الموضوع: بوجيهات السيريون

المشاركة الأصلية كتبت بواسطة أبو حمزة

السلام عليكم يا إخواني
كنت محتاج أعرف بشكل عاجل نوعية البوجيهات اللي متركبة في السيريون 1300 glx، موديل 2008.
سمعت إنها ليزر أيريديوم وفي رواية بلاتينيوم وفي رواية تالتة العادية الاستاندرد
فتحت المانيوال وملقيش أي حاجة عن النوع المستخدم
وياريت اللي عنده رد يقول مصدر المعلومة إيه لو المانيوال مثلاً أو موقع أو أياً كان.

ابو حمزة
العربيات موديل 2006 و 2007 كلها كانت ليزر ايريديوم NGK
ولكن في موديلات 2008 و 2009 بقت كالتالي :

1- الموديلات GLX بقت بلاتينيوم Denso
2- الموديلات الأخرى مثل GL و XL بقت بوجيهات Denso العادية

ونصيحة مني لك
انك تشتري البلاتينيوم الدينسو اللي بتتباع في التوكيل لأنك مش هتلاقيها بره ولو قلتها مش هتلاقي الرقم بتاعها بالظبط

المشاركة الأصلية كتبت بواسطة bmya

اللي اعرفه انها بلاتنيوم
المصدر مركز الصيانه

متشكر على الرد يا شريف :)
بس كنت أتمنى ألاقي حاجة مكتوبة وموثقة بعيداً عن الكلام الشفوي في التوكيل
لأن المعلومة اللي عندك هي اللي عندي بالظبط

المشاركة الأصلية كتبت بواسطة أبو عبدالله

ابو حمزة
العربيات موديل 2006 و 2007 كلها كانت ليزر ايريديوم ngk
ولكن في موديلات 2008 و 2009 بقت كالتالي :

1- الموديلات glx بقت بلاتينيوم denso
2- الموديلات الأخرى مثل gl و xl بقت بوجيهات denso العادية

ونصيحة مني لك
انك تشتري البلاتينيوم الدينسو اللي بتتباع في التوكيل لأنك مش هتلاقيها بره ولو قلتها مش هتلاقي الرقم بتاعها بالظبط

بما إن عربيتي 2008 يبقى أفهم من كدة إني بلاتينيوم؟
طب هل معاك حاجة تثبت الكلام ده يابو عبد الله؟
أنا عندي مشكلة حالياً مع التوكيل ولما قلت الكلام ده الأخوة اللي هناك أجمعوا بلا استثناء على إن اللي في عربيتي هي العادية الاستاندرد
وانا حتى كأداء مش مقتنع بالكلام ده

هايوصلوني إني أقول للناس اللي عربيته ماشية معاه كويس وداخل على صيانة الأربعين ألف إياه ثم إياه إنه يعملها.

متابع بـاهتمام....

