الموضوع: بيانات المتبرعون لحالة زميلنا المصاب بسرطان دم

السلام عليكم , انا اسمى احمد عادل

رقمى : 0124307736

انا عمرى ما اتبرعت صفائح بس اتبرعت بالدم كتير قبل كده (اخر مرة 19 يناير)

ان شاء الله انا رايح بكرة اتبرع لمحمد

انا ساكن فى رمسيس لو حد عايز ييجى معايا يكلمنى

انا حاولت اجمع هنا كلام الاعضاء عشان اللي عاوزين يتبرعوا للاستاذ محمد ومش عارفين يعملوا ايه
التبرع
فى مستشفى الزراعيين - الدور التانى - بنك الدم
المواعيد من 7 او 8 ص حتى 8 م لذا نرجو الحرص على الحضور خلال النهار أو حتى السادسة مساء على أقصى تقدير.. وذلك بناء على كلام الأساتذة المختصين هناك حتى يمكن الانتهاء من التبرع قبل الثامنة مساء
بنك الدم بالزراعيين مفتوح يوم الجمعة لمن لا تسمح ظروفه خلال الأسبوع بالتبرع نهاراً

الطريق ليها من كوبرى اكتوبر - هتاخد الكوبرى للأخر خالص - بعد ما تنزل من الكوبرى هتمشى بالظبط 30 ثانيه وهتلاقى دخله يمين قبل مطلع كوبرى مباشره ( هو ثالث يمين هيقابلك بعد ما تنزل من اكتوبر وقصاده صينيه فيها عربيات راكنه ) - اركن هناك وهتبص يمين هتلاقى مبنى المستشفى علطول
تقولهم عاوز اتبرع بالصفائح لمحمد جمعة كامل
بياخدو عينة يحللوها وينادو عليك بعد 15 دقيقة يقولولك ينفع تتبرع ولا لأ
بعد التبرع بيعملو كارت بالتبرع واسم المريض وبيجمعو الكروت وحد من اهل محمد ياخدها آخر اليوم او حد من الزملاء علشان نريح زوجته من المشوار المتكرر ده لو انت ح تروحله خد الكروت كلها معاك
لو مش رايح يبقى سيب الكارت هناك وهما ح يبعتوه مع باقي الكروت

مسموح تتبرع بالصفائح مرة كل أسبوع
واللي كان متبرع بالدم قبل كدة لازم يمر عليه من 21 يوم إلى شهر قبل ما يتبرع بالصفائح وثلاثة أشهر حتى يتبرع بدم كامل

الممنوعين من التبرع:
كل من لديه مرض مزمن: سكر أو فيروس سي وما شابه
من قام بأي عملية جراحية مؤخراً
المصابين بفيرس سي
او اصحاب الضغط العالي لو معدي مثلا 150_90 او بياخد دوا ضغط لفترة طويلة
او الضغط الواطي لو اقل من 110 _70
المصابين بالسكر وبياخدوا انسلولين
لو رحت لدكتور اسنان لفترة اقل من 6 شهور
لو عملت اي اجراء جراحي من فترة قريبة او اتنقلك دم او اخدت اي تطعيمات

by samehrashed
لمن يريد الاستفسار عن تفاصيل خاصة بالتبرع مثل هل الضغط يمنع أو حالات صحية معينة
يمكنكم الاتصال على رقم تليفون مستشفى الزراعيين وتطلبوا بنك الدم والارقام هي:
33377665
33377670
33377674
33377677
داخلي:
123
122
120

وأنصح من سيتوجه للتبرع أن يتصل قبل ما يروح علشان يتأكد إن الأجهزة تكون فاضية لما يوصل.. لأن التبرع بياخد من ساعة إلى ساعة ونصف.. فبدل ما حد يروح وينتظر ساعة أو أكتر لغاية ما الجهاز يفضى ثم ساعة ونصف أخرى للتبرع.. يمكن يكون أفضل لمن ليس لديه متسع من الوقت أن يتصل بهم قبل ما يروح

