الموضوع: هل تقوم بتحديد النسل لمراعاة ظروفك أم تقول دي حاجة بتاعت ربنا ورزقهم بيجي معاهم ؟؟؟

بسم الله والصلاة والسلام على رسول الله،
سأطرح عليكم مسابقة، وإجابتها في آخر مداخلتي:
متى قامت أول حملة للتوعية بمخاطر زيادة الأسرة؟ ومن الذي أطلقها؟
(الإجابة آخر المداخلة)
أود -قبل أن أدلي بدلوي- أن وضح النقاط التالية:
- تحول النقاش إلى جدال (يعني كل واحد قاعد في ناحية وبيحدف ظلط على الناحية التانية) وده شيء غير مستحب.
- أنا ضد التشكيك في أحاديث الرسول صلى الله عليه وسلم كما ذهب بعض من إخوتي الكرام.

رأيي الشخصي (وهو عبارة عن شوية خواطر):
- فيه آلاف المناطق العشوائية المساكن فيها عبارة عن غرفة واحدة، تخيل غرفة واحدة فيها الأب والأم والأولاد، والأم والأب يمارسوا حياتهم الطبيعية بدون أي حرج، العيال تحت السرير وهم فوق. ولو عرفوا يزحلقوا العيال برة الأوضة العيال بتخرج وتكون عارفة اللي بيحصل جوة بالضبط (لأنهم ياإما شافوا الموضوع قبل كدة أو جيرانهم اللي هم عيال برضه شافوا وحكوا لهم). أنا جسمي بيقشعر لما باتخيل كدة وأظن إن فيلم حين ميسرة يناقش جزءاً من هذه المجتمعات.
- زمان كان أولاد البلد (أولاد البلد الحقيقيين) كان ليهم عادات وتقاليد وذوق عالي وحفاظ على حرمات الجار وحرمة الشارع (يعني مثلا كان اللي يعاكس بنت في الشارع كان يترقع علقة ويتحلقله زلبطة ويتزف في الحارة) نتيجة الهجرة العشوائية للقاهرة الكبرى -في السنوات الثلاثين الماضية- حصل تغيير كبير، انعدمت كل المعاني الحلوة لاولاد البلد لأن ماعادش فيه اولاد بلد، بقى فيه ابناء النازحين من بلادهم الأصلية من الصعيد والمنوفية وغيرها، ناس جات في ظروف معيشية صعبة وسكنوا في أماكن صعبة (غالباً غرفة واحدة) فتلاقي أولادهم اخلاقهم صعبة جدا، والغريبة ان الفئة دي اعلى معدلات مواليد عندهم. عشان كدة تلاقي ولاد الحي نفسهم هم اللي بيعاكسوا البنات بعد ماكانوا هم اللي بيحموا البنات (على سبيل المثال).

- معظم (بالأحرى كل) إخواني في المنتدى متيسرين مادياً (من مالكي أو راغبي تملك سيارة) ومتعلمين ومثقفين (نستخدم الإنترنت ونناقش موضوعات اجتماعية بعقلانية)، والموضوع بالنسبة لنا رفاهية أو بمعنى أصح اختياري أخلف ماخلفش، بس في المناطق اللي زي دي حد متخيل الموقف شكله ايه؟

- طيب، بالنسبة لنا كميسورين، نحن مأمورون بالتفرقة في المضاجع بين الأولاد، ومعظم الشقق حالياً 3 غرف، يعني غرفة للأب والأم وغرفة للأولاد وغرفة للبنات، طب الأوضة الواحدة تشيل كام عيل؟
زمان في البلد كان العيال بتنام في اي حتة، في الأوضة والمندرة والكنبة وحتى على ضهر الفرن ، في الحياة المدنية بتاعتنا عيالنا تنام فين؟

