الموضوع: لوجان بعد سنة 3 شهور دراسة

الحمد لله ربنا وفقنى بعد دراسة اقتربت من سنة ونصف واستلمت امباح اللوجان ..
جبتها فضى لأن الأنطباعات الأولى تدوم .. وانا حبيت لوجى من اول نظرة لما قريت التقرير الكامل المصور بتاع استاذ نادر وكانت لونها فضى ..
وكان يوم الأستلام جميل وتم بسلاسة .. بعد ما كنت متنشن على الآخر وواخد معايا كشف الأستلام علشان اطمن على كل كبيرة وصغيرة وكنت فاكر انى هاستلم فى ساعتين .. لكن فى الحقيقة الأستلام تو فى 10 دقايق .. يعنى كنا متفقين على ميعاد الأستلام الساعة 6 ، الساعة 6.15 كنت طالع بالعربية
الأستلام نفسة ما اخدتش 3 دقايق عبارة عن جولة حول السيارة ثم فتح كبوت وشنطة السيارة بعدها دخلت جواها وركب جنبى مهندس يشرحلى تابلوه العربية لكنى فاجأته بأنى عارف كل كبيرة وصغيرة والنكتة انى انا اللى ابتديت اقوله على معلومات جديدة عليه ههههههههههههه
وقطعت الأستغراب بتاعه ده وقولتله اصل انا من نايل موتورز وبقالى اكتر من سنة بقرا عن اللوجان فضحك وقالى اه انتو بقا اللى بتمسكوا العربيات وتفلوها .. قلتله اينعم وبنطلع فيها القطط الفاطسة كمان ..
ودخلت مضيت على الأستلام ولما خرجت كان العامل لمعها تمام فركبتها وطلعت على البيت وما ركزتش بصراحة ان فيه هزه فى الفتيس ولا الدواسة تقريباً ما حستش بيهم
لأنى كنت مركز فى المرايات ... ولكن اللى يخاف من العفريت يطلعله .. لقيت واحد ابن حلال طاير بالموتسكل بتاعه من جنبى واخد معاه المرايه اليمين ولكنها راحت ورجعت مكانها تانى فانبسطت بصراحة منها وعرفت هما ليه عملوها بسوستة ..

غير انى ملاحظ ان موتورها خشن شوية والسحب حلو بس ما رضاش غرورى لكن قولت يمكن علشان لسه فى التليين والعربيه يا دوب عاملة 9 كم ..
وجاتلى فكرة مجنونة انى اجيب انبوبتين امير وافضيهم حوالين علامة رينو الأمامية والخلفية علشان ما يتسرقوش ولكن صديق لى خوفنى وقالى هيكسرولك الشبكة وهتخسر العلامة والشبكة كمان
وبوجه عام السيارة فعلاً ممتازة وتستاهل اكترمن تمنها ..
واحب اشكر كل الناس الحلوه بجد اللى ساهمت فى قرار شراء اللوجان بتقيماتهم وارائهم الصادقة .. حبايبى اعضاء قسم رينو المحترم ..

الف مليون مبروك على الجميلة لوجى وربنا يباركلك فيها ويعطيك خيرها