خلااااااااااااااااااااااا ااااااااص جبت أخرى، هو أنا عجيبة الدنيا التامنة؟
امبارح كنت هتخانق فى الشارع مع واحد معرفوش، ليه، لسبب عجيب لحد دلوقت مش قادر افهمه.
الحكاية يا اخوانى انى بنى أدم معايا شمسية.
متستغربوش، الحكاية ببساطة انى متعود من زمان يبقى معايا شمسية فى العربية صيف شتا، و ساعة ما تكون الشمس ملسوعة أو مطر زى اليومين دول، باستخدمها و بعتبر ده منطقى و عادى، المشكلة بقى فى نظرات الناس ليا و انا شايل الشمسية سواء مفتوحة أو مقفولة، الأول مكنتش باخد فى بالى بس بقت حاجة تتعب الأعصاب خصوصا اليومين دول علشان المطر متقطع و غير متوقع فساعات كتير بمشى و الشمسية مقفولة و يا للهول، تقولش واحد من الفضاء ماشى و لا ماشى بكلم نفسى و بقطع هدومى، أغلب الناس عمالة تبص عليا و على الشمسية.
امبارح بقى الأخ الظريف اللى لا اعرفه و لا يعرفنى اجرى معايا الحوار ده فى اسانسير مستشفى:
- حلوة الشمسية دى
- اتفضل
- شكرا، دول يموتونى فى البلد لو مسكتها
- ليه يعنى؟
- هيقولوا مش قادر استحمل نقطتين ميه
- هو انت لازم تتبل و يجيلك برد علشان تعجبهم فى البلد
- برد مين يا بيه اللى يجيلنا، ده بيجى للبهوات اللى مش قادرين يستحملوا نقطتين الميه من عربياتهم لفيللهم
سكت و بصتله بقرف من فوق لتحت و اديته ضهرى و كنت عاوز اديه بالشمسية فوق نفوخه بس مسكت نفسى.