أحلى حاجة ان تلاقي كل واحد يقول انا ضد عمل المرأة و الست مكانها بيتها و كلام كبير قوي زي ما يكون قاضي القضاه بتاع أمير المؤمنين. هو ليه اللي بيقول رأيه لازم يعممه؟؟؟ يعني انت رافض ان مراتك تشتغل براحتك, ده حقك أكيد. انما الكلام الكبير بتاع تفكك الأسرة و ضياع الأولاد و المجتمع اللي انهار عشان فيه ستات بتشتغل ده مالوش لازمة.

بيتهيألي ان الأجيال بتاعتنا فينا كتير قوي أمهاتهم كانوا بيشتغلوا و رغم كدة ربوهم أحسن تربية و بقوا كويسين جدا في حياتهم. و في المقابل فيه برضه بيوت كتير الأم مابتشتغلش و العيال طلعوا لا أخلاق و لا تربية.

و بعدين مين قال ان اللي بتشتغل بتهمل جوزها و ولادها؟؟ هو جوزها ده مش أكيد بيشتغل هو كمان, يعني برة البيت من صباحية ربنا لغاية المغرب؟؟ و الولاد دول مش بيروحوا مدارس؟؟ و لا هي النباطشي بتاع البيت على رأي سعيد صالح؟؟؟؟

من الأخر كل واحد ليه ظروفه, و كل واحد و ليه رأيه. يعني فيه واحد مش عايز مراته تشتغل خالص و هي موافقة على كدة. و فيه زوجة بتشتغل عشان تساعد في مصاريف البيت زي ما الناس قالوا, و فيه واحدة بتحب الشغل و مش عايزة تقعد في البيت و جوزها موافق و بيشجعها. كل بيت ليه ظروفه و كل زوجين أكيد ادرى باللي يناسبهم و الموضوع ده بالذات مفيهوش صح و غلط, كل واحد حر.