خلاصة كلامي، أنا ضد "تديين" كل حياتنا بالشكل ده، احنا وصلنا بكثرة سؤالنا في الدين لحد اللكاعة صرنا نسأل حتى في البوسة بين الراجل ومراته، بقينا نسال سؤال من عينة "هل يجوز للمرأة أن تستند على الحائط مع أن الحائط مذكر؟" بالذمة فيه لكاعة اكتر من كدة؟!!!!!!!!!!!!!
أصبح هناك مشايخ تشغل دماغها وتفكيرها لحد ماتطلعلنا فتوى زي بتاعة رضاعة الزميل من زميلته عشان خاطر تبقى امه.
شيخ في الجامع قعد يخطب ويجيب أدلة عشان يثبتلنا إن البندانة حرام (ان البنت تبقى محجبة بس بتلبس طرحتين تحت بعض كل واحدة بلون مختلف !!) بجد صار ينطبق علينا قول رسول الله "هلك المتنطعون" اللي هم احنا بجدارة.
أنا ابتديت أعك في الكلام، المهم إجابة السؤال أول حملة للتوعية بخطورة كثرة العيال كانت من 1409 سنة وكانت بعد فتح مصر سنة 20 هجرياً وصاحبها سيدنا عمرو بن العاص
المصدر: "النجوم الزاهرة في ملوك مصر والقاهرة"
"‏وقال ابن عبد الحكم في تاريخه خطبة عمر‏:‏ ".... فسمعته يحض على الزكاة وصلة الأرحام ويأمر بالاقتصاد وينهى عن الفضول وكثرة العيال وقال في ذلك‏:‏ يا معشر الناس إياكم وخلالًا أربعة فإنها تدعو إلى النصب بعد الراحة وإلى الضيق بعد السعة وإلى المذلة بعد العزة‏.‏ إياكم وكثرة العيال وإخفاض الحال وتضييع المال والقيل بعد القال في غير لمحرك ولا نوال ثم إنه لا بد من فراغ يؤول إليه المرء في توديع جسمه والتدبير لشأنه وتخليته بين نفسه وبين شهواتها ومن صار إلى ذلك فليأخذ بالقصد والنصيب الأقل ولا يضيع المرء في فراغه نصيب العلم من نفسه فيكون من الخير عاطلًا وعن حلال الله وحرامه غافلًا‏.‏...."
يعني صحابي جليل شايف إن أحد أسباب "النصب بعد الراحة والضيق بعد السعة والمذلة بعد العزة‏" هي كثر العيال. وانا عارف قدر نفسي وعارف اني لن ابلغ معشار علم او فقه واحد من الصحابة الفاتحين العظام كسيدنا عمرو بن العاص.
وسلام الله عليكم جميعاً وأعتذر عن الإطالة

ابو عبدالله سامحني بس انا متابع مواضيع حضرتك كلها

كلامك مستفز !!!!


احنا مسلمين و بنطبق شرع الله في كل حاجة بس براحة و بلاش هجوم علي اي حد يخالف راي حضرتك !!!!

اسف بس مس عرفت امسك نفسي اكتر من كده علي طريقة نفاش حضرتك

انا شايف ان استاذ "تاوتاو"
بيتكلم صح مع بعض التحفظات طبعا !!!

المشاركة الأصلية كتبت بواسطة أبو عبدالله

يا أخي اتقي الله في نفسك ولا تقل مثل هذا

ثم مين اللي وصل أنه بيسأل سؤال زي اللي حضرتك قولته ده
أظن انه لا يوجد فينا أحد سال مثله
وأظن ان احنا ناس مثقفه وعلى علم وليس منا من يتحدث بمثل هذه الهيافات

ولكن احب ان أذكرك أن الرسول صلى الله عليه وسلم لما وصفته السيده عائشة رض الله عنها قالت ((( كان قرآن يمشي على الأرض ))))

ممكن تفسرلي الجملة دي معناها ايه
وومكن تفسرلي يعني ايه الأسلام
وممكن تقولي يعني ايه الشريعه وما علاقتها بالحياة
وممكن تقولي هو احنا اتخلقنا ليه من اساسه

لما حضرتك تيجي تقولي لا تحب ولا ترضى ان يتم تديين كل شئ في الحياه

أمال حضرتك الدين نزل ليه من اساسه وليه انت اتخلقت من اساسه برضه

وللأسف لا يوجد انسان يعيش بدون عقيده بداخله سواء باطله او صحيحه

وعندما يعيش الانسان بعقيده فأن حياته كلها تنشا على اساس ما يعتقده

وياريت حضرتك براحه كده تراجع اسألتي لك وتحاول ان تجاوب عليها بكلام محدد
وربنا يهدينا جميعا لما فيه الصواب

