب المصري " !!!

**Dr Ahmed** · 21-05-2007 03:58 PM

معقولة يا أستاذ عبد الله.. دنا كنت متخيلك رايق جدا ...

عموما همومك همومى وهموم كل واحد لسه حى..

لكن ممكن تصبر لو عرفت ان فيه ناس كتير جدا تتمنى تعانى معاناتك .. ناس ممكن تكون بتاكل مرة واحدة فى اليوم أو عايشة وسط المقابر أو عايشين بعاهة أو مرض عضال.. الحمد لله ان همومنا من النوع ده ...

واللى يصبرك ويهون عليك أكتر إن كل ده فى الآخر = صفر
يعنى زى ما واحد من اخواننا كاتب فى توقيعه: ما العيش إلا عيش الآخرة .. هى دى اللى نحاول نبنيها ، لأن مهما طال بينا القعاد هنا سواء هم ولا من غير هم ماشيين ماشيين .. المهم هنمشى نروح فين..

**sh_masry** · 21-05-2007 04:18 PM

ايه يا عبود .... يعنى هى ناقصه ...... هو ده اللى بيقول عليه ريكو:

انا جالى يا ناس احباط ...... كده كده من تحت الباط !! هههههههه

انت ركبت اوتوبيس عام النهارده وللا ايه ؟

روق يا باشا و ماتشلش هم ...... الا بالمناسبه هى الورقه ذات مائه لحلوح دى شكلها ايه ...........يا بختك يا عم انت شفتها .هههههههههه

a7'ook
Sherif

**Ahmed Hassan** · 21-05-2007 04:30 PM

دي يا شريف (على حسب ما سمعت) ورقه ممكن زي ما عبدالله قالك كده تجيب بيها جبن للعشاء!!!
أو لو بتسيب تنك عربيتك يفضى للآخر.. و كنت اقطاعي بتحط بنزين 92 الورقه دي تتفرتك منك. و الله اعلم

**Abdallah** · 21-05-2007 08:05 PM

المشاركة الأصلية كتبت بواسطة Dr Ahmed

معقولة يا أستاذ عبد الله.. دنا كنت متخيلك رايق جدا .....

ههههههههههه يا دكتور و لا تحسبن رقصى بينكم طربا فالطير يرقص مذبوحا من الالم

المشاركة الأصلية كتبت بواسطة sh_elmasry

انت ركبت اوتوبيس عام النهارده وللا ايه ؟

لا والله يا شريف بس زى ما تقول كدة الواحد بيفضل يحوش جواه لحد ما يفرقع زى البالونة
وعلى راى احمد حسن فكك من ال 100 لحلوح وخليك فى البنزين الى هيغلوه وهيخربوا بيتنا بزيادة :D

المشاركة الأصلية كتبت بواسطة وائل عطية

بكلامك السابق، أستطيع منحك لقب " المتحدث الرسمى باسم الشعب المصري

وهوا فين الشعب المصرى دة يا وائل؟؟؟ جايز بتتكلم على شعب المملكة المتباركة :D

شكرا ليكم يا جماعة وشكرا على مشاعركم النبيلة ناحية انسان يائس مثلى واتمنى لكم كل الخير.

**sh_masry** · 21-05-2007 08:34 PM

عبدالله كتب:

شكرا ليكم يا جماعة وشكرا على مشاعركم النبيلة ناحية انسان يائس مثلى واتمنى لكم كل الخير.

يائس ايه يا عم امال انا اعمل ايه بقى و شركتى اللى بشتغل فيها هاتقفل اول الشهر و لسه متجوز جديد .... و مش عارف هاجيب اشتراك النت منين علشان اشوفكم كل يوم كده ههههههههه
يا عم سيبها على الله و هتحلو (مش قوى) بس هاتتظبط (مش قوى) و هاتبقى زى الفل(و يمكن برده مش قوى) بس هاتمشى (يمكن تقف) بس مش مشكله اهه تقف كويسه برده ... ههههههههه و كله على الله .
a7'ook المتفائل (بس برده مش قوى)
sherif

**Abdallah** · 21-05-2007 09:08 PM

يا اخى حرام عليكم انت عامل زى الى داخل يعزى فى ميت ويقولهم اعاده الله عليكم باليمن والبركات :D
انت فاكر الفخرانى فى فيلم الكيف, كان بيقول الجو منعش وجميل, انا فى غاية السعادة....