الموضوع: الخوف الشديد من السواقة اعمل فية اية

[QUOTE=lobna_yaseen;3872707922]

المشاركة الأصلية كتبت بواسطة saso2010

بصى بقى أنا عملت حركه عبيطه شويه بس أنا شايفه إنها فادتنى جدا وكنت نازله لوحدى علقت على شنطة العربيه لمده بسيطه كده ورقه مكتوب عليها عفوا السياره فى التليين هو الحقيقه العربيه كانت مغيره طقم شنبر وكان لازم شويه أمشى بيها بالراحه بس الموضوع ده كان عاوز مشوار بالكتير أنا طبعا سوقت فيها بجد وخليت اليافطه لمدة أسبوعين وكنت بمشى بيها تخيلى بقى إنى ماسمعتش صوت كلاكس واحد لغاية مااتعودت شويه على الزحمه والعربيات
وعلى فكره أنا عاوزه أقولك حاجه المدرب ده هو السبب فى الرعب بتاعنا ده عن تجربه لأنه بيخاف يبان فاشل ومعرفش يعلم اللى قدامه السواقه
أولا الحل إنك تشوفى مكان فاضى خالص وتسوقى لوحدك شويه لازم تبقى لوحدك وتسوقى بسرعه جدا بس مش قوى يعنى وتسوقى بالراحه جدا وتلفى وترجعى بس أدينى بكرر يبقى المكان فاضى حتى لو اضطريتى تصحى بعد الفجر لو ليوم واحد وبعدين تبقى تعوضيه فى النوم يوم تانى علشان تضمنى ان مافيش ناس فى الشارع هيبقى فيه فرق جامد وإحساس فظيع إنك متحكمه بالعربيه مش هى اللى متحكمه فيكى
ثانيا موضوع الفرامل ده أستاذ حسين قال كل اللى ممكن يتقال وأنا شايفه إنك لازم تنزلى لوحدك ولما تكونى على مطلع زى ماأستاذ حسين قال ترفعى فرامل اليد أول ماتقفى على مطلع ولما تيجى تمشى خليكى رافعه فرامل اليد ودوسى بنزين سنه لغاية ماتسمعى صوت الموتور كده العربيه هتمشى فى نفس اللحظه تنزلى فرامل اليد بقى هتلاقيها مشيت وإنتى بتنزلى الفرامل بس دى عاوزالها تركيز وعدم خوف لأنك لو خايفه هتتخضى لما تلاقى نفسك بتعملى حاجه (تنزلى فرامل اليد ) وحاجه تانيه بتحصل وهى (العربيه بتتحرك ) يعنى لازم وانتى بتنزلى الفرامل لازم تبقى مركزه فى الطريق مش فى الفرامل اللى انتى بتنزليها علشان مفيش وقت تستجمعى تفكيرك وتبصى قدامك وامشى فى الأماكن الهاديه مرتين جتى لوحدك وماتنسيش بس نور فرامل العربيه اللى قدامك من بعيد على الطرق السريعه علشان تلحقى تقفى والإشارات لو عاوزه تلفى علشان اللى وركى ياخد باله إنك هتدخلى ملف وياريت تدى الإشاره بدرى دقيقه وتهدى وقبل الأشاره برضه تدوسى فرامل ثانيه واحده كذا مره علشان يعرف انك هتهدى قبل ماتلفى بشويه بالنور بتاعك اللى هيظهر قدامه وماتنسيش تبقى فى أحد جوانب الطريق واللى مش عاجبه يعديكى وربنا يستر علينا جميعا

مرسى يالبنى على التوضيح دة لانى عاوزة اقولك انى بترعب لما يحصلى كدة بس عاوزة اقولك خبر حلو انا خرجت النهاردة بالعربية لوحدى طبعا دى اول مرة اكون لوحدى وكمان رحت بيها وسط البلد وساعة ذروة بس المهم اتكلت على اللة وطبعا كنت بترعش وحاسة ان روحى بتطلع وحياة ربنا المهم من كتر ماصوتى عالى جوة العربية وانا بقراء القران وبدعى الناس كانت بتسمعنى المهم مشيت براحة على الاول والتانى وعلى كوبرى اكتوبر وانا راجعة جبت التالت والحمد للة مشيت فى الزحمة وكنت مش مركزة مع الكلاكسات والكلام دة واستنى لو فية ميكروباص اوحاجة اقف معديش منة ولا حاجة بس طبعا مشكلتى الركنة واللى بعتمد فيها على حارس الجراج او اللى الراجل بتاع البارك اللى فى وسط البلد وبردة هو اللى طلعهالى بس عاوزة اقولك لما رجعت الجراج بيها كنت فرحانة وصليت ركعتين شكر بجد الحمد للة وبجد عاوزة اقولك ان الخطوة دى كنت خايفة منها ومرعوبة بس بعد ربنا بجد المنتدى دة فادنى بشكل رهيب وبشكرك جدا انتى والاستاذ حسين وسارة وكل الناس اللى بتشارك بجد ربنا يستر علينا ونكون سواقين جامدين ونتفوق على الرجالة انشاء اللة

المشاركة الأصلية كتبت بواسطة mostafaismail

بالمناسبة انا عمرى متعلمت السواقة فى مدارس ولا ركبت عربيات ومشيت بيها فى اى طريق قبل اليوم دة وكمان الرخصة طالعة واسطة :oc_sun1[1]:

طبعا فى ناس هتقول دة منتهى الاستهتار بس انا كنت بسوق فى اماكن فاضية كتير عربية اخويا.

