اقرا الجزء الاول من الموضوع , العربيه مش بتاعت الاخ اللى سايق دى بتاعت الشركه وحالتها خارج نطاق مسؤوليته , ومازلت عند رأى حتى لو كان بيجرى برده اللى قدام غلطان
مينفعش نسيب واحد عمل 20 غلطه كبيره ونمسك فى واحد عمل غلطه عاديه
تمام كدة
سرعة ستين دي لو اي عربية وشال رجله من عالبنزين هتنزلها عشرة كيلو ولو لمس الفرامل هيقف وكبيره تلاتة متر فرامل عالأرض -------- بلاش وقوف !!!!!! هيلحق يبص في مراياته التلاته ويطلع من حارته في اي اتجاه عشان اللي وراه وجاي طاير ومش هيلحق يفرمل وكمان يدي انتظار او اشارة حسب القرار اللي هيعملهاقتباس:
الزملاء اللي بيقولو طرق سريعة
ده طريق العروبة يعني صلاح سالم .... داخل القاهرة .... والسرعة القصوى 60 كم / س وتقريبا كل يوم ناس بتموت وهي بتحاول تعبر الطريق ...... ده مش طريق سريع .... المحور ممكن يكون طريق سريع او الدائري .... لكن صلاح سالم مليان اماكن المفروض انها لعبور المشاة و محطات اتوبيس ومصالح حكومية واماكن سكنية وفنادق ومساجد .... ده مش طريق سريع
ولو حطيت نفسي في الحادثة دي :
1 لو انا العربية اللي قدام وشفت الفتحة مرة واحدة وحالة الطريق ماتسمحشي مش هعمل اللي هو عمله ابدا ويمكن اصلا مش هحاول وانسى الفتحة دي تماما وادخل من اللي بعدها وبتحصل كتير دي منطقتي وفي يوترن باطلع منه كتير قريب من الفتحة مالحقهاش وادخل من اللي بعدها كلها خمس دقايق زيادة وواحد كيلو متر ولا اتنين كيلو بس اضمن واسلم
2 لو انا العربية اللي ورا - الحمد لله - بابقى كاشف الطريق لقدام على اد ما أقدر وعامل حساب أخطاء الغير وغالبا سرعتي بتبقى السرعة اللي تخليني الحق اتصرف في الموقف دا
ياخوانا الموقف دا بيحصل كام مرة في المشوار الواحد وغيره كتير من المواقف دي
- انا وجهة نظري الحادثة دي الاتنين غلطانين 50 % 50 %
طبقا لقوانين المرور فى كل دول العالم
السيارة الصفراء مخطئة بنسبة 100% لان الصدمة من الخلف
وهو دائما المخطىء
هذا هو القانون الصريح
اكيد كل حادثة ليها ظروفها ولكن فى النهايو القانون صريح ولا خلاف فيه وهو 100% خطأ على القادم من الخلف مهما كانت الظروف
للاسف الموظف يتحمل الخطا بنسبة كبيره
لانه لم يترك مسافة الامان المناسبه بينه وبين السيارة التى امامه علشان يقدر يفرمل او يوقف العربيه فى حالة حدوث اى امر طارىء
وان كان قائد السيارة الاخرى (الحمرا) هو الاخر مخطىء لمحاولته الخروج من الطريق من غير المكان المخصص فيه والانحراف المفاجىء
ولكن ده لا يعفى الموظف من الخطا
انا اقترح ان نسبه خطا الموظف 70 % والسيارة الاخرى 30 %
أنا رأييى أن الإثنان مخطئان و لكن من الذى أخطأ أولاً فتسبب فى خطأ الآخر؟؟؟؟؟
السائق الأمامى الأحمر أخطأ فتسبب فى خطأ الأصفر إذاً الأحمر يتحمل الخطأ بنسبة 100%
و دعونا نتسائل لو لم يقم السائق الأحمر بالتوقف الخاطئ لأنه بعدم إنتباهه فوت المخرج الذى يريده هل كانت الحادثة ستحدث أكيد 100% لم تكن هذه الحادثة ستحدث
إذاً السائق الأحمر مخطئ بنسبة 100% و لا يجب على الشركة تحميل الموظف الأصفر أى نسبة خطأ
يا ريت الي بيقولوا إن الخبط منا ورا هو دائما الغلطان
عايز نص القانون ده في أي دوله!!!
