وجب التنبيه للأعضاء بخصوص محل الكاوتش ده

**Dr.lancer** · 22-05-2010 09:50 PM

حبيت أضع هذة المشاركة للزملاء علشان ميحصلش معاهم اللى حصل لى.
النهاردة رحت أجيب الأولاد من مدرسة الأهرامات بعد الإمتحان. أكتشفت أنى جيت بدرى نصف ساعة و كان فى محل كاوتش ملاصق لسور المدرسة على الشارع الرئيسى (الشيخ الشعراوى) قلت أشيك على العجل. المهم رحت لهم و كانوا 3 أولاد فى عمر أولادى تقريبا. كبيرهم شيك على الفردة الأمامية و قال لى أنها مخرومة و فعلا كان فى فقاقيع طالعة من المية اللى بيحطها على الكاوتش. قلت يمكن أكون دوست على حاجة و خرمت العجلة. المهم قالى حنكشف عليها بسرعة و نصلحها. قلت له بسرعة علشان الأولاد على وشك الخروج من الإمتحان. المهم فكها بسرعة (لاحظ ترتيب الحوار جيدا) قبل ما يكشف عليها بعد ما فكها قالى حوار الخوابير و راح جاب المفك اللى بيركب بيه الخوابير علشان يوريه لى بالرغم انى قلت له أنا عارف الموضوع ده و مغير 4 فرد كاوتش جديدة من شهرين علشان موضوع الخوابير ده و أفضل اعملها لحام داخلى. المهم فضل ماسك المفك فى أيده و الولد الصغير بيقلب له العجلة و هو بيرش الميه بالصابون. كل شويه يطلع خروم جديدة و يعلم عليها. (الشهادة لله أنا ماشفتهوش بيعمل حاجة بإيده التانية) بس على ما لف العجلة كلها كان فى 10 خروم . أنا بصراحة كنت مصدوم. ده لو فى خرمين بس كانت العجلة نامت أكيد فى ظرف يوم. أنا كل الموضوع أنى حسيت أن العجلة دى كانت عايزه تتزود شويه. و كنت بكرة حملاها نيتروجين وأنا راجع من الشغل. وزاد و غطى أن الأولاد خرجوا من الإمتحان و سيبت العربية و جبتهم من جوه المدرسة اللى جانبه و لما رجعت قال لى أن كان فى خرمين تانيين ماكنوش باينين علشان النيتروجين كان ساددهم !!! و لما عمل التست بالهوا ظهروا. الحسبة كلها 12 خرم فى 10 جنيه لحام داخلى تبقى 120 جنية.
المهم دخلت الأولاد فى العربية و قلت له يسيب كل حاجة زى ماهى و يركب الإستبن و انا حاروح الى بتاع الكاوتش بتاعى. لما لقى أنى بايع القضية قال لى أنا ممكن ألم ليك الليلة دى ب60 جنية بدل 120 جنيه.
بصراحة أتنرفزت عليه بس قلت حتخانق مع عيال فى سن أولادى و كمان الأولاد كانوا فى العربية مخنوقين. المهم وافقت و صلح العجلة بلحامات داخلية. و هو بيركب الكاوتش سألته سؤال علشان أعرف نيته و ده اللى خلانى أبعت ليكم المشاركة دى. سألته مش حرام عليه يخلى الواحد يدفع نصف تمن الكاوتش فى تصليحه. خصوصا أنى راكب دايو يعنى مش مرسيدس ولا بى أم. جاوبنى لأ الناس دى ليها سعر تانى و شغل تانى (قعدت أفكر فى كلمة شغل تانى دى!! يعنى ايه 20 خرم بدل 10) حسبى الله و نعم الوكيل.
مرفق صورة لمكان المحل للتنبيه والمحل ملاصق لمدرسة الأهرامات للغات أخر شارع اللبينى.

**wlelw2003** · 22-05-2010 10:10 PM

حسبنا الله و نعم الوكيل و ربنا يهديهم

**mohabelnegm** · 22-05-2010 10:54 PM

ربنا يعوض عليك ..نصيحة لأى حد..لما أى بتاع كاوتش يقولك الفردة دى عايزة يتكشف عليها (لو مش باين على الفردة أنها فعلا ناقصه) قول له زودها بس و أستنى لتانى يوم لو لقيتها ريحت روح أكشف عليها لأن النصب بالطريقة دى أصبح منتشرجدا عند بتوع الكاوتش.

**ahmed_mido1889** · 23-05-2010 10:48 AM

يا باشا انا نفس الحوار حصل مع والدي
راح للراجل ده فعلا وكشف له علي الفرده قاله فيها 12 خرم وخد من ابويا 120 جنيه بس انا مستني انزله في يوم اعرفه شغله بس اللي انا عرفته انه بيبقي في ايده خاتم فيه من التاحيه التانيه مسمار
يا رب اشوفه والع

**احمد المصرى** · 23-05-2010 11:05 AM

دا حرامى كبير ونصاب

**powerofhelll** · 23-05-2010 11:35 AM

كنت ركبت الفرده و مشيت الواحد لما بيروح بزود هواء و الراجل بيقوله اكشف عليها ابدا اصل لو فيها حاجه هتظهر

**dode2002** · 23-05-2010 02:43 PM

لا حول ولا قوة الا بالله

**cyborg_ift** · 23-05-2010 02:49 PM

شكرا للتنبيه

**ramremo** · 23-05-2010 03:02 PM

المشاركة الأصلية كتبت بواسطة toola

و تقريبا اكتشفت ان اللعبة كلها فى زجاجة المياه البصابون هى البتساعد تعمل بقاليل على أى حاجة

طيب فى ناس بتحط فى الزجاجه دى مياه عاديه من غيرصابون وبتبقلل على الخرم المنفس بس واعتقد ان ده الصح لان الصابون هو اللى بيعمل فقاقيع هوا على اى حاجه !!!!
وشكرااا للناس اللى ردت ولكاتب الموضوع على التنبيه....