الموضوع: هل تؤيد أنتقال التوكيل من الرواس أم لا

المشاركة الأصلية كتبت بواسطة ahmed-moga

هقول لحضرتك ليه ياأستاذ أحمد بس عن نفسي فقط

أولا التوكيل الحالي بقاله 28 سنه بيتعامل مع شركة متسوبيشي فبالتالي عنده درايه كافيه بمجريات الأمور مع الشركه الأم

ثانيا عنده مهندسين أكفاء تلقوا دورات تدريبيه علي أعلي مستوي من الشركه الأم

ثالثا الوكيل الجديد سيضطر اللي فتح أفرع لتوكيله في أكثر من مكان وهذا سيستغرق وقت غير نظيره

الحالي اللي الأماكن موجوده ومفتوحه بالفعل وبالتالي فالوكيل الجديد سيستغرق وقت ليس بقصير

لتجهيز أماكن الصيانه وقطع الغيار ومعارض البيع طيب في الوقت ده لو سيارتنا محتاجه صيانه

ضروريه و فوريه ولازمه مين اللي هيعملهنا هنجازف ونوديها لأي ميكانيكي غير مؤهل ويستحيل

الوكيل الجديد هيعمل كوبي وبست لجميع العامليين والمهندسين للوكيل الأول

دية كانت وجهة نظري في رفض أنتقال الوكاله لوكيل آخر ومتهيألي لو الرواس صحح أوضاعه

مع الشركه الأم فهيبقي موضوع سحب الوكاله زي قرصة ودن وهنلاقي أختلاف شاسع في

الفتره الجايه من حيث الأسعار وجودة حالة مراكز الصيانه والمبيعات وأضافة تكنولوجيا جديده

وأوبشن زياده علي جميع السيارات

خلينا نرد على كل نقطه لوحدها

1 - الفتره اللى التوكيل كان معاه الماركه فيها لا تشفع له اطلاقا فى قتله لأسم ميتسوبيشى فى الفتره الاخيره , العربيه عماله تتباع من غير دعايا ولا اى حاجه وموديل قديم هو الحصان الرابح فى السوق والشركه اللى عنده اكتر من 5 عربيات تناسب السوق مش شايفين منها ولا عربيه جديده وعايشين على القديم

تقدر تقولى عمرك شوفت اعلان محترم يشد للشارك ؟ , عمرك سمعت عن ايفنت لميتسوبيشى ؟ , مؤتمر صحفى ؟ , حمله خصم على قطع الغيار وصيانه مجانى ؟ ( الوحيده اللى شوفتها كان فى مركز مهجور وعايزين يشغلوه ) , يا راجل ده مدخل الفرع الرئيسى بتاعهم مش هاين عليهم يسفلتوه ده غير المركز نفسه من جوا اللى المبنى بتاعه ولا كأنك داخل بلوك فى الحرفيين والورش شكلها يقرف والباب هنبوس رجلهم علشان يفتحوه

وحط على كل ده لسه مسمعوش عن موضوع انك تحجز قبل ما تروح ده , انا سألت كذا مره عن الحجز وقالولى مفيش حجز تبقى تيجى بدرى , اللى يلحق يعنى

حضرتك لو روحت الصيانه كدا فى يوم عادى من غير ما تعدى على البشمهندس طارق ربنا يبارك فى صحته ويجعله فى ميزان حسناته لوقفته مع اعضاء المنتدى فى الصيانه والمجهود الكبير اللى بيعمله كنت هتشوف معامله فى التوكيل صدقنى زباله زباله لأبعد الحدود

انا قبل ما اتعرف على البشمهندس طارق عملت صيانه الاربعين فى التوكيل ومش عايز اقولك اتعمل معاى ايه يومها

يعنى احنا بنتكلم فى توكيل فاشل دعايا , فاشل تسويق , فاشل خدمه عملاء , فاشل حتى فى تحسين صوره الشركه الام يبقى ايه تانى يشفع له ؟

التعامل مع الشركه الام مش صعب علشان بيتكلمو يابانى :) , هو زى اى بيزنس اى حد بيتعامل مع اى حد مش محتاجه سابق معرفه ولا خبره

2 - ايه الكفاءه فى مهندسين الرواس ؟؟ , زيهم زى اى مهندسين فى اى مركز وغيرهم الالاف على قائمه الانتظار للعمل , ونرجع ونقول الوكيل الجديد 90% بياخد طقم العمل للوكيل القديم كما هو ويغير منه ما يلزم يعنى الموضوع مش صعب ده بجانب ان العربيات الميتسوبيشى مش معقده ولا صعبه والدورات بتاعت التدريب مش بتاخد سنين

