الموضوع: حصري لنايل موتورز-اشحن تكييف عربيتك بإيدك...بالصور

جزاك الله كل خير.....انا اتبعت خطواتك يافندم وشحنت التكييف بنفسي وبسم الله ماشاء الله زي الفل وفعلا اوفر من اني اشحنه بره عند الصنايعية.....ربنا يباركلك فعلا

المشاركة الأصلية كتبت بواسطة exact

بسم الله

بعد كتر كلام الزملاء عن موضوع شحن الفريون بنفسهم وبعدين لقيت برودة التكييف مش قد كده...قررت اني اضحي واكون اول المجربين في الموضوع ده...

[caution][/caution][caution]

أرجو ملاحظة ان الموضوع ده كان فيه مخاطرات كتير وخد مني مجهود جامد سواء شغل او اعداد او كتابة لذا ارجو عند نقله للفائدة ان يكتب منقول ويحط لينك الموضوع هنا...ويا سلام لو تدعوا لي اي دعوة حلوة تدعوا بيها لنفسكم حتى ولو جزاك الله خيرا

[/caution]
[caution]

[/caution]

توكلت على الله ورحت جبت اللوازم

وقبل ما نبتدي الحكاية حابب اني أأكد ان الموضوع ده تجربة شخصية وكل واحد يتأكد من نظام التبريد عنده وعلى مسئوليتة الشخصية

ونرجع لمرجوعنا ونبتدي...أول حاجة قعدت دورت على النت و عالمنتدى على مواضيع مشابهة...فلقيت ان الحكاية بتبدأ من انك اولا لازم تحدد نوع الفريون اللي موجود في التكييف...وبعد بحث لقيت انك عندك نوعين غالبا همه اللي مستعملين فالعربيات...

اولهم واقدمهم فريون 12 وبيرمزوا له بحرف R-12 وده اقدم واقوى بنسبة بسيطة في تبريده ويعيبه اضراره بالبيئة ولذا تم ايقافه في اوروبا وامريكا وعملوا له بديل من ممزوج عدة غازات مضغوطة... ويعيبه ايضا انه له قابلية للاشتعال...مما يجعله غير مناسب للسيارات....ولكن وقتها مكنش فيه بديل فكان هو السائد من زمان وحتى في معظم التلاجات المنزلية ومعظم السيارات قبل 2000 بس ده ميمنعش ان فيه انظمة في موديلات التسعينات فيها 134

تانيهم فريون 134 وده بيرمزوا له ب R134 وده هو اللي موجود حاليا في كل الموديلات الحديثة وده طبعا العكس...غير ضار وغير مشتعل

وطبعا مينفعش اطلاقا انك تخلط 134 و12 بأي شكل ولكن يمكن تحويل انظمة فريون 12 ل 134 بطرق لا يتسع المكان لشرحها

طيب...حلو الكلام...نيجي للمهم نعرفه ازاي....لو تكييفك مكنش اتلعب فيه...يبقى عندنا بعض الوسايل...اولا لو انت موديل مابعد 2000 يبقى غالبا 134...بس برضه لازم تتأكد...وده عن طريق انك تحاول تبص على الكومبريسور بتاع المكيف وهتلاقي طبعا ورقة الشركة المصنعه وهتدور علي Refrigerant Type وهتلاقي مكتوب زي ما قلنا...

فيه طريقة تانية بس مش متأكد منها زي الورقة...هي انك تبص على بلوف الشحن هتلاقى بتاع فريون 12 اتخن من بلف العجل حاجة بسيطة وبيكون رفيع ومقلوظ من بره ال 134 بلفه اعرض بشويتين من بلف العجل وغالبا مش متاكد متقلوظ من جوة...حلو الكلام؟؟؟ واللي فالصور

هنا بلف12

ودي رسمة ال 134 وهي قريبة جدا من الحقيقة

من كتالوج الصيانة ومن البحث على النت عرفت ان الضغط المثالي بيبقى 27psi وده لمعظم العربيات.... والشحن بيتم من ناحية الضغط المنخفض....ايه الضغط المنخفض دي؟؟ شوف ياسيدي انت عندك ماسورتين فريون داخلين من حوض الموتور في صدر العربية...هتحط ايدك عليهم والمكيف شغال هتلاقي واحدة فيهم ساقعة شويتين وعليها بلف الشحن...ممكن طريقة تانية وهي اني شفت في الكورولا غطا البلف البلاستيك مكتوب عليه H و L طبعا High وLow...اللي يهمنا ال Low بس برضه نتأكد بحكاية حرارتها....ودي بتكون الماسورة اللي جايبة الفريون من التلاجة جوة الصالون للكومبريسور عشان يضغطه للسربنتينة اللي قدام في صدر العربية ويتبرد فيها بالمروحة وبكده يكون دخلنا في مرحلة الضغط المرتفع

