الموضوع: الظاهر الصينين هايعملوها ويفكروا ويبتكروا ....تفتكروا!....شوفوا الابداع بنفسكم.

المشاركة الأصلية كتبت بواسطة dr_no

هو انا مش فاهم اوى دة عباره عن ايه

ده" قطر" بس مبيقفش في محطات يعني الركوب أو النزول بيبقى عن طريق عربيه فوق القطر بيسيبها بالناس اللي حتنزل وياخد غيرها بالناس اللي حتركب وكل ده من غير ما القطر نفسه يقف.. وأحب اقول ان الصين عندهم صناعات احنا في مصر ممكن بس نحلم بيها بس العيب في المستوردين عندنا اللي بيستوردوا حاجات تعبانه بدليل ان الصين بتصدر بردو لأمريكا

انا عايز اقوللكم رأيي
عن تجربه
انا بستورد شغل من الصين
وبكون هناك معظم السنة يعنى من 5 الى 7 شهور
اوقات بكون فى شينزين وأوقات كوانزو
شينزين فيها مصانع ..
وكوانزو معظمها معارض ... وشركات شحن ( ودا علشان كوانزو قريبة من هونج كونج )
والشحن من هونج كونج دلوقتى ارخص من شينزن
دا علشان الناس اللى اكيد هاتشكك فى رأيي
رأيي بقى ...
ان احنا راسمين صوره للصين مغايره عن الواقع تماما
بمعنى ان احنا شايفين الصين ( جوده قليله - سعر قليل) وكتير مننا شايف ان المستورد هوا السبب
ودا غلط جداااااااااااا
اول حاجة الصين بتصدر لكل دول العالم
فى اتفاقيات تجارة مشتركة بين كل الدول طبعا
احنا التجارة الخارجيه عندنا فقيره جدااااااااااا
بمعنى
اتفاقياتنا مع الصين كللها محتاجة إعادة صياغه لأن احنا مش جايبين سيرة اى الجوده فى اى شئ فى اتفاقياتنا مع الصين
بالتالى ده ضوء اخضر لأى مستورد انو بيعمل اي حاجة فى ظل المنافسة غير الشريفه اللى هنا فى مصر
يعنى انا لما اعمل مروحة هاى كواليتى سعرا افتراضا 300 جنيه
يجي واحد تانى يعمل نفس الشكل ب 200 بس
المستهلك للأسف بيقول مفيش فرق ده صيني وده صيني (المنافسه غير شريفه هنا )
بالتالى كللنا بنتصارع على اللى هايجيب اقل سعر ومش مهم الجوده (المستهلك مش فاهم حاجة -كللو صيني)
لما وزير التجارة حب يقلل من المنتجات الصينيه ( ودا غلط هوا مش احسن من امريكا اللى سوقها كللو متجات صينى ) عمل اتفاقيه مؤخرة بتقول ان المستورد لازم يجيب الفاتورة الاصليه من المصنع
وهناك المصنع لازم يديك فاتوره بالسعر المظبوط علشان البضاعه مش هاتطلع من هناك إلا اذا كانت الفاتورة مظبوطه ( دا بند من البنود المعدله )
الأول كان المصنع بيطلع فاتوره بسعر أقل علشان الجمارك هنا تكون أقل
بالتالى لما دلوقتى الجمارك هاتزيد عليا كمستورد
انا هاقلل فى الخامة علشان اقلل من الفاتوره .... قشطة كده ؟
والمستهلك يشرب
اتفاقية عقيمة مش هاتقلل من البضاعه الصينيه لأ بالعكس هاتبوظ الجوده اكتر
نيجى لأمريكا بقى
اكبر الشركات العالمية
ليها مصانع فى الصين
اولهم شركة ... أبل
وليس اخرهم
دول بيهتمو اكتر بالكواليتى
عندهم اعفائات جمركيه معينة
شعب فاهم كويس (مش هايقول دى صينى )
منافسه شريفه (ضامن انو اكيد محدش يايلعب معاه ديرتى فى السوق لأن اللى هايلعب معاه خسراااان طبعا )
لأنو مش هايقدر يغير فى الجوده حاجة وإلا بضاعته هاترجع مع اول لجنة فحص ع المنتجات
وهوا ده السبب بجد
بس الصين لا غبار عليها فى اى حاجة
............
اسف لو طولت عليكو
اتمنى تكون الصوره وضحت

المشاركة الأصلية كتبت بواسطة mahmoudtork

وأحب اقول ان الصين عندهم صناعات احنا في مصر ممكن بس نحلم بيها بس العيب في المستوردين عندنا اللي بيستوردوا حاجات تعبانه بدليل ان الصين بتصدر بردو لأمريكا

أحب أوضح كلامي لمل قلت ان الصين عندهم صناعات احنا ممكن بس نحلم بيها وانهم بيصدروا لأمريكا (حاجات بجوده أعلي 100 مره من اللي بتتصدرلنا)مكنتش أقصد الحاجات اللي بيصنعوها بنظام ال offshoring أو global sourcing زي الكمبيوترات اللي اتكلم عليها الأخ omarken اللي بتتصنع بمواصفات المصانع الأصليه ورقابة مهندسينهم وكل علاقة الصين بيها بس عمالتهم الرخيصه أو سهولة أنظمتهم الجمركيه. لأ كان كلامي على صناعات الصينيين نفسهم بيستخدموها جوه بلدهم زي الكباري مثلا" اللي الصين بتبنيها وتتحدي اختراعات غيرهم وتعمل أرقام قياسيه جديده في الطول أو صعوبة المكان اللي حتتبنا فيه... وأحب اقول ان غرابة اتفاقيات الحكومه أو ان المستهلك مش فاهم وبيقول ده صيني أو ان مفيش مواصفات قياسيه مصريه مش مبرر للمستورد ان يستورد منتج بخامات ضعيفه لأن الناس ده (الصينيين) دايما" بتبص لقدام واللي بيعملوه ده اسمه dumping (سياسة الاغراق)وليهه كذا نوع ونوع منهم انهم ممكن يبيعوا أقل من التكلفة لحد ما يدمروا الصناعات المحليه وبعد ده ما يحصل الناس اللي معندهاش ضميرمن المستوردين اللي كان منهم بيستورد حاجه بملاليم ويعملها هنا سعر ويكسب فرق كبير طبعا" حيحب يحافظ على مكسبه فحيزود السعر وطبعا" لأنها ملهاش بديل محلي فالمستهلك هو اللي حتتطلع عينه لأنه حيضطر يشتري حاجات مش بتعيش ولا تستحمل بالغالي وعشان كده مثلا" بعض الحكومات بتعمل حاجه اسمها export quota (حصة تصدير) مثلا" زي أمريكا لما عملت اتفاقية زي ده مع اليابان بسبب شركة تويوتا والاتفاقيه بتكون ان الدوله المستورده(أمريكا) تخلي الدوله المصدره (اليابان) تقلل صادراتها ليها والا بلاش خالص وفى الحاله ده اليابان وتويوتا يخسروا السوق الأمريكي كله بس طبعا" احنا مش في أمريكا ولا كل الناس عندها ضمير.....والله أعلى وأعلم