3 - قبل ما الشركه تتخلى عن وكيلها بيبقى فى دراسات كبيره والموضوع مش سهل , يعنى مش فى يوم وليله بيقول هسيب الوكيل ويدور على حد جديد

الشركه عارفه طبيعه الدنيا هنا وشكل الاستثمارات والوكيل الجديد هيجهز فى قد ايه وفتره نقل الوكاله هتاخد ايه بحيث ميبقاش فى يوم واقع بين الوكيل ده وده واللى هيمضى عقد الوكاله هو الاسرع فى التجهيز

احنا محتاجين وكيل جديد , زى ما بندفع دم قلبنا فى الصيانه نلاقى مكان نضيف وخدمه محترمه وعاملين كويسين مش مهندسين بيتكلمو معانا بقرف والعربيه تخلص وتترمى كلها شحم وتراب فى الشمس وادور انا على حد يقولى ايه اللى حصل ملاقيش واجرى يمين وشمال علشان ادفع واخرجها , محتاجين حد يحسسنا ان الشركه موجوده كدا بدعايا وعروض ويعيشنا مجتمع ميتسوبيشى دى , محتاجين حد يورينا بقا حاجه غير البومه , محتاجين حد يرجع ميتسوبيشى فى الرف الاولانى بدل ما الشركه فى مصر اتشالت فى وسط الكراكيب اللى جنب الدولاب

المشاركة الأصلية كتبت بواسطة ahmed-moga

كيمو باشا أذي معاليك بقالي كتير ماتشرفتش بمشاركتك لموضعاتي

أنا مع حضرتك في رأيك بس فيه نقطه صغيره لو واحد معاه عربيه لسه في الضمان من 2008 أو

2009 او 2010 اللي نزلوا في سعرها دلوقتي علشان يخلصوا المخزون بتاعها هيكون ايه العمل

هتضطر تستني ولا هاتتصرف بمعرفتك وهيكون الوضع ايه مع الوكيل الجديد لو أتصرفت بمعرفتك

أو رحت للوكيل القديم هل الضمان هيسقط في تلك الحاله ام سيستمر

يا باشا نظام عمل الضمان كالاتى , الوكيل بيغير لك القطعه ويحاسب عليها الشركه الام فبالتالى هو مش خسران ولا جنيه , بالعكس ده هيكسبك انت كعميل هتقول ده انا مش جايبها منه وهو عملى صيانتها

ده كله يا باشا كسب ثقه العميل والشركه الام يتفرض الشرط ده على الوكيل الجديد فى العقد وهو بيرحب بيه جدا , امال مين هينفعه بالصيانه لو هو خسر كل العملاء القدام ؟

صدقنى الوكيل الجديد بكل رضا هيفتح ابوابه للعربيات اللى مش من عنده لأن انت لو عجبك الشغل بتاعه هتجيله تانى , وفى حاله الرواس اى مركز خدمه جديد ان شاء الله حتى لو سيراميك الامير اكيد هتحس فيه بفرق

المشاركة الأصلية كتبت بواسطة ahmed-moga

بعدين ياريت الشركه الأم كانت ادت فرصه للوكيل القديم انما المهله اللي فاضله اقل من 3 شهور

والشركه الأم لسه ماحددتش مين اللي هاياخد التوكيل علشان يبدأ في الأستعداد وتجهيز المعدات ومنافذ

البيع ومراكز الصيانه والأهم الأستعانه بالمهندسين والعماله مش اي حد والسلام نتيجه لقله الوقت

انا من رآي الشخصي انهم يخلوا فيه وكليين في مصر وكيل مؤقت(القديم) ووكيل دائم (الجديد) بحيث

انهم يدوله فرصه لحد آخر سنة 2011 لحد ماأخر فترة الضمان للسيارات تنتهي وبعد كده يبقي مركز صيانه معتمد

وفي ذالك الوقت لايسمح له بأدخال سيارات جديده وكذلك لأتاحة الفرصه للوكيل الجديد بتجهيز وكالته علي أكمل وجه

وطبعا انا متفق في الرآي مع حضرتك في حتة غلو الأسعار المبالغ فيه واللي ظهره علي

حقيقته تخفيض اسعار اللانسر البومه والشارك بحوالي 15 الف جنيه

اولا لا تتخيل ان الشركه الام سحبت الوكاله فى يوم وليله وبدون تحذير , الله اعلم ايه اللى حصل فى الكواليس بس علاقه عمل 28 سنه مبتخلصش بالسهوله دى وتقلب ميتسوبيشى الطرابيزه وتقف فى محاكم علشان فكره جت فى دماغهم

