انا من فترة وأنا نفسيتي مش كويسة
صحيح بادحك و باهزر و باروح وباجي ..بس دايما حاسس اني ورايا حاجة ماعملتهاش او في حاجة هاتحصل بكرة ...
و بعدين لاقيت نفسي غير قادر على الاستمتاع بالحياة من قوة سيطرة الشعور بالقلق عليا و على تفكيري.

و قعدت مع نفسي أفكر فيا ايه
يوم واتنين وتلاته و أكثر
أنا خايف من البلد دي .... أنا خايف من بكره اللي عارف يقينا انه أسوأ من النهاردة .. البلد بتقع
صحيح أنا مرتاح ماديا و الحمد لله
بس من خمس سنين كنت غني قوي قوي
ومن سنتين بقيت قادر على شراء اي شيء اريده بدون تحويش
و الأن أنا فقط مرتاح ماديا و الحمد لله على النعم الكتيرة
بس ليه ؟؟؟
ليه البلد بتعمل فينا كده ؟؟؟
انتوا لو شوفتوا كل اللي بيتقال عن العيشة في المنتدى هنا تكتئبو و الله العظيم
الشوارع زحمة (تتحرق)
و العقار غالي و فاضي .. و لما نقدر نتنيل و نشتري شقه ندفع ضرايب عقارية
و لو مش هاقدر اشتري شقة ولا بيت و لا أرض أقول أجيب عربية
و أدفع تمنها مرتين بس لأني في مصر و اركب عربية من أقل المواصفات في العالم
حتى البنزين النضيف بتاعها مش موجود و ادينا بنحط من اللي موجود هنا
دا حتى اللي موجود هنا هايغلى و مش هاعرف احطه فيها (ايه كمان مش هاعرف انزل اتمشى بالعربية لحد ماتعب).
ليه لو دخلت على لجنه بخاف و انا مواطن شريف جدا مابشربش سجاير حتى ...
و ياريتني باعدي بسلام !! ده ممكن الظابط ينكد عليا شهر و ممكن يبهدلني و ماخودش منه حق ولا باطل (و حصللي قبل كده)
ليه الأكل كل يوم بيغلى ؟؟؟
ليه بادفع فاتورة ميه 52 جنيه و انا ومراتي بس اللي في البيت
ليه يجيلي في فاتورة التليفون اشتراك 30 جنيه ؟؟؟
و في فاتورة المية (متأخرات) 29 جنيه كل شهر ؟؟؟ كل شهر متأخرات؟؟؟ و لما تسأل تدخل في دوامة مقرفة من النهب والروتين و القذارة و اللا مبالاة
ليه اشتري عربية جديدة و امشي على طريق حلو و ادفع 100 جنيه (رادار على 92 )
و لما أدفعهم ألاقي كمان فيه 75 جنيه (مخالفة قديمة) ما حدش رضي يقوللي هيا ايه
و طلعت حزام في اسكندرية (وانا ما عتبتهاش السنة دي)
ليه ماحدش بيعمل شغله ؟؟؟ و برضه يطلب فلوس
ليه البلد تتباع و الجنيه يقل و الأسعار تولع
و المرتبات تقل و القبض يتأخر ؟؟؟
انا فعلا عارف ان البلد دي هاتوقع قريب
و الغني هايبقى فقير و الفقير يموت أو يندعق
و الباقي هيكون برا مصر
انا حقي اني أعيش (بلاش أعيش كويس) بس أعيش
اتعب و اجتهد و اموت نفسي ....بس ألاقي نتيجة
أحوش ..... ولما احتاج تحويشي الاقيه , مش الاقيه بقى النص
نفسي يبقالي و لد و أنا أعلمه و أربيه علشان يكون انسان في دنيا الناس كويس يبقى محترم أو وحش يبقى ينضرب بالجزمة (بس في مصر ..هاينضرب بالجزمة كده كده و بالذات لو عنده أخلاق).

أنا خلااااااااااااااااااااااا ااااااااااص
مش هاقدر أعيش في البلد اللي بتمص دمى و أعصابى كل يوم
أنا باذن الله قررت اني أسيبها (قرار كنت دايما بخاف منه و اعملله الف حساب) بس هوه ده اللي هايريحني , ويطمنني ويحسسني اني حي

اسف على الاطالة بس انا بجد محتاج اتكلم مع اخواتى واصحابى