والي بيقول يسيب مسافة مين في مصر بيسيب مسافة والي بيسيب أكيد حد هيخش فيها!!! وبرده هيفضل لازق في العربيه الي جت جديد وطبعا الأصفر غلطان عشان بيجري لكن خطئة لا يتعدي ال٥٠٪ مهما حصل لإن الأحمر خالف القانون مخالفة صريحة بل أكثر من مخالفة
انا حقول تحليلى حسب تخيلى للموقف و حسب المواقف المشابهة اللى حصلت لى
دلوقتى احنا بنتكلم فى عربية ماشية فى صلاح سالم و قدامها عربية تانية و حنفترض انها ماشية بنفس سرعتها... و بعدها بشوية العربية اللى قدام بدات تاخد اتجاة يوحى بانها داخلة يمين... و بعد كدة وقفت فى نهر الطريق و هنا حصل الحادث
اول حاجة حنتكلم فيها السرعة... قانونا السرعة فى الحتة دى 60... بس كلنا برضة عارفين ان دة مبيحصلش و غالبا كلان بنمشى حسب سرعة الطريق بحث ان تقريبا كلنا بتبقى سرعتنا واحدة... سواء كانت 80 او 40 حسب الزحام و خلافة... الفكرة هنا اننا بنتكلم على عربية ممكن متكونش ماشية بسرعة قانونية فى مقابل عربية واقفة... مهما كان خطاء العربية اللى ورا فى السرعة فا خطاء العربية اللى قدام فادح بكل المقاييس
تانى حاجة طريقة الانعطاف للخروج من صلاح سالم الى الطريق الجانبى... اى حد بيفهم فى الدنيا حيقولك اللى عايز يخش يمين يمسك يمين... من الرسم واضح ان العربية الاولانية كانت مش ماسكة يمين و بالتالى دة تصرف غلط... بعض النظر هو كان مدى اشارة ولا لا لانة فى الاساس مكنش فى المكان المناسب عشان يلف... و ممكن لو مكنش وقف و العربية الفراء مرشقتش فيه كانت عربية من الحارة اليمين دخلت فى نص العربية دى و قسمتها اتنين... و برضة العرية الحمرا كانت حتبقى غلطانة
تالت حاجة مسافة الامان... القانون بيقول انك تسيب مسافة امان بينك و بين العربية اللى قدامك... لكن عمليا محدش فينا بيقدر يسيب المسافة القانونية الصح... حسب ما شوفت فى برنامج عن المرور فى امريكا ان مسافة المان بتتحسب من خلال انك تتباع العربية اللى قدامك و لما تعدى نقطة ثابتة زى شجرة او يافطة او كدة تعد ثانيتين قبل ما انت توصل لنفس النقطة... يعنى على سرعة 60 مسافة الامان حتكون حوالى 33 متر... حد فيكم يقدر يسيب 33 متر فاضيين بينة و بين العربية اللى قدامة فى اى حتة فى مصر؟؟؟؟؟؟؟؟؟؟؟؟؟؟؟؟؟؟؟؟؟؟ ؟
يبقى كدة اتكلمنا عن السرعة و كان فيها العربية الحمرا مخطئة خطاء فادح و "قد" تكون السيارة الصفراء مخطئة مع الاخذ فى الاعتبار ظروف المرور فى مصر... و الانعطاف الخاطىء اللى قامت بيه العربية الحمراء و دة السبب الرئيسى للحادث اضافة الى التوفق فى نهر الطريق... و كذلك مسافة الامان اللى برضة مرتبطة بظروف المرور فى مصر
نتكلم بقى فى الملابسات.... و فيه نقطة مهمة جدا جدا فاتت من ناس كتير اوى... العربية الحمرا عملت حركة خدعت العربية الصفراء تماما... العربية الحمراء ادت ايحاء انها بتحود يمين و بتخلى الطريق للعربية الصفراء للاستمرار فى السير بالتالى مكنش سواق العربية الصفراء مطلوب منة اى رد فعل لان العربية نظريا فى اتجاة بتبعد فيه عنة و توسع لة الطريق...
اللى حصل بعد كدة ان العربية وقفت و فى لحظة تحولت من حالة "اخلاء الطريق" الى "سد الطريق" بالكامل... عنصر الفاجئة هنا حياثر على رد فعل سواق العربية الصفراء و حياخرة كتير عن الطبيعى لانة كان اصلا مقرر انة يكمل عادى و بعد ثانيتين او تلاتة كانت العربية دى حتبقى برة حساباتة... لكن فجاءة بقت العربية دى كل حساباتة....
الحركة دى بالضبط حصلت معايا لما كنت بعربية والدى و كان قدامى عربية نص نقل ماشى وواخد نص الحارة الشمال و نص الحارة اللى فى النص و انا كنت فى الحارة اللى فى النص... لما اديتة كلاكس عشان يحدد موقفة حيمشى فين بداء يروح يمين عشان يمسك الحارة اللى فى النص بالتالى بدات انا اروح شمال استعدادا لتجاوزة... فى اللاحظة دى راح ماسك فرامل لان الاشارة قفلت و انا مش شايف الاشارة من صندوق العربية بتاعتة... بالتالى لقيت نفسى داخل فيه... مكنش فيه وقت اعمل اى حاجة غير كسرة شمال على اخر لخظة فاديت بيها بوز العربية لكن اكصدام عربيتة لطش الرفرف و الباب بتوعى...
