محتار بين الكيا نيو سيراتو والمازدا 3 واللانسر شارك

**delpo** · 21-04-2010 12:24 PM

[overline]قدر الله وما شاء فعل .. بعد ما عملت حادث بعربيتي الكورولا فكرت اشتري كورولا تاني لان بصراحة العربية دي خرافة فوق الوصف لكن زوجتي اتعقدت من العربية ومصرة نغير النوع .. الحمد لله على كل شيء.
أنا منتظر من حضراتكو المشورة في الإختيار بين النيو سيراتو والمازدا 3 واللانسر شارك أعلى فئة فيهم كلهم, ياريت ماتبخلوش عليا في نصايحكو بموضوعية ودون تحيز لأصحاب أي من السيارات التلاتة زي ما انا طول عمري كنت بشجع الناس تجيب كورولا لوجه الله وللأمانة ولازلت لأنها فعلا مافيش زيها.
أنا مش مهم قوي عندي حجم الكنبة الخلفية لكن مهم عندي التسارع والثبات وقطع الغيار وسعر إعادة البيع ياريت تقولولي أي واحدة فيم أقرب للمواصفات الي انا عايزها.
منتظر ردود حضراتكو بفارغ الصبر مع الذكر السبب ياريت بلاش نكتب طبعا شارك على سبيل المثال بدون ذكر السبب
ملاحظة: العربيات كلها موديل 2010 أعلى فئة موجودة
وتقبلوا خالص تحياتي[/overline]

**ldsaklf** · 21-04-2010 12:56 PM

عايز الحق بعد الكورولا مش هتعرف تركب حاجة من التلاتة دول ولو ان الشارك افضلهم

**delpo** · 21-04-2010 01:13 PM

انا قصدي السيراتو الأخيرة الشكل الجديد 2010

طب اعمل ايه تنصحني اجيب اي ؟

**mangere90** · 21-04-2010 01:44 PM

السلام عليكم ورحمة الله وبركاته

ماذا 3 طبعا ياباشا وبدون تحيز انا لا امتلك هذه السياره بس السياره دي فوق الوصف
وانا في رأي ولا لانسر ولا سيراتو حتي لما توصل ل 2020 حتي مافيش مقارنه ياباشا

**محمد عز** · 21-04-2010 01:57 PM

اخى العزيز

حسب الاسعار من موقع كونتكت

السيراتو الهاى لاين

ب 126 الف

المازدا 3 الجديدة الهاى لاين حسب الشباب فى قسم مازدا

ب 160 ل 170 الف

الشارك الهاى لاين

ب 142 الف موديل 2009 حسب كلام المهندس طارق واكيد فيه 2010 خليجى وهتلاقيه فى الحدود ده

طبعا انت اهم حاجة عندك الثبات وسعر اعادة البيع

اظن الثبات كويس فى ال 3 عربيات

واظن ان الشارك والسيراتو فى نقطه اعادة البيع احسن من المازدا 3

لكن كجوده وقيمة المازدا تتفوق

الفروق بيت التلات عربيات فى السعر كبيره واكيد ميزانيتك هى اللى تحدد فى الاخر

توكيل كيا سيراتو يعتبر الافضل حتى الان

توكيل مازدا غبور ولسه هيفتح

توكيل مستوبيشى هيتسحب منه ومن المتوقع مشاكل مستقبليه

الحقيقة انا لو مكانك

هختار الشارك الفول اوبشن سبورت لعده اسباب

يابانى وثقتى فيها اعلى من السيراتو
عربيه اتجربت ومطلعش فيها مشاكل
شكلها شبابى وظريف
الانتيريور بتاعها شيك وظريف
ممكن عمل الصيانة خارج التوكيل

طبعا المازدا غاليه بس تعتبر احسن من الشارك

استخير واتفرج على كل عربيه واقعد فى كل واحدة وانت اكيد اللى هتقرر فى الاخر

وبص بصه على الرينو فلونس ( بس الله اعلم بسعر اعادة البيع وفى الغالب هتبقى زى الميجان)

وشوف ال بيجو 308

بس بس حدد الميزانيه وهتلاقى الاختيارات انحصرت

**delpo** · 21-04-2010 01:59 PM

ليه المازدا 3 تزيد على الإتنين التانيين في ايه ؟

**delpo** · 21-04-2010 02:02 PM

استاذ محمد حضرتك شكرا على ردك المفصل. بس الحقيقة انا دياما بحب اتعامل مع التوكيل وحضرتك بتكول الشارك في مشاكل في التوكيل, والمشكلة في المازدا 3 انها محدش جربها كتير ومعرفناش عيوبها بعد مسافات طويلة, السيراتو انا شايف الكل متفق انها ممتازة بس هل فعلا عمرها الإفتراضي قليل لأني مش ناوي أغير غير بعد 5 سنين انشاء الله

**romeo_6887** · 21-04-2010 03:19 PM

طبعا هنطلع المازدا من المقارنه لان ملهاش توكيل في مصر تقريبا او ليها توكيل مركز بس في الهيونداي فبلاش منها عشان هتغلب في موضوع قطع الغيار بعدين و كمان سعرها واقع في اعاده البيع

و برضه هنطلع الشارك من المقارنه لان توكيلها مش تمام و كمان مفيش منها 2010 و برضه سعرها واقع في اعاده البيع

فالسيراتو هي الاختيار الافضل كسياره و توكيل و كل حاجه

**NoRmAl** · 21-04-2010 03:27 PM

طيب
أولا ربنا يعوض عليك فى الكرولا ولاونها متأخره
فى نقطه أنت غافلها
الشارك مفيش منها 2010 أساساً أخر حاجه 2009 مش عارف ماشيه معاك ولا لأ
ثانيا فرق السعر بين التلت عربيات رهيب فى أعلى فئه والكماليات فى صالح السيراتو
سعر أعاده البيع بردو فى صاله السيراتو الى أكيد أكيد أكيد هتعرف تعد معاك 5 سنين دى مش عربيه لعبه يعنى :)))
بص أنا لو منك هفكر فى السيراتو أو المازدا
فكك من الشارك علشان توكيلها ربنا أعلم بمصيره...مفيش 2010...ملاكها برا المنتدى بيقولو متورها مش قد كده
المازدا أفضل من السيراتو لكن أغلى التنين وأقل فى الكماليات وتوكيلها مش بقوه كيا وسعر أعاده البيع بتعها ميحصلش كيا
لكن الامر راجع ليك
فكر سيراتو ولا مازدا
وربنا معاك

**delpo** · 21-04-2010 05:39 PM

المشاركة الأصلية كتبت بواسطة romeo_6887

طبعا هنطلع المازدا من المقارنه لان ملهاش توكيل في مصر تقريبا او ليها توكيل مركز بس في الهيونداي فبلاش منها عشان هتغلب في موضوع قطع الغيار بعدين و كمان سعرها واقع في اعاده البيع

و برضه هنطلع الشارك من المقارنه لان توكيلها مش تمام و كمان مفيش منها 2010 و برضه سعرها واقع في اعاده البيع

فالسيراتو هي الاختيار الافضل كسياره و توكيل و كل حاجه

انا بقول كده بس انا خايف من موضوع الثبات والتسارع لان في ناس قالولي الثبات بتاع السيراتو بعد ال140 مش مضمون والتسارع كمان ان العربية اتقل من الالنترا وبالتالي تسارع اقل منها لانهم نفس الموتور تقريبا هل ده صحيح ؟