معلومة مهمة لازم الناس تعرفها.. إن الكيس الواحد من الصفائح بيحتاج إلى 6 متبرعين.. يعني كل متبرع بيساهم بوحدة واحدة من الـ 6 وحدات المطلوبة.. بالتالي مطلوب زيادة المتبرعين علشان إحنا كنا فاكرين إن كل واحد فينا اتبرع يبقى وفر كيس بحاله وده غير صحيح..
مطلوب الاستمرار وعدم التقاعس عن التبرع لأن المشكلة مش في الفلوس وإنما في وجود الصفائح نفسها

by ابو صلاح
ملاحظات :
بعد المناقشة مع المسئول عن التبرع اتضح لنا الاتي :
المريض محتاج لكمية صفائح الفترة القادمة بشدة وبكمية اكبر من الحالية
اذا لم تفلح التحليلات للتبرع بالصفائح فيجب عليك الموافقة فورا على التبرع بالدم لان كل 6 أكياس دم = 1 كيس صفائح
بالنسبة للناس اللي بتخاف من الحقن والكلام ده انا عن نفسي والله اول مرة اتبرع وكنت مرعوب وقلبي هيقف والله بس الحمد لله وبجد والله الموضوع ابسط مما كنت أتخيل لان الهدف كبير (عن ثقة وتجربة الممرض اللي هنا ايده خفيفة جداااااااااااااااا ولا هتحس بيها والاهم علشان متتخضش متبصش على ايده وهو شغال)
في حالة لا قدر الله لو منفعش التبرع لا بصفائح ولا بدم يمكن شراء كيس دم ب 50 ج وأخد الكارت ووضعه في حساب المريض (والله أحد الاعضاء أمس لم يوافق الممرض على تبرعه مطلقا بالصفائح كان يريد شراء كيس صفائح ب 600 ج ) بس ياريت من غير ما يبلغ اهل محمد بأننا اشترينا حاجة ويسيب الكارت في مستشفى الزراعيين او يوصله بنفسه لاهل المريض وكأنه اتبرع بالدم فقط حتى نرفع عنهم الحرج خصوصا واضح انهم ناس عفيفة

ابلغنا المسؤل هناك عند اخذ العينه انه من لن يثبت تحليله امكانيه التبرع بالصفائح فانه يمكنه التبرع بالدم وتمت الموافقه بعد تاكيده ان هذا الدم لن يذهب لمحمد حيث انه ليس بحاجه له ولكنه سيستبدله بصفائح دون دفع مقابل. اي ان التبرع بالدم سيوفر صفائح لاخونا محمد وهو مانصبو اليه..

by alaa74
أناشد كل الاخوى أعضاء المنتدى الكرام سرعه الاستجابه والتوجه للتبرع لمحمد حتى يكون لديه رصيد دائم لكونه سيكون فى أشد الحاجه للدم والصفئح معا بعد 48 ساعه وذلك لأن النخاع الشوكى عندة سوف يكون انتهى تماما ووا يعن انه سوف ينزف من اكثر من مكان فى جسمه وذلك حسب كلامى مع السيدة زوجته اليوم مما يتطلب منا سرعه التحرك وليس الانتظار بعد يومين مع العلم أنه لديه رصيد لمدة يومين لكن رجاء لا ننتظر لابد من وجود رصيد دائم وكافى له دائما .
وهناك أيضا رجاء من السيدة زوجته لنا جميعا هنا فى المنتدى وهو محاوله ان يكون هناك دائما منا من يزور محمد يوميا وذلك لرفع حالته المعنويه .

مكان المستشفى بالتفصيل ( المستشفى اللي فيه محمد ) القصر العيني القديم وحدة السيزيوم
لو انت جاي من المنيل ... قبل كوبري الجامعة على يمينك مسجد صلاح الدين .... تدخل يمين في الشارع اللي بعد المسجد مباشرة ... ح يبقى على يمينك المسجد وعلى الشمال مسرح فاطمة رشدي
تمشي طوالي لمسافة حوالي 800 متر لغتية ما تلاقي علة شمالك كلية السياحة والفنادق وبعديها على طول ظهر فندق جراند حياة ..... ح تلاقي على يمينك وحدة علاح امراض الدم والطب النووي واسمها الدارج ( وحدة السيزيوم ) محمد في الدور الثالث قسم الرجال - العناية المركزة
لو انت جاي من عند حديقة الحيوانات يبقى تعبر كوبري الجامعة وتدخل شمال من قبل مسجد صلاح الدين وتكمل نفس الوصف
موعد الزيارة الرسمي لغاية الساعة 4 العصر

