الموضوع: جاتلي فرصة ادرس في النمسا ومتردد ومحتاج رايكم معايا

هو حضرتك اللى هتدفع تكاليف الدراسة ولا دي منحة من الجامعة؟

لأن لو حضرتك اللى هتدفعها يبقى من رأيي خليك هنا أفضل وكمل دراستك وادرس معاها كورسات ألماني مكثفة فى نفس الوقت

واما تخلص إن شاء الله قدم على ماجيستير من هناك أو من أي جامعة آخرى نمساوية أو ألمانية سواء كمنحة أو بفلوسك بنفس المبلغ اللى كنت هتدفعه للحصول على البكالريوس

وبرضه طلع بيان من جامعتك بالمواد اللى درستها وتقديراتك واسأل الجامعة النمساوية هل هتتحسبلك المواد دي اما تبدأ الدراسة عندهم ولا هتبدأ من الصفر تماماً

فى السفر سبعين فايدة مش سبع فوايد بس!
هتتعلم حاجات كتير جدا جدا من السفر..توكل على الله و جمد قلبك....الواحد فى حياته ما يندمش على حاجة أو خطوة عملها و انما يندم على حاجة معملهاش...

بدون تردد

توكل على الله وسافر طبعا

هتحصل على البكالوريوس من جامعة معترف بيها دوليا يبقى إذن حتى لو ناوى ترجع تشتغل فى مصر هيبقى وضعك أفضل من احسن خريج من اى جامعة مصرية، وطبعا لو حبيت تشتغل فى أى مكان تانى فى العالم هيكون عندك نفس الميزة

3 سنوات من العمر مش مدة طويلة، ممكن بمنتهى البساطة تدخلهم جيش لو كملت هنا فى مصر، ثم مين قال إنهم هيضيعوا، ما إنت هتتعلم فيهم برضه حاجات مفيدة وممكن أثناء الدراسية الأولية تشتغل

لو ناوى تكمل دراسات عليا برضه هتكون فرصتك اكبر بكتير من اى خريج من جامعة مصرية

ومعلش مع احترامى للأراء اللى بتقول ادرس ألمانى هنا فمستوى اللغة عندك مش هيكون اكيد زى ما بتدرسها وتمارسها فى الحياة، وبرضه الآراء اللى بتقول كمل دراستك هنا وروح هناك إعمل دراسات عليا طيب ومين قالك إن ساعتها الظروف هتكون كما هى سواء ظروفك إنت او ظروف وشروط السفر أو توافر الفرصة، ثم برضه أكيد هيكون أداءك أثناء الدراسات العليا أفضل لما تكون متعلم هناك ومعاك لغة مش لسه هتروح تجيب الموضوع من أوله

يبقى فى كل الأحوال رأيي الشخصى إنك تسافر فورا

هيفرق كتير قوى سفرك معاك إنت شخصيا ومع أولادك - لما ربنا يرزقك بيهم - بعد كده

هيفرق فى طريقة تفكيرك ونظرتك للامور وهيفتح لك اختيارت كتير قوى تقدر تنتقى منها ما تريد