الموقف صعب فعلا مع الحركات اللى زى كدة و بيفكرنى بالترقيصات بتاعت ماتشات كرة القدم... تبقى داخل على لعيب معاه الكورة و رايح فى اتجاة و فجاءة تلاقية مشى فى حتة تانية و انت متثبت مكانك مش عارف تعمل ايه لانك مش متوقع الحركة دى خالص...
بالنسبة لمسافة الفرامل فا انا مش داخل دماغى قصة كل 10 كيلو بمتر دى لان بالعقل كدة معنى كدة انى لما ابقى ماشى 10 كيلو حزحف متر... و دى عمرها ما بتحصل... كمان القصة دى مرتبطة بنوعية الاسفلت و نوعية الكاوتش ووزن العربية و السرعة... اذا مينفعش نربط المسافة بالسرعة مع اهمال كل العوامل الاخرى ولا ينفع دة يبقى الاساس فى احتساب السرعة... طيب افرضوا ان العربية الصفراء فيها ABS... حنقول ساعتها انها كانت ماشية بسرعة الضوء؟؟؟؟
اخر حاجة قصة اللى "جاى من ورا غلطان" دى كلام فارغ و عار تماما من الصحة... ما انا ممكن دلوقى انزل الدائرى او المحوا و اقف فى وسط الطريق... هل معنى كدة ان اللى حيرشق فيا هو الغلطان؟؟؟...
طيب انا كنت حرشق فى واحد قبل كدة من ضهرة... انا داخل فى شارع جانبى و الباشا لقيتة جايب بضهرة و خارج من الطريق و بسرعة... يعنى لو خبطتة حبقى انا اللى خابط من ورا... انا مسكت فرامل جامد و كلاكس فا هو وقف... ورا منى تاكسى كان داخل معايا و لما وقفت انا هو دخل فيا من ورا... هل كدة هو اللى غلطان؟؟؟ منا وقفت قدامة مرة واحدة؟؟؟؟
مفيش حاجة اسمها اللى ورا غلطان... فيه حاجة اسمها واحد خالف القواعد و القوانين و اخطاء و تسبب فى حادث و علية تحمل مسؤلية خطاءه
فى الاخر و باختصار...
لو بنتكلم قانونى يبقى العربية الحمراء ليها النصيب الاكبر من الحادث لحين اثبات بشكل قاطع سرعة العربية الصفراء و مسافة الامان... دة حيحدد نسبة خطاء العربية الصفراء لكنها باى حال من الاحول حتقول اقل بكتير جدا من نسبة خطاء العربية الحمراء
لو بنتكلم بشكل عملى وواقعى العربية الحمراء غلطانة 100%
MMamdouh
يسلم فمك يا أستاذ ممدوح :verygood:
قانونا العربيه الصفراء او الاتوبيس الاصفر هو اللى غلطان حتى لو الامامه حمار وعاوز ياخد يمين من الحاره التانيه ليه بقى ؟
لان القانون الدولى للمرور يقول اللى فى الخلف هو اللى غلطان لانه لم ينتبه للطريق ولم يترك مسافه امان بينه وبين اللى امامه لان من الوارد العربيه اللى امامك تفصل او تقف فجأه معنى كدا كل اللى جاى من ورا يلبس فيها!!!!!!!!!!!!!!!
بس ده طبعا مايمنعش ان اللى فى العربيه اللى اودام حمار عشان عاوز ياخد يمين من الحاره التانيه وممكن يتعمله مخالفة سير فقط
اما المتسبب فى الحادث اللى ورااااااااااااا
النص اللى حضرتك عاوزه ده تلاقيه فى كتاب القانون الدولى للسير موش متذكر مين اللى عامله
ومافيش حاجه اسمها يتحمل 30% او50%
اللى بيحصل ان اللى ورا بيكتب هوا اللى غلطان وبيشيل اليله واللى اودام لو ظابط المرور عرف غبائه بيعمله هو كمان مخالفة سير خاطئ
الاستاذ ممدوح بيقول انه لو وقف فى نصف الطريق معنى كدا اللى جاى من ورا يرشق اقوله لا لانهم شايفينك بس لو واحد ماشافكش ورشق هو اللى حايتاخد مخالفه لانه جاى من وراك وسيادتك ممكن يتعملك مخالفة عرقلة سير :verygood:
اكيد انا عارف اللى ورا لا يتحمل كل الخطأ بس انتو طلبتو القانون المرورى بيقول ايه والقانون مافيهوش تعاطف فيه وقائع