وعلى فكرة انا عندي التكييف فابريكة (شفتو التضحية) بس ما عدا ان غطيان البلوف ضايعة

طيب اعتقد كده النظري انتهى نبدأ في العملي..وانبه ان فريوني 12

[warning][/warning][warning]

.بس قبل اي حاجة حابب احذر من ان الفريون سائل تبريد يعني اي تسريب قوي ييجي عالجلد ممكن يعمل لسعة برد ودي اشد من لسعة النار فنخلي بالنا...ونخلي بالنا برضه انه بيهيج العين جامد والنصيحة خلينا في مكان مفتوح قدر الامكان عشان لو لا قدر الله حصل تسريب نبقى في السليم

[/warning]

نعاين العدة

أول حاجة علبة الفريون...ودي زي ماقلنا قبل كده حسب نظام العربية 12 او 134 وحاليا ال 12 اغلبه صيني او مصري واللي اتقال لي ان المصري احسن... جبت نوع اسمه اخوان رزق وده ب 22 جنيه ووزنها في حدود 400 جرام... مع العلم ان السويفت لو فاضية تماما بتاخد حوالي نص كيلو...

الفريون 134 على حد علمي احسن حاجة الامريكي والمكسيكي

علبة الفريون زي ماحنا شايفين ملهاش بخاخة ولها صمام عبارة عن خرم فيه حتة بلاستيك سدة فتحة العلبة عن طريق سوستة بتزقها لبره ومتقلوظ من بره وهنعرف حالا ليه

وبالتالي عشان نطلع الفريون لازم نضغط عالبلاستكة دي ودي وظيفة ابرة او بلف الشحن ب2 جنيه هم الاتنين مع بعض

وده زي ماحنا شايفينه عبارة عن مسمار وصامولة...الصامولة دي بنربطها جامد في القلاووظ بتاع صمام علبة الفريون ولو ربطناها للأخر هنلاقي ان قلاووظ الصمام جاب نص الصامولة من جوة ونصه فاضي...

ولو شفنا الجزء اللي عامل زي المسمار ده عبارة عن مسمار مجوف فيه في طرفه ابره (اللي عاليمين دي)والابرة فيها خرم منفد على التجويف اللي جوه المسمار ...وبالتالي احنا لو ربطنا المسمار فالصامولة بحيث ان الابرة لناحية جوه هنلاقي ان كل اما المسمار يتلف سنة هيدخل لجوة والابرة تضغط على البلاستكة وتفتح علبة الفريون والفريون يعدي من خلال الابرة لبره...والعكس صحيح اما تفك المسمار الابرة تطلع لبرة والصمام يقفل...وهكذا

اعتقد لحد هنا حلو الكلام جدا

نكمل كمان يوم او اتنين عشان تعبت

==========================================

نكمل الفيلم

عندنا بعد كده مجموعة الخراطيم اللي هتوصل لنا الهلمة دي ببعضها وده الواحد عامل له 7 جنيه

وده شكل الخرطوم

وزي ماحنا شايفين ده عبارة عن خرطوم كاوتش له صامولتين بيتربط بيهم في البلوف مع مراعاة ان الناحيتين مش زي بعض

وده احد الاطراف

وده الطرف التاني

وده عامل زي الطرف الأولاني بالظبط بس فيه فرق يتمثل في وجود إبرة في منتصف فتحة الخرطوم ودي ليه؟؟؟ لأنه الطرف ده اللي بيتربط في العربية والابرة دي اما بتربط الصامولة في بلف العربية بتضغط على الابرة اللي في بلف العربية وتفتحه...تمام زي ابرة بلف كاوتش العربية.......تمام؟؟

