الموضوع: اول عطل للسياره باسات بفتيس DSG 7 shift

المشاركة الأصلية كتبت بواسطة SAiF3S

السلام عليكم ورحمه الله

اليوم قمت بأستلام العربيه من التوكيل بالعبور , بعد تغير الفتيس كامل بكل مشتملاته

• الخطأ اللى كان موجود فى التابلوه مش موجود
• النقل سواء اوتوماتيك او تيبترونك يعمل بكفاءه
  
• العربيه حسيت انها تقيله شويه عن الاول , يعنى دواسه البنزين الاستجابه اقل
  
• العربيه رجعت بيها للتجربه على الدائرى فى بعض الاحيان على سرعه 180 بدون مشاكل
  
• لايوجد اصوات و لا شخلله ولا اى شىء كله الحمد لله ممتاز
• لاحظت على الكومبيوتر اثناء الدفع بند بمبلغ 55 الف جنيه وقلبى وقع فى رجلى
• لم ادفع غير الاعمال اللى تمت بخلاف الفتيس
  

من الممكن ان يكون تقل العربيه راجع لان الفتيس جديد زيرو .
بعد ما استلمت العربيه قعدت شويه مع مهندس الصيانه , طبعا الكلام عن خوفى من تكرار هذا الخطأ تانى مع العلم ان الضمان بينتهى 29/1/2011 الراجل كان صريح معايا للاخر كل عربيه ولها اعطال ودايما بيحدث فى الموديلات التاليه زى مفتاح السمارت للباسات كان فى مشاكل مع موديلات 2007 و 2008 و المشكله دى غير موجوده نهائى فى مو 2009 و 2010
ايضا الفتيس كان فى مشكله فى مو 2009 و بخاصه للدفعات اللى نزلت خليجى و اول دفعات نزلت فى 2009 توكيل خاصه , وقالى ان كان بيجى من الخليجى عربيات الفتيس غير عندى نهائى مش بيمشى من كتر اللعب اللى حصل فيه عن جهل , ايضا مشكله الفتيس قلت بنسبه 90% فى مو 2010 .
مو 2010 به مشكله بالرشاشات الخاصه بالموتور اى شوائب او مياه بالبنزين تبرجل العربيه و توقفها.
بالنسبه للضمان فهو سنتين بدون حد اقصى للكيلومتر , و سئلت المهندس طيب انا كده مش عندى ثقه ان الفتيس يعيش كتير يعنى ممكن بعد الضمان الفتيس يبوظ و ادفع لى 55 الف تمن فتيس جديد
المفاجأه ان تمنه الفتيس مش 30 و لا 55 الف زى ما شفت على الكومبوتر لكن تمنه 70 الف بدون مصنعيات تركيب و الخمسه وخمسون الف هى قيمته فى الضمان فقط(ممكن تكون التكلفه ) لكن سعر بيعه 70 الف

اللى عرفته ان فولكس بتتبع سياسه good well policy سياسه النيه الحسنه بس مش عارف من مين العميل و لا فولكس
واللى بها تقوم فولكس المانيا لقطع الغيار الاغلى من 500 يورو بتقيم كل عميل على حده بعد انتهاء الضمان حسب الكيلومترات المقطوعه و الانتظام فى الصيانه و ايضا حسب القطعه المعيبه
هناك حالات يتم تحمل كامل القيمه +المصنعيه و اخرى قيمه قطعه الغير و تحميل العميل المصنعيه اخيرا أقتسام قيمه قطعه الغيار و المصنعيه مع العميل

اقل مطالبات لسيارات فولكس اثناء الضمان و بعده الجولف , بيقولى مش بنشوفها الا فى الصيانه
على فكره عربيتى كانت كده لغايه سنه و ثلاثه شهور
الاودى و باكتساح اقل فى المطالبات عن فولكس حتى مع ثبات قطع الغيار فى الاثنين

كده انا نقلت لكم بكل امانه المشكله من بدايتها الى حلها , وللعلم انا غير ملزم انى اقول عن عربيه افتخر انى اركبها ان فيها عيوب لكن منتدانا عودنا اننا نتشارك فى التجارب و المعلومات
هذا الموضوع اللى حصل فى 5 ايام هى عمره 4500 مشاهده و 137 مشاركه وفى اول يوم للموضوع كان عدد المتواجدين فى قسم الفولكس 50-60 وكلها أرقام قياسيه فى المنتدى

الاهم من كل هذا هو هذا الكم الهائل من الوقت و الجهد لكتابه و متابعه كل ماكتب فى الموضوع و هو الامر اللى اثر على شخصيا و على انتظام عملى ثانيا
اعتقد ان الموضوع انتهى ولا استطيع قولها , لكن ياريت الاداره تقفل الموضوع

قبل ما يقفلوا الموضوع احب اقلك الف مبرووك و ان شاء الله خير و ربنا يباركلك فيها