طيب، أنا عارف إن الكلام كله هايتساب ويتمسك في كلمة يُساء تفسيرها. يا أستاذي كلامك كله صح وغلطي إن أنا ماقدرتش أوصل فكرتي بشكل مظبوط، وانا باعتذر عن سوء استخدام الكلمات. أنا ماقلتش أي حاجة تمس العقيدة أو تنفيها حاشا لله وسبحان الله، أنا بدأت كلامي بالتأكيد على احترام وعدم النعرض لأحاديث النبي عليه الصلاة والسلام. وبالنسبة لتقوى الله أنا باحاول اتقي الله قدر جهدي وأشكر لك النصيحة.
بالنسبة لسؤال المرأة والحائط ده سؤال سُئِل في أحد برامج الفتاوي الكتييييييييييييييييييييي ييييييييييييييييييييييييي ييييييييييرة جداً (هي كتيرة عشان هي سبوبة بتستغل اللكاعة المنتشرة بين العرب)، وكمان ده نصف السؤال لأن نصه الثاني "وهل يجوز للرجل أن يجلس على الأرض وهي مؤنثة؟!!" بالطبع أنا أعرف أنه لم يسأله أحد بالمنتدى، وخطئي مرة أخرى هو عدم توضيح هذه النقطة.
بالنسبة للسادة أعضاء المنتدى أنا امتدحت مستواهم الثقافي في مداخلتي ولم أتجاوز في حق أحد لأنني أحترمكم جميعا وأنا لم أفصد (ولا أستطيع أخلاقيا) أن أصف أحداً (أي أحد) بالهيافة.
أما بخصوص امتحان التربية الدينية، هاقدم عذر مرضي ومش هاجاوب عليه لسببين 1- لأنه لا يليق بك أو بي أن ننزل لهذا المستوى من التراشق
2- استمرار الجدل في هذه النقطة سيخرج بالنقاش خارج نطاقه (اعترف بخطئي في هذه النقطة أيضاُ لأن أنا اللي فتحت الموضوع في الاتجاه ده من دون قصد)
(وكمان مادة الدين مابتدخلش في المجموع :) )
أود أن أوضح قصدي بالنسبة لكلمة "تديين"، وهو أننا صرنا نركز على "الشكل الديني"، الشكل لا المضمون، بل ونلح في ذلك إلحاحاً غريباً. بالطبع ماخُلقنا إلا لنعبد الله عز وجل، ولكننا أصبحنا "نتلاكع"، يعني مثلاُ كلنا يسأل (ويفتي في نفس الوقت) في حكم الغناء مع إننا عارفين (أغلبنا يعني) إن لو الشيخ قاللنا حرام هانفضل نسمع أغاني برضه، بس المهم نسأل ونتلاكع وخلاص. وعندنا أمثلة كتير من دي واضحة للكل وخلاصتها أننا نسأل دائماً فيما لا ينفع نركز في الشكل لا المضمون، نمشي بلحى ونقاب بينما الألسنة تسب وتلعن (كام واحد شاف المنظر ده؟) بس المهم اللحية مُطلقة والشارب محفوف والنقاب يستر الجسم كله ماعدا العينين أو عين واحدة ومافيش مانع نتجادل في سُنة إظهار عين واحدة ولا اتنين، ونعلق "مغلق للصلاة" على أبواب المحلات حتى في أوقات الغدا وفي غير أوقات الصلاة، ونعلن أن "الأجازة الأسبوعية للمحل الجمعة وليست الأحد" أهو كله منظرة،
تيجي بقى لحقوق الجار، الكلمة الطيبة، عدم الخوض في الأعراض، تبسمك في وجه أخيك، عيادة المرضى، إغاثة الملهوف، الأخذ بأسباب التقدم والعلم......... غالباً طناش، المهم اللحية مُطلقة والشارب محفوف والنقاب يستر الجسم كله ماعدا العينين أو عين واحدة
ياريت أكون وضحت وجهة نظري وياريت الكلام في الاتجاه ده يتقفل، بس عشان مانخرجش عن الموضوع الأصلي
وأعتذر لأي كلام تم إساءة فهمه أو جرح مشاعركم وأؤكد لكم أنه غير مقصود.
سبحانك اللهم ربنا وبحمدك، أشهد أن لا إله إلا أنت، استغفرك وأتوب إليك
آه، اللحية والنقاب على عيني وراسي ، سنن عن النبي صلى الله عليه وسلم، عشان ماحدش يقولي بانكر السنة والعياذ بالله، أنا بانكر الترائي والمراؤون (أظن إن اللي يطلق لحيته ويسرق أو ينصب أو يسب ده مرائي رسمي)
والسلام عليكم ورحمة الله

الموضوع كبر ليه؟ أنا آسف يا جماعة ماكانش قصدي أي حاجة مما ذهب إليه أبو عبد الله،

الأستاذ Modux
شكراً لتفهم وجهة نظري ومؤازرتي، وأنا ألتمس العذر لأبي عبد الله لأنه رأى في كلامي مساس بالعقيدة (من وجهة نظره) وأنا أحترم دفاعه عن العقيدة وأتمنى أن تكون مداخلتي الثانية أوضحت كلامي وأزالت اللبس، بالنسبة لتحفظاتكم على كلامي أرحب بها كلها، بس ياريت لو في الموضوع الأساسي (تحديد النسل) إنما لو في الجزء الأخير (أنا مرحب بيها برضه) ياريت تساعدني نقفل الاتجاه ده وتبعتهالي private message

الأستاذ حاتم سليم
تسلم :)

Dr. Ahmed
اتمنى أكون وضحت قصدي وأن ما قلته قد تم إزالة ما به من لبس وأتمنى أن تقبل اعتذاري إذا كان كلامي السابق فيه مساس بكم كما أوضحت وأؤكد أنه كلام أسيئ فهمه وماحدش قصد يجبر حد على حاجة، الموضوع كله نقاش واحنا ناس متعلمين ونقدر نستوعب وجهات نظر بعض

أبو عبد الله
أحترم دفاعك عن العقيدة، وأتمنى أن أكون أزلت اللبس، وآخذ عليك تسرعك في الحكم علي وعلى عقيدتي