السلام عليكم ورحمة الله
انا كنت ماشي في امان الله ومشغل التكيف وفجأه لقيت صوت غريب زي كركره طالع من الموتور وفضلت ماشي شويه ييجي 2 كيلو اسمع الصوت جي منين ولقيت التكيف قلب بسخن والتبريد راح وبعدين لمحت مؤشر الحراره اتصدمت لقيته على H على آخره
وطبعاً وقفت ومن حظي الجميل اني وقفت فوق الكوبري الجديد بتاع محور صفت اللبن
ولقيت دخان بالهبل طالع من الكبوت رحت واخد الطفايه وقماشه وبليتها ميه وفتحت الكبوت والحمد لله ملقيتش حاجه والعه وشفت قربة الميه لقيتها على full عادي وبعدين استنيت لما بردت وفتحت غطا الراديتير ملقيتش ولا نقطة ميه
وفضلت واقف شويه ماسك ازازة ميه اشاور للعربيات ووقفلي تاكسي ابن حلال جابلي جركن كبير وقالي دور العربيه وقعد يملى الراديتير والعربيه اخدت الجركن كله وبعدين مشيت والمؤشر على المنتصف لحد ما روحت ونزلت الجراج وسمعت صوت زي ما يكون سبراي بيرش والبخار طلع تاني رحت نازل فاتح الكبوت لقيت البخار بيطلع من ناحية الغطاء او جنبه ولقيت المياه كلها نزلت تحت العربيه في ثواني رحت راكنها وطالع ومش عارف اعمل ايه
انا عمري ما اتأكدت من مية الراديتير لانهم بيملوها في التوكيل وانا كنت في التوكيل الاسبوع اللي فات وكمان القربه مليانه ليه موصلتش للراديتير ،هل بسبب ان مفيش ضغط يسحب الميه ؟؟ ولا ايه ؟؟
وهل في حاجه تانيه اتأثرت بالموضوع ده ؟؟ واخيراً اروح لمين في الجيزه (انا ساكن جنب جامعة القاهره)
لان التوكيل بعيد واكيد العربيه هتسخن في الطريق لو رحتله