بجد ماشاء اللة عليك ربنا يستر طريقك انشاء اللة ومتقولش كدة عشان متتحسدش
وربنا معاك ويوفقك فى السواقة انشاء اللة
بس حاول بردة تخلى بالك وتركز وهى السواقة عبارة عن رغبة وقدرة عشان انت كان عندك الرغبة عالية انك تسوق عشان كدة قدرتك بردة زادت ودة الفرق بين واحد بيتعلم فى شهر وواحد فى يوم وشكرا لردك

المشاركة الأصلية كتبت بواسطة hulk

الموضوع بسييط جدااا ومش محتاج الخوف دة كلة شوية ثقة بلنفس وتركبى عربيتك وتنزلى بيها ف مكان فاضى ويا سلام لو طريق سفر فااضى وخدى اقصى اليمين وامشى براحتك على الاخر 80 مثلا :) وامشى بيها مسافة 60 كيلو مثلا وبجد هتاخدى على العربية اووى وهتفهمى ابعدهاا اسرع وهتاخدى الثقة اكتر بس بدون الخروج عن حارة الطريق يمين وبس ولما ترجعى من المشوار دة هتلاحظى اختلاف كبير جدااا وخصوصا لما تنزلى زحمة هتحسى بتمكن اكتر ف العربية لان دى كانت بداية تجربتى ف السواقة كنت متخيل انى مش هعرف لاكن كام مشوار طويل ( سفر يعنى ) عودونى على العربية وبقى من ابسط الاشياء السواقة فى الزحمة وممتعة كمان :) بس هو الموضوع محتاج انك تكونى من جواكى قادرة على فكرة انك تسوقى وعدم الخوف .. الخوف سبب فشل حاجات كتير ف حيتنا !
وربنا معاكو بس والنبى ف الزحة بلاش الغرز الفجأئية الى بتعملوها دى :) الواحد بيتفاجأ بيكو بصراحة ههه .. والله الموضوع سهل جداا.. وسورى للاطالة

انا فعلا عملت كدة بس مجبتش 80 دية خالص انا اخرى 60
بس فعلا زى ماحضرتك بتقول هو الخوف يعنى انا بحاول اتخلص منة وهى المسالة بالتدريج وبعدين غرز اية بس
يارب اوصل لمرحلة الغرز انشالة حتى غرزة واحدة هههههههههههههه وشكرا لتشيجعك حضرتك مش متخيل الكلام دة بيدينا الامل كمبتدئين وربنا يستر انشاء اللة

اولا انا لسه بردة بتعلم السواقة بس مش فى مركز تعليم السيارات بتعلم مع اخويا فى سوق السيارات..اول مرة كنت خايفة موووت وجسمى كله بيترعش تانى مرة كان السوق في ناس تانية بتتعلم بردة السواقة فشجعونى الصراحة وبقيت امشى بالعربية على التانى والدبرياج اتظبط معايا وبقت الحياة بمبى وفرحت اوى ساعتها ان رجلى اتظبطت بسرعة على الدبرياج لان اخويا كان بيقولى ان اصعب حاجة اللى بتواجه اللى بتعلموا عموما هى الدبرياج
أخر مرة دى بقى عمرى ما انساها مش هتصدقى والله عملت driftبيها ودا لما مبقتش مركزة اوى زى الاول يعنى انا كنت الاول قبل ما اعمل اى خطوة اقعد افكرهى كدا صح ولا لا وبالتالى العربية بتبطل منى بس المرة دى كنت فاتحة اغانى وعماله اتكلم مع اخويا ..
فأهم حاجة خليكى relaxxxxx وان شاء الله هتلاقى الدنيا زى الفل معاكى
بس بجد زى ما الكل قال الموضوع بس حكاية ممارسة مش اكتر
وان شاء الله ربنا معاكى يا ساسو ونشوفك قريب كمان فى الautocross ههههههه
اسفة انى طولت عليكى والف مبروك على العربية وان شاء الله ربنا يكفيكى شرها

الdrift هو باللغة العربية معناه الانسياق او الانجراف
وهو زى رياضة كدا بتبقى محتاجة تحكم كويس فى العربية ودفع خلفى (غالبا) وهو انك بتشدى الهاند بريك مع الملف ويكون الدريكسيون مع نفس اتجاه الملف فبتاخدى الملف بالعرض
ملحوظة :انا عملت دريفت على قدى يعنى مش جامد اوى ودا لان اخويا كذا مرة يورينى فيديوز عن الدريفتات وازاى بتتعمل وهو بنفسه بيعملها لما اكون راكبه معاه فخلانى احب اجرب
انا مش عارفة اشرح اوى بس دا فيديو يوضحلك كلامى اكتر دا بعد اذن ساسو طبعا
YouTube - drift too fast