اسمعوا الحكاية دي

**ENG_KHALED** · 29-04-2010 08:33 PM

انا قولت احكيلكوا القصة الغريبة دي اهو عشان نغير جو
النهاردة الصبح كنت رايح شغلي بالعربية بتاعتي وماشي علي الدائري في أمان الله بسرعة من 80 الي 90 كم/س ومره واحده لاقيت الطريق وقف روحت شغلت الانتظار ووقفت .. عادي
شوية وسمعت صوت هيصة قولت برده عادي خناقة بين عربيتين شوية وسمعت خبط وتكسير قولت معقولة وصلت اني هما بيكسروا عربيات بعض !!!
وفجأة لاقيت العربيات اللي قدام بترجع بظهرها وعماليين يخبطه في بعض بقيت مش عارف اعمل ايه كله ايديه علي الكلاكسات بس محدش سامع والعربيات اللي جنبي كمان مش عارفين يعملوا ايه
لحد ماالناس بدأت تسيب العربيات بتاعتها وتنزل لانهم مش عرفين يعملوا ايه عربيات نقل بترجع عليهم بظهرها واحنا ورانا عربيات
وانا كمان خلاص اخد قرار اني هنزل وهسيب العربية لاني اللي قدامي عربية نقل وتقريبا هيدوس علي عربيتي :b4_611: كل ده بيحصل في لحظات وصوت التكسير والخبط شغال انا سمعه بس مش عارف فيه ايه قدام
وفي لحظه والحمد لله قبل ما انزل الدنيا وقفت والعربيات استقرت وبدأنا نتحرك طبيعي ببطء ونشوف في ايه قدامنا تخيلوا ايه ؟؟؟؟ فيلم اكشن
عربية نقل (ترلة) جاية عكس علي الدائري وتقريبا السواق سكران او مش عارف يوقف العربية وعمال يدوس علي العربيات اللي مقبلاه لحد ماوقفت
الحمدلله انا كنت ورا بصفين او تلات صفوف عربيات يعني لو كنت ماشي بسرعة شوية كالعادة كانت هتبقي في وشي العربية النقل وكان ممكن اكون تحت الترلة
بس منظر العربيات اللي اتخبطت واتبهدلت فظيع تخيل عربية نقل دخلت فيك اكتر من ست سبع عربيات متبهدلة
الحمدلله الحمد لله الحمدلله الذي عفانا مما ابتلي به الاخرين وفضلنا علي كثيرا من خلقه تفضيلا

**ali.mahmoud** · 29-04-2010 08:43 PM

يابنهاااااااار ابيض ده تخلف ده ولا يتقال عليه ايه هو كان بيلعب جاتا 2 ولا ايه

**Khaled_Nowaihy** · 29-04-2010 08:54 PM

ايه ده ؟؟؟؟ مش عارف اقول ايه والله
ربنا هو الستار

**the-hero** · 29-04-2010 09:18 PM

المهم حمد الله على سلامتك وادانيا فيها بلاوى كتييييييييييييييير
ربنا يكفينا شر الطرق

**ahmedbasto** · 29-04-2010 09:20 PM

الحمد لله انك سليم دة تخلف ازاى ماشى مخالف

**w-m-a** · 29-04-2010 09:26 PM

وعملوا فيه ايه ؟؟؟؟؟؟؟؟؟؟

**ENG_KHALED** · 29-04-2010 10:02 PM

المشاركة الأصلية كتبت بواسطة w-m-a

وعملوا فيه ايه ؟؟؟؟؟؟؟؟؟؟

مبدئيا الناس مسكت السواق عجنته مات من الضرب كل اللي معاه حاجة في العربية كان بيضرب بيها
وكمان كسروا زجاج العربية طبعا ده اللي قدروه يكسروه لانها عربية نقل
واتصلوا بعد كدة بالشرطة ( وطبعا الشرطة في خدمة الشعب)