الموضوع: فضفضة

السلام عليكم

بصراحه انا قرات كلامك والواضح انك هتدخل فى حاله اكتئاب نفسى وده هيعذبك وهيتعبك نفسيا اكثر وهيخليك تشوف دائما النص الفاضى من الكوب
وبعدين كلامك عن البلد كله تشائم
واغلب تركيزك على ان البلد بتتسرق وان اللى كان معاه هيبقى مش معاه بعد شويه والفقير يموت على كلامك كلنا عايشين الوضع ده اوعى تفكر انك لوحدك بس
لو فكرت فيها من زوايا مختلفه هتلاقى انك تحمد ربنا مليون مره فى الثانيه
تحمد ربنا انك مش عراقى وان العراق الحاليه مش بلدك من اول نظام الحكم السابق للحالى للى جاى برضوه مصر لحد الان رغم الفساد ارحم ولو رجعت بتفكيرك هتلاقى ان مصر دى طول عمرها بتتسرق وبتتنهب طول عمرها من يومها والناس عايشه برضوه
كنت غنى قوى قوى ودلوئتى حالى المادى مستور
فيه غيرنا ماتوا من الجوووع يبقى احنا نحمد ربنا لانه قال وان شكرتم لازيدنكم
البلد فيها فساد ايوه فيها وفيها سرقه وكلنا عارفين وعايشين الوضع ده لاننا مش هنقدر نغير حاجه كلنا بنفكر بشكل فردى وكل شخص بيقول انا مالى يا عم خلينى فى حالى ويشوف الحرامى ويسبه يسرق ويشوف البلطجى ويسيبه يقل ادبه على الناس
كلمه وانا مالى دى خلينى فى حالى اانا ورايا عيال عاوز اربيهم ......... الخ
هى اللى خلت البلد دى كده وهى اللى خلت الحكم الحالى يستعبد المصريين
وهى اللى خلت الداخليه تسطو وتنتهك حقوق الناس بالطرق المشروعه وغير المشروعه
احنا كمان بقينا مش بنخاف على بعض
المصريين بقوا بيكرهوا بعض جدا
كثر الضغط النفسى اللى بيقابلوه الناس فى كل مكان من الشغل من طلبات المدارس من الشارع من قله الفلوس من غلاء المعيشه من الاوضاع السيئه اللى وصلت ليها البلد خلى الناس مش مستحمله بعضها الواحد ما بيصدق حد يقوله كلمه عشان يتخانق ويطلع اللى جواه طيب ماهو لو فكرنا نلاقى كلنا بيحصل فينا نفس الوضع يبقى نقول الحمد لله احسن من غيرنا ونستحمل لحد ما ربنا يزيل عنا البلاء ده
هتقولى ما هو فيه غيرنا احسن منا بكل بساطه هقولك ربنا له حكمته فى كده

بص فى البلاد اللى حواليك وشوف اللى حوالينا بيحصل فيهم ايه


انا فى نظرى مصر حتى لو كانت اسوء بلد فى الدنيا بحكامها واوضاعها فهى احسن بلد
ولو انت عاوز تسيب البلد وتهرب ذى كثير ما هربوا من القرف
فكر كويس الاول وحاول تجاوب
واعرف انت ربنا خلقك ليه ؟
ايه وظيفتك اللى ربنا خلقك عشانها ؟
طيب هل انت فعلا ذى ما ربنا امرك تكون ؟
ايه هى رسالتك فى الارض ؟
لو عرفت تجاوب على الاسئله دى يمكن تفكيرك يتغير ولو عرفنا كلنا نجاوب اكيد هنبقى احسن بكثير

"لَقَدْ خَلَقْنَا الإِنسَـنَ فِى كَبَدٍ"

انا معاك في كل اللي انت قولته بس هي ديه بلدنا على مر العصور و ان كانت الأزمة الإقتصادية و النهب والفساد زاد و عصف بكل الثوابت و الأماني لمستقبل مطمئن ولكن ألست معي ان احنا أفضل حالا من كثير من دول العالم بل أفضل من عصور سابقة حين كنت لا تأمن اعتقالك في أي لحظة حتى بدون أي سبب.
أنا أعمل بدارفور و شايف قد إيه مصر بخير و إنها لسه أم الدنيا بالرغم من كل ما فيها
الحقيقة أنا مش هاعدد مافي مصر من خير لكن كفاية الأمن الموجود ممكن تخرج في أي و أنت أمن
و ممكن تمارس عقائدك الدينية دون خوف و ليك اصدقاء و اسرة متأكد انك هتلاقيهم جنبك في وقت الشدة

أنا كتير بيجي لي الإحساس اللي عندك ده لكن دايما بتذكر قول رسولنا الكريم عليه الصلاة و السلام "من بات وهو آمن في سربه، معافىً في بدنه، عنده قوت يومه وليلته، فكأنما حيزت له الدنيا بحذافيرها" ألاقي نفسي في نعمة كبييييييرة جدا
على العموم هي فترة كده و تعدي ان شاء الله و ترجع نفساوياتك عالية وزي الفل و تنسى موضوع انك تسيب البلد ده (إلا إذا كان لعمل و لفترة قصيرة) يا راجل هتلاقي صحبة زي ديه فين بس؟؟!!