الموضوع: عربيتي الجديده فيكترا 2001 cdx مواصفاتها و حالتها و مغامراتي في الحرفيين معاها

ربنا يبركلك فيها ويكفيك شر نظرات الحقد بتاعت اليومين دول

الف مبروك
بس عايزين نعرف عملت اية مع الميكانيكى اللى خرب الدنيا فى العربية

الله يبارك فيكم يا شباب
الف شكر يا جماعه على ردودكم الجميله

و ابعدنا يا رب عن الحسد و عين الحاسدين قولوا امين

ثانيا السعر

بصراحه صاحب العربيه طلع شاب في قمه الأخلاق و الذوق و التعامل معاه سهل و سلس
فعلا راجل ذوق و محترم لأقصى الحدود و أهم ميزه فيه انه أمين في كلامه

قبل ما اتفرج على العربيه هو قالي اللي فيها
قالي رشه بره بس فابريكه جوه و محتاجه كمبروسور تكييف
و العربيه كانت مرشوشه من فتره قريبه فحاله الدهان حلوه
بس طبعا محتاجه حبه تظبيط يعني عايزه ترش الأكصدامين عشان التجاريح و الخرابيش و تقشير الدهان
و محتاجه فانوسين ادام عشان الفوانيس الأصلي بتوعها عتموا و لونهم أغمق
و هو ده كل اللي فيها

المهم اتفرجت و اتفقنا على 63 الف و قولتله بس أنا لسه هاكشف عليها
عفشه و كهربا و ميكانيكا و كمبيوتر (كشف كامل يعني)
قالي طبعا ده حقك أنت بتشتري بفلوس و مش قليله

و لما كشفت لقيت فيها الحاجات اللي أنا قولت عليها فوق في الأول
و لتاني مره الراجل طلع محترم جدا جدا
كلمته و قولتله على اللي فيها
قالي و الله ما اعرف الحاجات دي على العموم خلاص وديها عند الميكانيكي بتاعي
و خليه يكشف عليها كشف كامل و اللي يلاقيه فيها يعمله و ده بتاعي نخصمه من باقي الفلوس

بس التكييف محتاج كمبروسور بس قلتله ماشي كده و لا كده أنا هوديها عند بتاع تكييفات
و نشوف الراجل هيقول ايه
و فعلا رحت عند الميكانيكي بتاعه و كشف عليها و عمل اللي فيها
و لخبط العربيه شويه خلال الصلاح ده

ثالثا مغامرات الحرفيين مع الصنايعيه و بتوع قطع الغيار

ده لينك المغامره بتاعه امبارح انا كنت كاتبها في موضوع تاني
http://www.nilemotors.net/Nile/14520...post3872600560

و دي بدايه مغامره النهارده
رجعت للميكانيكي تاني المهم قلتله اللي حصل فتح الكبوت و قعد يلعب شويه
و يهز الفيشه دي و يخبط بالمفك هنا و هناك المهم العربيه اتظبطت
لمبه ال TC طفت و الار بي ام اتظبط و طلعت و جربت و الدنيا بقت كويسه قلت طب الحمدلله

الراجل ده ممكن يكون كويس و ابقى اتابع معاه الفتره الجايه في الصيانات و شغل العربيه

المهم قلتله طب فكلي بأه العدادات و نضفها و غير اللمض المحروقه فيها زي ما اتفقنا امبارح

معرفش مين نده عليه و راحله و اختفى زي ما يكون فص ملح و داب
المهم قلت للولد اللي معاه يفك العدادات لحد ما الأسطه ييجي قالي طب معلش اتصل بالاسطى و قوله
أنا استغربت هو لازم يستاذن الأسطى قبل ما يفك!!!!!!!!
و فعلا اتصلتله بالأسطى و قعد رغى معاه بتاع دقيقه كده
و بعدين لقيته بيقولي طب الأسطى عايز يكلمك فأخدت الموبيل منت الولد و كلمته

لقيته بيقولي في التليفون أنا مش فاضي النهارده خليها يوم تاني أصلي عندي شغل كتير

قلتله ما احنا اتفقنا امبارح على الكلام ده و بعدين أنا بجيلك من حلوان
يعني مشواري ساعه أو ساعه و ربع مش 5 دقايق فلازم اعملها النهارده ادام جيت
قالي لأ معلش مش فاضي النهارده
قلتله ماشي براحتك و قفلت السكه و قلت للولد اللي معاه
لما الأسطى ييجي ابقى قوله انت مش فاضي النهارده و و أنا مش فاضي اجيله تاني ابدا
أنا هشوفلي ميكانيكي تاني
الواد قالي طب ليه بس يا باشمهندس و كلام من النوع ده
قلتله أنا مش على أد مزاج الأسطى بتاعك في بدل الصنايعي ألف و سبته و مشيت

و دي بصراحه كانت أحسن حاجه عملتها