الموضوع: محتار بين الكيا نيو سيراتو والمازدا 3 واللانسر شارك

بص هي المازدا3 أفضل من الأتنين دول بكتير مع تحفظي على الشكل الجديد لأنه مش عاجبني وكمان كتير عليه سعره .. يعني رأيي لو لقيت الشكل القديم يبقى تمام .. لو ملقيتش ممكن أقترح عليه أقتراح غير التلاتة...وهو الليون 2010 اوتوماتيك dsg عربية ممتازة ولو كان فيه منها أوتوماتيك ساعة ما جبت المازدا كنت جبتها بدون تردد ..وربنا يوفقك للصالح

المشاركة الأصلية كتبت بواسطة delpo

كلام منطقي واضح ان السيراتو فعا زي ما قالولي ماشاء الله ممتازة بس ياريت من تجربتك بأمانة تقولي اخبار التسارع والثبات فيها

بص بخصوص التسارع العربيه تسارعها جامد جدا جدا خصوصا لو فتحت المتور صح
الفتيس سريع الاستجابه والتسارع تقريبا على كل السرعات ممتاز
بخصوص الثبات أنا معظم مشيى مدن أقصى سرعه أجبها جوه المدينه بتاع 100 وطبعا ثبات خرافى
فرصه الجرى الوحيده على مصر السويس تقريبا أعلى سرعه جبتها فى يوم غبى كانت 150 وحصلى موقف حكيته قبل كده ولا داعى للتكرار مفاده أن العربيه دى عليها فرامل وثبات ساعه الفرامل تحسد عليهم والحمد لله هى كانت سبب بعد الله سبحانه وتعالى أنى عايش
فهى ثبات ممتاز حتى ال150 بعد كده أنا مجربتش غير مره واحده ساعه التفتيح بس كنت فى خط مستقيم فطبعا لا حكم على الثبات فى موقف زى دا
بص أنا حاسس بيك وبالحيره لأنى عيشتها
مش عايز أقولك متعتمدش علينا أوى علشان مقللش من عمالقه فى المنتدى
لكن لو 10 كلموك ساعات منهم 6 متحيزين أو مرددين أو مش فاهمين أو حاقدين أى حاجه فيها ييين :))
أهم حاجه لو بتفكر فى 4 عربيات مثلا تنزل تتفرج وتركب الاربعه وتستخير ربنا وتتوكل عليه
بخصوص العضو الى بينصحك بموضوع أحذروا النيو سيراتو من مشاركاته نعرف أنه جديد ونعذر عدم معرفته بالواقعه
فى أكتر من 50 عضو مالك للنيو سيراتو فى قسم كيا تقدر تدخل وتستفسر عن أى شىء أنتعايز تعرفه عن العربيه
الاعضاء هناك كلهم بلا أستثناء معاونين جدا جدا
كذلك فى مازدا تقدر تستفسر منهم
طويلت عليك المهم ربنا معاك ويهديك للى فيه الخير

طبعاً العبد لله شهادته هتبقى مجروحه لو اتكلمت و قلت رأي... بس أنا هقول و رزقي على الله

مبدئيا احنا لازم نحط في الحسبان انك كنت راكب كورولا...

أولا: مش هتحس بأي فرق بين موتور الكورولا, و موتور السيراتو, لأنه بجد قوي جداا
و الجير بوكس ناعم و سحبه ممتاز, و الموتور لما بيتفتح زي ما قال نورمال بيبقى رائع

ثانيا: هتحس بفرق (ملحوظ) جوه العربيه, يعني في فرق بين خامات الكورولا, و خامات السيراتو
لصالح الكورولا بكل أمانه.... و بردو انت اللي تجرب و تحكم...

ثالثا: هتحس بفرق (ملحوظ) في النعومه في العربيه, و الراحه في القياده لصالح الكورولا

رابعا: هتلاقي كماليات السيراتو اكتر من الكورولا, ده لصالح السيراتو

خامسا: الثبات... الاثنين من الاخر كده مش عاجبني ثباتهم بكل صراحه و لو ان الكورولا اثبت
من السيراتو شويه, لكن بردو الاثنين عندي واحد... و انا قلت الموضوع ده قبل كده و لخصته في...

(( نظام تعليق خلفي تورشن بيم + عربيه سيدان + مافيش esp )) ماتلزمنيييش حتى لو ألماني...

يعني و باختصار تام, انت اللي تحدد الفروق دي لصالح و ضد كل عربيه هتفرق معاك ولا لأ
و عليه هتقدر تحدد انت عايز ايه و ايه اللي يناسبك منهم...

مش هتكلم عن المازدا بالتفصيل لأن معلوماتي عن الشكل الجديد مش كتير (عمليا) لكن نظريا شغال
و بردو كأداء, و جوده (نظريا) المازدا 3 هي الأقرب للكورولا, يعني مش هتحس بفرق

اللانسر الشارك في رأي ممتازه, لكن يعيبها موتورها الضعيف في السحب و التجميع...
لكن شكل داخلي, و شياكه, هي عاجباني و جميله جداا, و ثباتها ممتاز...
بس الموتور فعلا ضعيف و ده رأي فيها و تحفظي الوحيد عليها...

بس بردو ده مش معناه ان المازدا او الشارك هما او احدهما هي الاختيار الأنسب...
اركب السيراتو, و اركب المازدا و اوكب الشارك و قرر

و بالمناسبه السعيده دي... احب اقولك ان أنا صاحب موضوع (للأسف... احذروا من النيوسيراتو)
و انا اللي عملت الحادثه و اتقلبت, لو ماتعرفش الموضوع يعني يا باشا...

أنا قلت اللي في ضميري و رأي بكل صراحه و رزقي على الله... و ربنا يوفقك للخير