لحد هنا كويس؟؟

وممكن بالحاجة دي نعمل عملية الشحن وانا شحنت بكده.. بس عاوزه حرص شديد جدا... واحتمال كبير انك لو مش واخد بالك تطير النفسين اللي موجودين في التكييف وتبقى خربت....فمعلش الاضمن اننا نصرف حاجة بسيطة كمان 30 جنيه!!!..بتوع ايه دول....هنجيب بدل الخرطوم اتنين... ونجيب عداد شحن ب 23 جنيه ونشحن كمحترفين

تبقى كده اتكلفت كام 22 فريون + 2 بلف + 14 خراطيم +23 عداد = 61 جنيه والعده تفضل عندك تستعملها انت واصحابك ولو ممكن بكرة تفلون (من عند بتوع الادوات الصحية ولوازم السباكة) بجوز جنيهات عشان لو حاجة سربت...ماهو كله صيني

طيب ايه العداد ده بيشتغل ازاي؟؟

زي ماحنا شايفينه هو عبارة عن محبس ملحق بيه عداد وله مدخلين واحد من الجنب وواحد من تحت (المتغطيين بالغطيان الزرق) وهو بيتركب فالنص بين علبة الفريون والعربية ولازم يكون احد اطرافه متوصل بالخرطوم ناحية العربية والطرف التاني متوصل بالخرطوم اللي راكب في علبة الفريون...طيب نعرفه ازاي؟؟

حاجة سهله خالص...احنا هنقفل المحبس كويس...ونحط حته قماش نضيفة عالفتحة عشان الرطوبة وننفخ جامد فالفتحة وعنينا عالعداد وهنا انا نفخت في الفتحة التحتانية لقيته بيتحرك حاجة بسيطة...(متفكروهاش كتير انا بالعافية جبت 5)...وغالبا معظم العدادات بيكون هو اللي تحت...

[info][/info][info]

وفيه نوعيات تانيه....منها نوع عداد مجوز...فيها عدادين وله 3 خراطيم (طقم كامل) بييجي ب 55 جنيه كله على بعضه وده نفس الطريقة بالمللي وبنستعمل غالبا فردة واحدة والمفروض نوصل التانية في جهة الضغط العالي من دورة الفريون..واللي عاوزني اشرحه له بعدين

[/info]

ودي صورة مجمعة للعدة كلها وطبعا نضيف عليها مفاتيح مناسبة 10 او 12 على حسب حجم الصواميل لزوم الربط

===هنعوز برضه لوفة وشوية صابون سائل وكمان جركنين مليانين ميه ويفضل لو خرطوم ميه مش مفتوح قوي

الكلام المفيد

دلوقت احنا اتعرفنا عالعدة...ننزل للعربية ونبدأ الشغل

نبتدي بتجميع عناصر الشحن

نوصل الخرطوم اللي هيركب العربية في الفتحة التحتانية للعداد ونلاحظ الابرة تكون في الناحية اللي هتتربط فالعربية ...زي الصورة كده

بعد كدة نركب الخرطوم اللي هيبقى ناحية العلبة

وقبل ما تسألوا الوان الخراطيم دي مش فارقة في حاجة...بس الاستاندارد...ان يبقى الخرطوم اللي ناحية العربية ازرق واللي فعلبة الفريون اصفر(ده اللي عاوز زي ما الكتاب بيقول... بس زي ما قلت كله نفس الشغل)

بعد كده نركب الطرف التاني للخرطوم بتاع الفريون في مسمار البلف بتاع علبة الفريون(المسماراللي فيه الابرة...وهو مش متركب في علبة الفريون)

أنا هنا فالصورة لافف عليه تفلون عشان سرب معايا (انها الصين يا ولدي)

ونركز جدا فاللي جاي

دلوقتي أول حاجة نقفل المحبس كويس و نربط بسرعة جدا الخرطوم اللي بيحرك العداد (الاصفر في الصورة السابقة).. في بلف العربية ابو ضغط منخفض(اللي عالماسورة الساقعة) ليه بسرعة؟؟عشان انت اول ما هتحط الخرطوم الابرة بتاعه هتضغط عالبلف بتاع التكييف تفتحه...فلازم السرعة منعا للفقد الفريون

.وعلى طول هنلاقي العداد طلع قراءة...المفروض انها حسب عربيتي لو التكييف مشحون مظبوط متزيدش عن 27psi...

