الموضوع: تقيمي لمركز خدمة السبع – صيانة الألف كيلو

الأخوة الأعزاء فى المنتدى الجميل
ذهبت الى مركز السبع من كام شهر لصيانة ال50000 وكان فيه غربلة فى الدركسيون فوق ال100 كم و أخبرنى المهندس بسيطة نعمل ترصيص قلت وماله و بعد أن أنهيت الصيانة 4 ساعات وسلمنى العربية و كله تمام (و نظراً لعدم وجود طريق يصلح لتجربة السيارة على سرعة 100 كم) قمت باستلامها وعلى الطريق الدائرى إكتشفت أن العيب هو نفسه إتصلت بيهم مرة أخرى بمنتهى الذوق قالولى شرفنا بكرة يا أفندم وهنعمل اللازم و بالفعل رجعتلهم تانى (ساكن فى 6 أكتوبر) ودخلوا العربية للترصيص و رصصوها تانى تخيلوا فى 3 ساعات و كلمنى مهندس من الورشة و يقوللى العربية دى كانت بتعمل صيانتها فين قولتلوا عندكم من يوم ما إتولدت. فإستغرب جداً بعد أن وريته دفتر الصيانة الدورية (ماعرفش الكمبيوتر عندهم فايدته إيه) و طلع معايا جربناها فى طريق مكسر جنبهم قلتله العيب زى ما هو قاللى لا يا باشا إزاى ده كله تماااااااام ...... قلت يمكن هو برضه مهندس و انا طبيب بيطرى باسوق من 20 سنة بس و خبرتى على قدى ومشيت على الطريق الاقى العربية فيها نفس الغربلة (حسبى الله ونعم الوكيل)؛ إتصلت بيهم مرة أخرى بمنتهى الذوق قالولى شرفنا بكرة يا أفندم وهنعمل اللازم ............يا سلام...........إنتوا عاوزين واحد فاضى.
المهم من يومين قلت أجرب المركز اللى أنا متعود عليه من زمان لإصلاح العجل (مركز الأهرام بشارع الملك فيصل) ورصصت العجل عنده العجلة ب7.5 ج طلع إنهم فى السبع بيرصصوا العجل بإضافة الرصاص الجديد على القديم و المفروض يشيلوا القديم الأول ثم يضعوا الجديد يعنى هو شال 120 جرام قديم ووضع 45 جرام جديد فى إحدى العجلات...........المهم العربية ما شاء الله عليها تسلم إيديهم وده فى خلال يمكن 0.5 ساعة.
فاذا كان الإهمال فى حاجة بسيييييييطة مثل الترصيص فماذا يحدث فى باقى الصيانة؟ و هل يقوم المهندسون بواجبهم الرقابى على الفنيين؟ و ما فائدة المبالغ الكثيرة و ضريبة المبيعات اذا لم تكن الخدمة الفنية توكيل بجد؟
وعموماً انا واجهت نفس مشكلة الخدمة السيئة من قبل مع توكيل تويوتا فالمشكلة ليست قاصرة على مكان واحد بعينه ولكن كيف تاخذ حقك بدون إضاعة وقتك و مجهودك و مالك؟ و إعذرونى على الإطالة