اقتباس المشاركة الأصلية كتبت بواسطة mrsailor مشاهدة المشاركة
و الله انا ماشفتش حد معاه رينو و مرتاح .. هى مش مشكلة مطب و ثبات و بس لان فى عربيات فيها المواصفات دى و احسن من الرينو .. فايه اللى يخليك تختار الرينو و تسيب العربيات التانية .. و كمان لما تختار عربية اختار حاجة الصنايعية فهماها و السوق بيحبها .. لان العربية فى مصر مع غلو الاسعار ما ينفعش تاخدها بالشكل و الامكانيات و بس لازم تحسبها من كل النواحى .. توكيل - اعادة بيع - اعطال - صيانة .. ممكن تشوف المشاركات اللى على الرينو و تشوف مشاكلها ده بالنسبة لصاحب الموضوع .. و بالنسبة ليك ربنا يبارك لك فى عربيتك و يكفيك شرها
ما الأعضاء هنا كلهم معاهم رينو والحمد لله مرتاحين ومبسوطين بيها جداً وعلى فكره انا بتكلم من واقع تجربه شخصية
يعني حضرتك أنا كان معايا هيونداي النترا 2006 من الزيرو وكنت بعمل صيانتها وكل حاجه في مواعيدها وبعدين شفت اللي بيحصل في الهيونداي من حوداث وعربيات مقلوبه والناس بتطلع منها متبهدله أد إيه دا بخلاف غبور الي سمعته سبقاه
شوف حضرتك هيونداي موديل 2006 ومافيهاش لا إي بي أس ولا اريباجه واحده حتى ولا طبعاً إي بي دي ولا أي سنسور من الموجود في الميجان والصاج بتعها ورق والله ورق دا مره واحد صاحبي بيهظر معايا وخبط الصاج بتاع الرفرف بايده الصاج دخل مطلعش وروحت لسمكري علشان يرده على البار ومرجعش زي الأول
انا مانكرش ان الهيونداي النترا كان ثباتها ممتاز لأني جبت بيها 210 كم/س على طريق اسكندريه الصحراوي بالليل قبل التعديلات اللي بيعملوها فيه الطريق بس فرمل بقى كده شوف هاتقف في ادي ايه وامتى!!!!!!!!!!
انا اول ما اشتريت الميجان ومتعود على فارمل الهيونداي بفرمل لاقيت العربية وقفت مرة واحده اتخضيت واخدت وقت على ما اتعودت على الفرامل بتاعة الميجان اللي بتشعرلها بتقف
وبالنسبة للثبات الميجان برغم إن التعليق الخلفي مش ازرع متعددة زي الالنترا بس الثبات واحد تقريباً وذلك برغم من ارتفاع الميجان بالنسبة للهيونداي عن الأرض
ميزة هوينداي طبعاً إن أي ميكانيكي بيعرف يشتغل فيها وقطع غياراها ارخص مش بكتير يعني بس أنت لو رحت تجيب الاوريجنال من التوكيل هاتعرف إن مافيش فرق بين أي توكيل وغيره لان كل التوكيلات غاليه
وبالنسبة الميجان اخدت وقت علشان اعرف الناس المتخصصة فيها وبعد ماعرفتهم بقت كل حاجه سهلة ولذيذة
وخلي بالك لما بتقيس تكاليف إصلاح مشاكل السيارة بتقيسها بممزاتها يعني ما ينفعش تقولي مثلاً (ودا على سبيل المثال فقط) إن شريط الاريباج عاوز يتغير ب 500 جنيه وهيونداي الي اصلاً مافيهاش ايرباج مش هاتدفع ال500 جنيه دول فكده انت جبت الأحسن والأرخص
فخلي بالك أنت بتدفع تمن الاوبشنز اللي في العربية مرتين مرة عند شراء العربية ومره عند شراء أو تصليح قطع الغيار ودا في كل العربيات يعني عربيه بتكييف تكلفة صيانتها أغلى من لما تكون عربيه من غير تكييف
وخلي بالك الجمارك على السيارات الاوربية بتنزل كل سنة بداية من 2010 ودا بينزل سعر المستعمل (الاستيراد) وقطع الغيار الجديدة كمان
وبعدين من الآخر وعن تجربه وبصراحه انا ماندمتش لحظه إني جبت الميجان وبعت الالنترا الي كانت معايا من الزيرو بالعكس ميجان دي ركوبه وكل اللي معاه ميجان يعرف معنى كلامي ده