الموضوع: قدر الله وماشاء فعل

السلام عليكم ورحمه الله وبركاته
والله مش عارف ابداء الموضوع ازاى بس قولت لازم اكلم معاكوا اصلى حاسس انى مصدوم وعاوز افضفض شوية
حتى ترددت انى اعمل الموضوع ده بس حسيت انه هيريحنى شوية
المهم
انتوا طبعا عارفين انى لما جيت اسافر رفعت عربيتى فى الجراش وقولت بلاش ابيعها دى عزيزة علىا جدا جدا وبالرغم ان فى اكتر من واحد كلمونى عليها بس انا قررت انى اسيبها ومبيعهاش وفعلا قبل مسافر وفى نفس يوم السفر قبل معاد الطيارة ب اربع ساعات كنت رفعتها انا ومجموعة صحابى فى الجراش
المهم جيت بقي لما سفرت هنا واستلمت عربية وشوفت سوق السيارات هنا ورخص الاسعار برضوا مهنتش عليا بس قولت فى بالى طب والعربية اللى مرفوعة دية لازمتها ايه انا قدامى على الاقل سنة ونص لما انزل وهتتكلف تجديد وترخيص السنتين دول غير الركنة هتبوظ حاجات فيها وفى البيت ضغطوا عليا فى موضوع البيع بينى وبينكوا اقتنعت وحسيت انه كلام سليم خصوصا انى غالبا مش هستقر فى مصر وبفكر اشترى هنا عربية فقررت ابيع
الايام ديه كان فيه ناس من المنتدى برضوا بيكلمونى عليها وناس جيرانا وبعض المعارف كان قدامى يعنى اكتر من واحد
بس تواصلت مع احد الاعضاء فى المنتدى هنا ومن كتر الكلام لقيته انسان قمة فى الادب قمة فى الاحترام بجد والله ونعم الرجولة حسيت انى اعرفه من زمااااااااااااان وقولت هخلاص فى الحالة ديه مش هعتبر ان العربية اتباعت لأنها كدا مع اخ يعنى مش فارقة كفايه عندى انى اتعرفت عليه وقولت خلاص هي بتاعته من غير اى كلام وهو من القاهرة من شبرا
أبتدينا ندردش على الياهو اكتر من 10 ايام ونتعرف ونحكى عن مميزات وعيوب العربية
فشرحت له كل اللى كنت ناوى اعملة فى العربية وعيوبها والتكاليف بالظبط واماكن الصنايعية وقطع الغيار وكل شى وحططيت تكلفة مبدايه والاسعار وكل ماشي مظبوط
والراجل الله يكرمه راح وشاف العربية وعجبته وتوكل على الله وقال خلاص هيروح وينزل العربية ويبتدى يظبط الشغل اللى فيها ويوم تانى يرجع يجهز الفلوس ويمضى العقد وطبعا ده من الثقة اللى اكتسبنها من بعض من التعارف الخالص لوجه الله بعيد عن اى مصالح
فى اليوم المحدد العربية نزلت وجربها وتمام وراح اتغسلت






