الموضوع: طب لو الواحد بيدور على عروسة!!!!!!!!!!!!

و الله بما اني بفكر في الموضوع ده بقالي فترة هقول على كام حاجة الاول:
الجواز شئ جميل في حالة الاختيار الصحيح و شئ لابد منه و الدليل على كدة ان ربنا سبحانه و تعالى قال في القران "و جعلناكم شعوبا و قبائل لتعارفوا"

الحاجة الثانية ان زي ما فيه عضو هنا قال ان كل حاجة في حياتنا عاملة زي البطيخة انا اتفق معاك بس مع تعديل بسيط هو ان كل حاجة بالنسبة لنا عاملة زي البطيخة لكن ربنا سبحانه و تعالى محددلنا هنتولد امتى و هنموت امتى و هنتجوز مين و نخلف مين الخ...

الحاجة الثالثة ليه في ناس كثير شايفة ان موضوع الجواز ده عامل زي حرب او مباراة كلوا عاوز يطلع كسبان منها ؟ انا شايف الموضوع اسهل من كدة بالرغم من اني معنديش خبرة كافية بس حاسس بكدة ان زي مثلا لما تيجي تشتري حاجة انت عاوز تشتري باحسن سعر و البائع عاوز يبيع و يحقق مكسب مظبوط منفعة متبادلة نفس الفكرة في الجواز انت عاوز تتجوز علشان تعف نفسك و تدخل حياة جديدة بخبراتها الجميلة و المؤلمة و تعيش حياة غير اللي كنت عايشها و اللي ممكن تغيرك للأحسن و البنت بردو اهلها عاوزين يطمنوا عليها و هيا بردو عاوزة تعف نفسها و تلاقي حد تعتمد عليه و يخاف عليها و يصونها يبقى فين المشكلة بقى؟

المشكلة في الاختيار من الاول لأن مش كل الناس بتعمل زي صاحب الموضوع و اغلب اللي ردوا عليه انهم يحددوا الاولويات بتاعتهم و يحددو هما عاوزين ايه فيه ناس كثير بتبقى عاوزة تتجوز علشان اهلهم عاوزينهم يتجوزو او بيبقى عاوز واحدة شكلها حلو ميعملش حاجة معاها غير انهم يقعدوا يحبوا في بعض طول النهار و بس خلاص مش ده الجواز

اهم حاجة انك تاخد بنت محترمة و متدينة و بنت ناس محترمين و مربين بنتهم كويس و بالتالي يبقوا هما كمان ناس كويسين و من الاول تحط النقط على الحروف معاها و مع عيلتها فيما يتعلق بالماديات و تتفوقا على كل حاجة قبل قراية الفاتحة و صدقني بعد كدة الامور كلها هتمشي بعضها ( و ده اللي حصل مع جوز اختي و الحمد لله ربنا يديم عليهم سعادتهم يا رب ) نيجي بقى لشخصية البنت و دي في رأيي حاجة في منتهى الاهمية لأنك مش هتتجوزها و متتكلموش مع بعض لأ لازم يكون في توافق و مكان تلتقوا فيه مع بعض علشان متزهقوش من بعض و اللي بيحدد الموضوع ده انت من خلال مقابلاتك ليها و لازم لازم لازم لازم تكون للبنت شخصيتها المستقلة علشان مش اي حد يأثر عليها بكلمتين تلاقيها قلبت 180 درجة و تكلمها انت كلمتين ترجع طبيعية

بصو انا مش عارف اللي انا كاتبو ده مرتبط ببعضو ولا لأ او مفهوم ولا لأ بس ده اللي جاي في دماغي

و لصاحب الموضوع استخير و ادعي ربنا انو يرزقك الزوجة الصالحة و الذرية الصالحة من قلبك و راعي نيتك و ربنا ان شاء الله هيوفقك للخير و متنساش ان الرسول عليه الصلاة و السلام قال ان الشباب القادر على الزواج لازم يتجوز (فيما معنى الحديث) و اهم حاجة بقى متنساش تبقى تعزمنا على الفرح او على كتب الكتاب حتى =)