بعد كده بسرعة جدا نفتح المحبس حبه صغيره جدا لمدة 3 ثواني نسمع صوت هسسسسسسسس عشان نخرج شوية فريون من الدورة فالخراطيم والحركة دي عشان نطرد الهوا من الخراطيم ونقفل المحبس كويس

ندور العربية ونشغل التكييف على اقصى سرعة للمروحة ونفتح شباك عشان مش عاوزينه يفصل..

نجيب علبة الفريون ونخللي بالنا جدا انها لازم تكون عدلة في وضع رأسي طوال عملية الشحن (الصمام لفوق) ونحاول منرجهاش

وبعد كده احنا كنا رابطين الخرطوم التاني(الأحمر) في مسمار البلف ومجهزينه...بعد كده نمسك علبة الفريون بالشمال ومسمار البلف باليمين (او العكس) وندخلهم في بعض ...ونثبت المسمار..ونلف العلبة واحدة واحدة لحد ما هنحس انها فتحت وده عادة من قبل نص مشوار المسمار فالصامولة اللي عالعلبة...اوك؟؟

يبقى كده الفريون بتاع العربية دخل وفريون العلبه دخل واللي حايشهم عن بعض المحبس...ونأكد تاني نخللي العلبة في وضع رأسي....نحضر الجركن بتاع المية....ونكب شوية ميه على سربنتينة التكيييف اللي جنب الردياتير بس نحاول قدر الامكان نبعد عن موتور المروحة..

واحدة واحدة نبدأ نفتح المحبس بتاع العداد...وكده الفريون هيعدي من العلبه للدورة ونعرف كده اننا هنلاقي علبة الفريون تسقع...وكل شوية نفتح ونقفل عشان ناخد قراية العداد والمحبس مقفول...وفي هذه الاثناء حد معاك يكب ميه عالسربنتينة بتاع التكييف...وهكذا لحد ما نلاقي القراية وصلت ل 27 عندها لو بصينا فالعدسة بتاع العربية هنلاقيها غالبا رايقة ومفيش فيها اي فقاقيع نكب شوية ميه كمان عالسربنتينة ونسيبه شغال 5 دقايق وبعدين نطفي التكييف ونبطل العربية ومبروك ياباشا

خلاص شحنا التكييف وقفلنا المحبس وظبطنا القراية...نيجي لحتة مهمة ازاي نفك المسائل...

[warning]

حكاية الفك دي كل خطواتها لازم تتم بسرعة البرق ولازم منتخضش لو حصل تسريب عشان نلحق نتصرف

[/warning]

يعني اما نفك صامولة نفكها بسرعة جدا...اول مانبدأ باننا نفك بسرعة المسمار ابو ابرة اللي في علبة الفريون...بعد كده هنفك الصامولة اللي مربوطة في بلف العربية ودي بسرعة جدا...ولو سمعنا تسريب بعد ما شلنا الخرطوم نضغط عليها ببوز الخرطوم كأننا هنركبه عشان ساعات السن بتاع بلف العربية مببيكونش معدول...وبعدين نجيب اللوفة ام صابون ونرغي عليه من غير ما نضغط عشان نتأكد ان مفيش تسريب...لو مفيش تسريب يبقى ركب غطيان البلف ولم العدة واطلع نام

طيب لو فرض وواحد العملية شطحت منه وزود شحن...نعمل ايه؟؟؟ فك علبة الفريون بس...وسيب العداد بالخرطوم متوصل وافتح المحبس سنة صغيرة لحد ما تلاقي القراية ظبطت معاك

وكفايه كده عشان انا بقى لي 4 ساعات باكتب لما احوليت وأرجو ان اكون قد وضحت بشكل كافي وارجو ان يحوز رضاكم

وأي استفسار انا فالخدمة...وبأكد ان كل ده تجربة شخصية بحـــــــــــــته وكل واحد يخلي باله على نفسه مش عاوز اصابات ولا تلفيات وأرجو عند النقل وضع لينك الموضوع وكتابة انه منقول من فلان عشان انا تعبت فيه فوق ما تتخيلوا

وارجو ان اكون حزت رضا الله ثم رضاكم

تم دمج المشاركتين لسهوله تتبع شرح الموضوع
مشرف عام 4

تم تعديل عنوان الموضوع وتثبيتة
الادارة