by samehrashed
ياريت كل اللي وقته يسمح بزيارة محمد لا يتردد.. برغم حساسيته الشديدة وحرجه من ناس ما يعرفهمش.. لكنه والله يسعد جدا بكل من يزوره.. أنا لمست ده بنفسي لأني لا أعرفه من قبل.. وفرح جدا برغم حرجه وكسوفه.. ونفس الشيء مع الأخ المهندس اللي زاره وقعد معاه وهو لا يعرفه أيضاً.. والأهم إنه فعلا في حاجة إلى الحوار ونفسه يتكلم كتير.. والكلام بينسيه ويلهيه شوية عن التعب والألم.. فياريت اللي يقدر يتبرع يتبرع واللي يقدر يزوره يزوره.. واللي يقدر بس على الدعاء فله به أجر عظيم.. ( وياريت ندعيله بظهر الغيب قال رسول الله صلى الله عليه وسلم : " ما من عبد مسلم يدعو لأخيه بظهر الغيب إلا قال الملك : ولك مثل ذلك ")

وياريت الأخت الدكتورة أم حماس وأي واحدة من العضوات الفضليات تقدر تزور زوجته وتتكلم معاها وتخفف عنها لا تتردد في عمل الخير ده.. السيدة زوجته في حالة يرثى لها.. وتكاد تنهار من شدة الإرهاق.. هي بس اللي جنبه بعد ربنا سبحانه وتعالى.. هي اللي بتعمل كل حاجة.. بتتابع الدكاترة والجلسات وبتفضل تلف على الممرضات تدور عليهم وتجري ورا الدكاترة في ممرات القصر علشان تجيبهم يشوفوه.. وهي اللي بتنزل تروح تستلم أكياس الصفائح من الزراعيين وترجع بيها القصر مرتين يومياً.. والحقيقة لو راجل بصحته كان لازم يتهد وينهار لوبيعمل يومياً اللي بتعمله الست دي.. وهي فعلاً توشك على الانهيار.. طبعاً كل ده غير الضغط العصبي الشديد فضلاً عن تعب الحمل.. كما علمت أنها تقريباً لا تأكل وده معناه خطر شديد على الجنين.. والمسائل دي ممكن السيدات العضوات يساعدوها فيها بالنصيحة أو بالتشجيع أو حتى بالمشاركة يعني لو واحدة تاخد أي أكل أو فاكهة أو أي حاجة وتجبرها تاكل معاها.. واحدة تانية تروح تقعد معاها بس ولو ساعة واحدة في اليوم تخفف عنها وتتكلم معاها.. إحنا ما ينفعش نعمل كدة فياريت أيتها الآنسات والسيدات الفضليات اللي تقدر منكن على الخير ده ما تتردش

د.شريف
0105054204
للأسف أنا مركب دعامة للقلب و باخد مسيلات للدم بتقلل الصفائح الدموية لمنع التجلط على الدعامة. بس الحمد لله بساعد بطرق أخرى و بعلاقات داخل القصر العينى ووحده العلاج الإشعاعى.
لو فيه مشكلة داخل القصر العينى أنا حاضر طوال الوقت. و تحت أمركم فى أى مشواير ليلا من 8 الى 12 ليلا.

المشاركة الأصلية كتبت بواسطة د-شريف

د.شريف
0105054204
للأسف أنا مركب دعامة للقلب و باخد مسيلات للدم بتقلل الصفائح الدموية لمنع التجلط على الدعامة. بس الحمد لله بساعد بطرق أخرى و بعلاقات داخل القصر العينى ووحده العلاج الإشعاعى.
لو فيه مشكلة داخل القصر العينى أنا حاضر طوال الوقت. و تحت أمركم فى أى مشواير ليلا من 8 الى 12 ليلا.

عفوا نسيت أذكر إننا محلناش موضوع تنظيم التبرعات المادية لشراء الصفائح الجاهزة من الشبراويشى أو vacsera .أنا عارف إن الموضوع ده حساس شوية بس حيفيد جدا فى الضرورة. أنا حاولت ألاقى حد من قسم السيزيوم يجمع التبرعات من الأعضاء و يشترى بيهم الصفائح لمحمد و يسلمها لزوجته ككوبونات (بدون علمها طبعا إنها مشتراه) و لقيت شخص فعلا بس بصراحة مطمنتش منه. فياريت يكون حد من المنتدى محل ثقه يتولى هذا الموضوع أو يكون بيزوره بصفة دورية.لأن الحل البديل هى تسليمها لزوجته. ياريت نفكر مع بعض.

السلام عليكم جزاكم الله خيرا على هذه الروح
انا د محمد حسن من الشرقية
ده رقمى:0101626586 او0111018739
ممكن اروح على السبت او الاحد ان شاء الله