الموضوع باختصار إني كان عندي نفس المعلومة اللي تم تداولها أكتر من مرة هنا في المنتدى واللي اتفضل أبو عبد الله وشريف بتأكيدها إن البوجيهات الموجودة في الـ GLX ليست الاستاندرد
سواء كانت ليزر أيريديوم أو بلاتينيوم مش ده الخلاف، المهم إنها ليست الاستاندرد.
العربية معايا عاملة 47 ألف كيلو في سنتين تقريباً ولم أعاني من أية مشاكل تذكر
وكان سحبها مُرضيجداً بالنسبة لي
نويت إني أروح أعمل صيانة الـ 40 ألف في مركز خدمة أبو رواش
وطبعاً معروف إنها أحد الصيانات الرئيسية والثقيلة على مالك السيارة
وعند الحجز سألت عن تفصيل التكلفة وعرفت إن منها 400 وشوية مقابل تغيير البوجيهات
وطبعاً 400 وشوية معناها إنها يا إما ليزر أيريديوم أو على الأقل بلاتينيوم
رحت مركز الصيانة
ولسوء حظي يستلمها مني المهندس أيمن عزام للمرة التانية على التوالي لأنه هو اللي كان استلم مني العربية في صيانة الـ 35 ألف اللي عملتها قبلها
وطبعاً من تعاملي معاه عرفت إن جوهر شغله هو تسفيه أي شكاوي للعملاء والرد المعتاد على أي شكوى إنها عادية
وفي المرتين أفتكر إن م. محمد عبد الصمد مكانش موجود
المهم
سلمت العربية واشتكيت من رجرجة في العربية وطبعاً طلعها إنها شئ عادي وانا بيتهيألي
بالرغم من إني باكرر إني سايق العربية بقالي 47 ألف كيلو
خلصت الصيانة
فوجئت وانا راجع إن العربية أدائها انخفض بشكل ملحوظ ليا
واكتشفت بعد الرجوع للفاتورة إن البوجيهات تم تغييرها ببوجيهات ستاندرد وتمنها 40 جنيه للبوجيه الواحد
بعد يومين بالعربية اتأكدت إن فيه مشكلة في السحب بالإضافة لمشكلة في استهلاك البنزين اللي حسيته زاد برضة بشكل ملحوظ
لأني مش خبير، ومقدرش أرجع ده للبوجيهات عملت شكوى بسبب تغيير البوجيهات اللي انا مفترض إنها بلاتينيوم أو ليزر أيريديوم ببوجيهات ستاندرد بدون أخذ رأيي
تم الاستجابة للشكوى بسرعة تستحق الإشادة واتحدد لي معاد أروح المركز تاني
ورحت إمبارح فعلاً
بدأ الخلاف مع الأستاذ أيمن بتصميمه إنه من حقه كمركز صيانة إنه يحط القطعة اللي شايفها صح بدون الرجوع للعميل
وانا قلت له انا متفق معاك مادام القطعة اللي بتتحط هي نفس القطعة، إنما لو قطعة مختلفة يبقى من حقي إني أقول رأيي في اللي بيتحط في عربيتي
وقلت له إني عارف تكلفة الليزر الأيريديوم من الكول سنتر قبل ما آجي ومرتضي التكلفة دي
طلعت من العربية البوجيهات المستبدلة وكانت Denso ولها كود معين
أخدني ورحنا على مخزن قطع الغيار وسال المختص على البوجيهات المتوافرة لعربيتي برقم الشاسيه والراجل أفاد إن النوع الموجود لها اللي سعره 40 جنيه للبوجيه (الاستاندرد) اللي ركبوه فعلاً وبالمناسبة كان NGK وليس Denso
قاللي شفت؟
فرديت قلت له مفترض إن فيه نوع تاني عندكم فنفى، فرحت انا سائل مسئول قطع الغيار فأكد إن فيه البلاتينيوم وسعره حاجة وسبعين جنيه للبوجيه.
دخلني لمسئول قطع الغيار فتح ملف العربية على الكومبيوتر وطلع إن العربية يركب لها Denso أو NGK، وإن اللي ركب لي فعلاً هو المناظر لل Denso اللي كان راكب فيها من مصنعها في اليابان
وهنا كانت المفاجأة بتصميمه هو ومسئول قطع الغيار وكمان الأستاذ حاتم في الاستقبال إن بوجيهات العربية ستاندرد وليست شئ آخر
طب واللي اتقال من الكول سنتر؟
كان الرد بمنتهى البساطة: دي غلطة من الكول سنتر.
يعني الكول سنتر غلط وكل الناس اللي هنا برضة غلطت والناس اللي في التوكيل هي الصح
وانتهت المقابلة والحوار بانصرافي وانا منزعج جداً خصوصاً وإني جاي من شكوى معينة في العربية محصلش حتى إن تم أي فحص عليها لمعرفة سبب قلة السحب أو زيادة استهلاك البنزين حتى لو كان ما قالوه عن البوجيهات صحيح.
فعرفت معنى بحث توكيل دايهاتسو عن رضا العميل