الموضوع: المسافة اللازمة لتوقف السيارة.

مميز دائما ، شكرا على الافادة

المشاركة الأصلية كتبت بواسطة Horsepower

السلام عليكم,
الموضوع ده الهدف منه إننا نعرف إحنا محتاجين مسافة قد إيه علشان نوقف العربية تماما عن الحركة لأي سبب, وطبعا الموضوع مرتبط بالسرعة إللي عليها العربية و ظروف القيادة و وزن السيارة بما فيها ... إلخ.

بس خلينا نشوف لو في ظروف قيادة طبيعية (أرض أسفلت جاف - درجة حرارة 30 مئوية - وزن السيارة بالقائد فقط):

السرعة (كم/ساعة) --------------------- مسافة التوقف الكلي (متر)
10 --------------------------------------------1
20 --------------------------------------------5
30 --------------------------------------------12
40 --------------------------------------------20
50 --------------------------------------------32
60 --------------------------------------------46
80 --------------------------------------------82
100-------------------------------------------128
120 ------------------------------------------184
150 ------------------------------------------287
180 ------------------------------------------413
200 ------------------------------------------510
250 ------------------------------------------797
280 ------------------------------------------1000
300 ------------------------------------------1147

أرجو ملاحظة إن السيارة محتاجة أكثر من نصف كيلومتر مسافة علشان تتوقف تماما من سرعة 200 كم/ساعة
و محتاجة كيلومتر كامل علشان تتوقف تماما من سرعة 280 كم/ساعة

ربنا يحفظكم و يحفظنا جميعا.

المشاركة الأصلية كتبت بواسطة khaled_rafea

و عليكم السلام, اولا شكرا جزيلا على الموضوع, بس حضرتك مكتبتش نوع العربية, حضرتك تقصد السيفك ال 2010 ولا حاجه تانيه ؟ اكيد حتفرق من عربيه لعربيه حسب نظام الفرامل

أهلا خالد بيك, الأرقام دي لأي عربية سيدان متوسطة الوزن مضاف إليها وزن قائدها فقط و بها نظام فرامل abs.
و ده يخليك تفكر ليه الشركات مبتكتبش مسافة التوقف لعربياتها حتى من باب المعلومات الفنية الهامة ... ماهم بيكتبو التسارع 0-100 ... ليه مش حاطين جراف لمسافات التوقف؟ مع العلم إن مسافة التوقف من الحاجات المهمة جدا للمستهلك إنه يعرفها من باب السلامة و مهم أكتر من التسارع ... بس السبب إن تقريبا الأداء واحد بين كل العربيات إللي فيها نفس أنظمة الفرامل ... وفد يكون السبب إنهم مش عايزين حد يرفع عليهم قضية لو عربيته موقفتش في المسافة المكتوبة ولا قدرالله تسببت في حادث
و طبعا إنت معاك حق إن العربية وهي محملة بتحتاج فرامل أقوى بس ده بيتحقق من خلال ال ebd وال abs برضه.

المشاركة الأصلية كتبت بواسطة haythamkmal

:e_braces[1]: مميز دائما ، شكرا على الافادة

ربنا يكرمك يا هيثم باشا ... من بعض ما عندكم يا كبير.

هههههههه على 100 وبيقف على 3 متر دا جبار نوع الفرامل عندك اية بس من فضلك ونوع العربية

دنا حتا لو كلبشت العجل والعربية اتزحلقت هتزحلق حوالى 20 متر على متقف على السرعة دى دا لو مكنش اكتر من 20 متر كمان زحلقة على اسفلت بس بدون اى شئ

المشاركة الأصلية كتبت بواسطة hondawy_2008

الأرقام دي لو من غير فرامل يعني الاحتكاك العادي صح ؟

أصل لو بفرامل يبقى لأ طبعا أنا من سرعة 100 ممكن أقف في 3 متر بالكتير مش 128 متر !!! مبالغ فيها أوي أوي أوي

لأ بس نص كيلو دي و كيلو عدت مرحلة المبالغة ... متزعلش مني بس ده الواقع و جرب وشوف

لأ الأرقام دي بالفرامل مع عمل ال abs (يعني و إنت دايس فرامل على الآخر) ... المسافات والسرعات دي أكيدة مع إعتبار معامل الإحتكاك بين الأسفلت و كاوتش العربية = 0.8 في الحساب.
معامل الإحتكاك لو فيه أمطار أو رمل بيوصل ل 0.3 ... و ده بيخلي المسافاة 3 أضعاف العادي.

حضرتك معاك سيفيك 2008 يعني فيها abs ... جرب على طريق مفتوح إنك توصل على سرعة 100 كم/ساعة جنب حاجة مميزة (عمود نور أو شجرة ... إلخ) و إكبس فرامل على الآخر (بس طبعا خللي بالك مايكونش فيه عربيات وراك) وبعد ما العربية تقف تماما إنزل و شوف تقريبا بالنظر المسافة إللي بينك و بين العلامة إللي ضربت عندها الفرامل ... لو قدرت تقيسها يبقا ممتاز ... بس وقولنا تقريبا 3 متر واللا 120 متر.
ملحوظة: طول السيفيك الجديدة 4.5 متر ... يعني على كلامك وفرملت على 100 كم/ساعة يادوب شنطة العربية تبقى مكان الإكسدام ... لو ده حصل إللي سايق العربية هايطلع من الزجاج الأمامي.

الأرقام إللي أنا كاتبها مؤكدة 100% وأنا عارف إن فيه ناس كتير متعرفش لو وقفت على سرعة معينة هاتحتاج مسافة قد إيه وده إللي خلاني أعمل الموضوع ده ... يا رب الناس تفكر و هي سايقة وتعمل حسابها على المسافات دي.

أنا كمان قصدت أحط المسافة إللي العربية محتجاها علشان تقف من سرعة 200 كم/ساعة وهي تقريبا نصف كيلومتر وده بيفوق قدرة البصر العادية للإنسان ... يعني مش ممكن إنسان عادي يكون شايف قدامة بنصف كيلومتر فيه مطب واللا لأ ولو فيه مش هايلحق يقف قبله ... ياريت الناس ماتستهونش بالموضوع ده.

مرة تانية ربنا يسترها مع الجميع.

جامد الموضوع ده يا ريس بس بالنسبة للسيارات اللى مافيهاش نظام abs أعتقد هيكون زمن التوقف متقارب من الأزمنة دى ولا اية الكلام؟!