السبب قوى وواضح

توكيلين فى وقت واحد يبقى الشركه بتموت نفسها وحرق اسعار وضرب فى بعض والدنيا هتتبهدل ومش هتبقى نهايه سعيده ابدا , ولو تم مد العقد الموضوع مش هيخلص علشان هو مش هيبطل بيع عربيات ويبقى كدا خلص العقد وكله مخلص الضمان ولو حصل يبقى ميتسوبيشى هتغيب عن السوق سنتين وده ملوش اى فايده وكل خساير

تخفيض الاسعار دلوقتى من الرواس هو ليه سبب كتير ممكنه , يمكن بيخلص مخزونه للظروف او تحسبا لما سيكون او بيحاول يرفع شويه المبيعات وحال السوق ويراضى الشركه او بيلم سيوله لهدف معين او او او ,,, الله اعلم

المشاركة الأصلية كتبت بواسطة ralliart

اهو احمد باشا قال كل اللي كنت عايز اقوله وزياده
وكمان اللي يأكد كلامي ان التوكيل ده زباله ،اني النهارده كنت بغير زيت وفلاتر ولمبة تابلوه وتيش دركسيون ،العربيه قعدت عندهم 7 ساعات والدنيا مكانتش زحمه ولا حاجه ! ولما اتأخرت والعربيه كانو راكنينها في الورشه لمدة 3 ساعات دخلت سألت على المهندس اللي ماسك العربيه لقيته قاعد قدام الكمبيوتر وبقوله عربيتي مركونه ليه قام قالي فين دي انا خلصت عربياتي ،ولما وريتهاله قالي آه نسيت ادخلها الزوايا !!
تخيل 7 ساعات و1900 جنيه في شوية شغل اهبل ويقولك نسيتها
ولا البني آدم البارد بتاع الاستقبال نفسي اعرف هما ازاي عملوله انتر فيو وخلوه يشتغل في الاستقبال؟؟ ده أكيد جاي بواسطه !! قمة اللامبالاه ويحسسك انه مشحتك العربيه

هو حضرتك روحت اي فرع علشان بعد كده الواحد يتجنبه ؟

المشاركة الأصلية كتبت بواسطة ahmed-moga

وانا تشرفت بيك جدا ياأستاذ أحمد بوجودك في موضوعي فتقبل مني خالص الشكر والأحترام

العفو يا فندم انا اللى اتشرفت بسماع وجهه نظرك علشان نتناقش ونقول افكار قد تكون مش واضحه للناس

وشكرا لموضوعك المفيد

المشاركة الأصلية كتبت بواسطة ralliart

اهو احمد باشا قال كل اللي كنت عايز اقوله وزياده
وكمان اللي يأكد كلامي ان التوكيل ده زباله ،اني النهارده كنت بغير زيت وفلاتر ولمبة تابلوه وتيش دركسيون ،العربيه قعدت عندهم 7 ساعات والدنيا مكانتش زحمه ولا حاجه ! ولما اتأخرت والعربيه كانو راكنينها في الورشه لمدة 3 ساعات دخلت سألت على المهندس اللي ماسك العربيه لقيته قاعد قدام الكمبيوتر وبقوله عربيتي مركونه ليه قام قالي فين دي انا خلصت عربياتي ،ولما وريتهاله قالي آه نسيت ادخلها الزوايا !!
تخيل 7 ساعات و1900 جنيه في شوية شغل اهبل ويقولك نسيتها
ولا البني آدم البارد بتاع الاستقبال نفسي اعرف هما ازاي عملوله انتر فيو وخلوه يشتغل في الاستقبال؟؟ ده أكيد جاي بواسطه !! قمة اللامبالاه ويحسسك انه مشحتك العربيه

ده العادى على فكره , انا عربيتى خلصت واترمت برا وانا قاعد جوا محدش نده عليا

وبعدين خرجت سألت قالولى دى واقفه من بدرى !!! , ولقيت العربيه ملطخه شحم من برا ومن جوا وكلها تراب وقعدت الف وادور على حد يقولى ايه اللى حصل ولا حياه لمن تنادى

وبعدين بسأل عامل من اللى فى المغسله اذا كانت واقفه هتتغسل قالى لا الغسيل حساب لوحده , يعنى حتى مش هنقول يغسلوها انما الشحم اللى منهم مكان الشغل على العربيه من برا محدش كلف نفسه يمسحه

اخدت امر الشغل ودخلت دفعت ومشيت ولا لقيت حد يقف معاى ولا يفيدنى زى ما يكون اللى استلمها منى روح بيتهم , والغريبه ان كل ده والساعه لسه 1 ونص الظهر يعنى فى عز الشغل , ولقيت بعد كدا كلللللللل الملاحظات اللى قعدت اقولها للبيه اللى كان بيستلم منى الصبح وهو قرفان ومش طايقنى متعملش منها ولا حاجه