وراح لميكانيكى لقى فيها طرمبة البنزين الامامية عاوزة تتغير مع اويل سيل كوبلن ومجموعة جوانات وكدا عشان كان فيه تسريب زيت من تحت والفرامل عاوزة ظبط وعاوزة ظبط كربراتير وكهربا يعنى كلام سهل جدا بس قاله انه مش فاضى دلوقتى يمر فى يوم تانى يعمل الشغل ده
وغير بوجهات وزيوت ورجعت العربية تانى الجراش
اليوم التالى راح ومضى العقد مع الحاجة فى البيت وكالعادة دفع المبلغ والباقى عند التسجيل كالمعتاد
راح لميانيكى تانى معرفة وصفتهوله واتفق انه يعمل الشغل اللى فيها يوم التلات وكله تمام التمام وهتخلص فى يوم ان شاء الله
فقال خلاص بقي عشان ميضعش اليوم يروح عند الكهربائى
يعمل الكهربا ويشحن البطارية وهناك لقيته بيكلمنى وبيقولى الكونتاك علق وسوستته مبتردش
قولت له بسيطة ووصفت له مكان اللى هيجيب واحد منه استيراد وفعلا جاب واحد بحالة ممتازة بمفتاحة وركبة
قولت فى بالى يعنى موضوع بسيط بس صعب عليا اوى شحطته وسط الصنايعية وقطع الغيار والراجل مش من البلد بس بسيطة بس اتديقت شوية واستغربت اكتر ازاى الكونتاك يعمل كدا ده عمره مقصر معايا وكان شغال تمام بس اكيد من كتر الاستعمال بقي حصله حاجة
المهم عادى وهى علقة تفوت وكلنا بيحصلنا كدا
بعدين راح يشحن التكييف وقعد عند الراجل لحد الساعة 11 بليل لحد مالحمد لله اكتشفو التسريب وشحنوا التكييف وكله تمام بس الزاراير الكمبروسور فى الطبلوه مش وخده كهربا واضح ان سلكه فاصل او فيوز عاوزة كهربائي
وبعد كدا ركن العربية فى الجراش وروح وهيجي تانى يوم يكمل باقى الشغل بس للاسف كان اخر يوم فى الاجازة بتاعته فكلمنى بليل لما روح ووصفت له كل حاجه واتفقت مع واحد يروح معاه عشان يسهل عليه الوصف وهنا بقي كانت الفاجعة
انا قاعد فى امان الله وبقول محدش كلمنى يبقي العملية متيسرة وكله ماشي تمام
والاقى واحد صاحبي بيقولى الحق العربيى ولعت
اييييييييييييييييييه ايوا ولعت والمطافى طفيتها ياخبر ابيض ازاااااااااااااااى قالى سليمه مفيش حاجه ديه حاجة بسيطة
والله العظيم عنيا دمعت واتضيقت جدا جدا جدا أكتر لو انى كنت موجود هناك والعربية بتاعتى
طب الراجل الغريب ده هيعمل ايه هيتصرف ازاى ده متصلش بيا عشان ميقلقنيش
حسيت انى مربوط ومش عارف اعمل حاجة واقول مرة احس بمعنى الغربة يااااااااااااااااة
موقف رهيب مش عارف اعمل ايه ؟!!!!!!!!!!
طرمبة البنزين سربت بنزين على البوجيهات العربية ولعت مسكت النار فى لباد الكبوت والخراطيم بس ربنا ستر انها كانت جنب المطافى فلحقوها قبل متنفجر الحمد لله
البطارية ساحت كل الخراطيم والسلوك ساحت والضفيرة والمشط والثرموستات كل الجنب بتاع البطارية ساح وسلوح البوجهات
اتصلنا بالكهربائي بتاعتى والعربية عنده وهيغير
الضفيرة والثرموستات والمشط وطرمبة البنزين والبطارية وجميع الخراطيم وواصلة العمة والفبرا بتاعت غطا فلتر المكييف اللى عليها حامل الكبوت ولباد الكبوت





ومبدأيا هتتكلف 1500
اقسم بالله لما شوفت الصور فضلت ساكت كدا فترة وعنيا دمعت ديه مجهود سنين كل قطعة كانت بتفكرنى بحكاية يلا الحمد لله وقدر الله وماشاء فعل.بس مزعلت غير على زعل الراجل اللى انصدم ده
ياترى عامل ايه ساعتها وزمان الشيطان هيجيله ويقوله انت ايه اللى رماك الرميه ديه مكنت ريحت دماغى
من ده كله شوفت لو كنت عملت كدا او كدا واحصل كذا او كذا
اكيد اى حد كان هيحصله كدا فى ظروف زى ديه وانا بجد مش عاوز اخسر الراجل ده ونفسي اساعده باى شكل وقولت له اقبل كدا انا على قد منا سعيد بمعرفتك على قد مخايف ان العربية توقع ما بينا
بس ان شاء الله ترجع احسن من الاول وتمر المرحلة ديه على خير
فقولوا لى ممكن اعمل ايه ؟!!!!!!!!!!
اللهم ما اجره فى مصبته واخلف له خير منها. اللهم ارزقه الصبر والثبات والتوفيق. اللهم اكفيه شر اعين الناس والحاقدين الله ارزقه خيرا منها انك ولى ذلك والقادر عليه

ربنا يعوضه خير و حاول تساعده يا اما بالتهاون فى السعر شوية او مساعدته فى عملية الاصلاح و قدر الله و ما شاء فعل