اللى يضحك فى الموضوع ان الدنيا لما تمطر - الشخص اياه الى قابللك فى الاسانسير فاكر انه لما يمسك جرنال و يغطى به راسه و ينقط عليه مية و حبر اصح من انه يمسك شمسية .

ما هو نفس موضوع الشمسية يشابه الكثير من المواضيع التى لها نفس التأثير

يعنى لو لبست بالطو وتر بروف مثلا حتى لا تبل ملابسك من المطر سوف يكون شكله غريب لدى البعض ، و لبست نوع من اغطية الرأس من الفرو مثلا فى عز البرد لحماية رأسك من الطقس الغير عادى ممكن ده يبقى يبقى برضه غريب فى نظر بعض الاشخاص .


و لو سايق عجلة رياضية و لبست جاكت به علامات مضيئة فوسفورية بشكل معين حتى لا تصدمك السيارات التى قد لا تراك فى الظلام الناس سوف تستغرب المنظر .

ده بأة لو شلة من الشباب المنتشر فى البلد اليومين دول لو استلموا واحدة لابسة بالطو و كوفية و غطاء رأس و معاها شمسية حيستلموها تريقة .

المشكلة ليست فى الشخص اللى سألك على الشمسية ، لكن فى اعتقادى ان الموضوع له علاقة بأن معظم الناس اخدت ان الواحد لازم يبقى لابس بنطلون و قميص فى الصيف و جاكت فى الشتاء
و اى حاجة تانية سواء ملابس او معدات تبقى غريبة و ده يعكس اننا شعب غير عملى - و فى احيان كثيرة نهمل عمل اشياء ممكن يكون لها اثر ايجابى على حياتنا او صحتنا بسبب انها غير مألوفة لدى الاخرين و العكس صحيح - نلتزم بأشياء ممكن يكون لها اثر سلبى بسبب انها اشياء مألوفة لدى الاخرين .

يعنى كل واحد حر فيما يفعله - انا ممكن احب امسك شمسية - احب انى لا امسك شمسية و الموضوع لا يخرج عن
هذا النطاق و الكل متفهم لكن ان شخص يمشى فى الشارع يقول لشخص اخر ايه اللى لابسه ده او ايه اللى انت ماشى بيه ده او حتى يبحلق فى عباد الله ده لابس ايه و ده عامل ايه و يتدخل فى شئون الاخرين هو ده بصراحة الاستفزاز .

طبعا عدم الالتفات الى الاخرين طالما انت شايف انك ملتزم بالشكل اللائق هو الحل بس طبعا برضه المسألة محتاجة مستقبلا الى تغيير جذرى فى السلوكيات