السلام عليكم جميعا
العربية بتاعتى اتخبطت وهية واقفة ودى مش المرة الاولى رغم ان العربية لسة بشوكها ولسة عاملة يادوب 1000 كيلو
المهم ان السايس اللى فى المنطقة اتعامل مع اللى خبطها واخد رقمة وانا كلمتة وبصراحة الراجل طلع ذوق وهيتكفل بتصليحها
هية الخبطة مش جامدة تقدروا تقولوا كدة انة ريح عليها والنتيجة كانت حكة فى الاكصدام الخلفى ونقرة فى المنطقة اللى بين الاكصدام الخلفى والرفرف هية نقرة صغيرة بصراحة بس شوهت شكل العربية خاصة وان الجنب دة كام واخد خابطة تانية قبل كدة وهية واقفة برضة مش عارف لية حاسس ان الجنب دة نحس!!!
المهم انا اتفقت مع اللى خبطها انة ييجى معايا عند السمكرى ونرد الخبطة دى
المشكلة ان انا مش عارف هل دخول العربية عند السمكرى دة ممكن يهين العربية لاحظوا ان العربية لسة زيروا ومعملتش اول صيانة وانا بعاملها احسن من مبعامل خطيبتى اساسا وانا خايف ان السمكرى بدل ما يكحلها يعميها يعنى بدل ما يدارى النقرة يشوة المنطقة كلها لان زى مانتوا عارفين داير الرفرف مع لمعان البوية فى الاضاءة اى خربوش ولو صغير بيبان فية
وياترى بالنسبة لحكة الاكصدام هل ممكن تتعالج بالبوليش خاصة ان والحمد لله البوية مطلعتش هية يادوب بهتت
انا بصراحة محتار مش عارف اسامحة وخلاص واسيبها كدة لانى خايف اوى من موضوع السمكرية دة ومن اهانة العربية
ولا اوديها وهية ونصيبها
ياريت تقولولى رايكم وخبراتكم