الموضوع: لادا كما لم ولن تراها في مصر

المشاركة الأصلية كتبت بواسطة amt

أنا مبعارضش اللادا كعربية أنا بقول إن الشعب ده يستحق الأفضل واللى مش هيوريهولنا حد ولا هيجيبه لنا حدلأن الناس دي بتكسب كده كويس جدا جدا جدا ...... اللهم لاحسد

طب إذا كان الشعب الروسى اللى مدهول الدنيال شايف أنه ما يستاهلش و متواضع و راضى بقليلة.
بحق الله يا أخى , الشعب المصرى دوة شايف نفسه يستاهل الرفاهية و الراحة على إيه؟!!!
قلى حاجة واحدة بس تخلينا نقول, آه لا فعلا الشعب دوة عمل اللى عليه و جه الوقت إنه يرتاح.

المشاركة الأصلية كتبت بواسطة darsh86

والله انا مش فاهم الباشوات اللى مش عاجبهم لادا والاستاذ للى بيقول عربيه معموله من حديد هو ده دلوقتى بقى عيب يعنى عايز العربيه تبقى من فيبر ولا بلاستيك
سواقه فى مصر عايزه عربيه زى كده بدليل انى الجديد كله مش مستحمل

روح اقرا عن تكنولوجيا السيارات هتلاقي الناس بينتحرو علشان يخففوا وزن العربية و بيعملوها من الفايبر و البلاستك المقوى اولاً علشان وزن العربية يبقى خفيف و يقلل استهلاك البنزين و يقللوا سعة الماتور و يدي نفس العزم و اكتر و يقللو سعر العربية ككل و حاجات كتير جداً غلط كبير ان العربية تنعمل من حديد احنا مش داخلين الحرب
الحديد خلى اللادا وزنها تقيل و لما يكون وزنها تقيل بيبقى كمية التحرك بتاعتها كبييرة طبقاً للمعادلة
P=mv
و لما تكون كمية التحرك كبيرة برده هتبقى طاقة الحركة كبيرة و ده ينتج عنه ان العربية هيبقى صعب جداً انك توقفها و هتحتاج وقت و جهد !!
العربية لما يكون وزنها تقيل زي ما قلنا هتحتاج طاقة حركة كبيرة علشان تمشي و ده هيخلي الماتور ينهج علشان يمشيها و كمان هيستهلك بنزين اكتر علشان كده كانت منطقية ان اللادا تجيب ال100 كيلو في 17 ثانية و السرعة النهائيا 150 كيلو !!

لا طبعا مش احسن...انا مجرب الاتنين فى السفر
الادا اقوى وعزم الموتور افضل بكتير واعطالها اقل من 128 بمراحل دة غير انها اوسع واكبر وتتحمل اكتر

كل اللي هقولهولك اني مش متخيل عربية لادا تجيب ال100 كيلو في الساعة اساساً و لو جابتها هتحتاج بارشوتات علشان توقفها !!
هي ميزة اللادا في حاجة واحدة انك لو بتلعب جيم ممكن توفر فلوس الجيم و اللادا هتقوم بالواجب!!

يمكن عشان الراجل ده عايش لأهداف أسمى من إنوا يركب عربية ألمانى مالهاش لازمة تمنها يساوى تمن 30 عربية نيفا , ممكن؟!!! ياريت تقولى !!!

بص .. فيه حاجتين .. اول حاجة انا كل مرة اقوووولك فيه عربيات كتيييير احسن من اللادا بمراحل و كمان اصلاً مينفعش تقارنها باللادا خالص لانك لو عايز تقارن حاجة باللادا تجيب مثلاً فيات 132 و المشكلة ان الفيات هتكسب !!
كذا مرة اعيد و ازيد معاك اقولك يا عمي فيه عربيات بالسعر ده و ارخص و تنفع الطبقة الغلبانة و كمان تقفيل برة زي جيلي باندا و شيفورليه سبارك و سوزوكي التو و بيكانتو و ماروتي و كلهم بيأدوا الغرض برده مش ده مبدأك دابة تنقلك و في نفس الوقت تبقى عربية بتواكب العصر و فيه ب55 الف بالظبط جاك a107 و روح اسأل العربية دي عاملة ازاي او شوفها حتى العربية مش سايبة حاجة مفهاش عيب واحد !!!

تاني حاجة .. هقولك ليه الواحد بيركب عربية الماني تمنها تمن عربية نيفا .. لان ببساطة العربية دي هي بيتك التاني !! انت فوق بتبقى في بيتك الاول و في الشارع ليك بيتك برده زي ما تحب تعمل لبيتك اعمل لعربيتك تقدر تنكر كلامي؟؟ فاللي مستواه انه يبني فيلا او اياً كان يبقى طبيعي لو لاقيته معاه مرسيدس لانه عايش عيشة مفرهة !! الا لو انت بقى قصدك الناس كلها تعيش في اكشاك و الناس كلها تجيب 127 و ساعتها نقلب شيوعيين لو كنت شيوعي قولي علشان اطلع اجري من المنتدى ده !!

50 الف جنيه على عربية بتكنولجيا 1970 ؟؟ السعر المقبول للعربية دي هو 30 الف و لو 35 يبقى دي اكتر حاجة ممكن يغلوها رغم انها غالية الا ان سعرها ممكن يقبله العقل !!

المشاركة الأصلية كتبت بواسطة krim71

الا لو انت بقى قصدك الناس كلها تعيش في اكشاك و الناس كلها تجيب 127 و ساعتها نقلب شيوعيين لو كنت شيوعي قولي علشان اطلع اجري من المنتدى ده !!

50 الف جنيه على عربية بتكنولجيا 1970 ؟؟ السعر المقبول للعربية دي هو 30 الف و لو 35 يبقى دي اكتر حاجة ممكن يغلوها رغم انها غالية الا ان سعرها ممكن يقبله العقل !!

دى وجهات نظر يا أخى , و كل واحد حيتحاسب يوم القيامة إن شاء الله على نيته , فى واحد غلبان عايش عيشة الغلبان و فى واحد مرتاح عايش عيشة المرتاحين و فى واحد مرتاح متواضع عايش عيشة الغلابة كل واحد له أجر عند الله.

معلش أنا آسف إنى أصدمك بالحقيقة المرة دية , هى إن مصر لسه فيها ناس عايشة عشان أهداف أسمى من إنها تعمل فلوس عشان تصرفها على فيلا أو شبكة أو مهر أو فرح أو زوجة حسناء جاهلة أو عربية أو نادى أو على أى من أوجه الترف الزائف المختلفة أو حتى تكنزها على قلبها فى البنك وديعة تعمل فوائد تؤدى لزياة التضخم و تقتل القوة الشرائية للعملة المحلية , معاك إن الناس دية حتموت من غير ما تعمل حاجة , بس على الأقل الأجر و الثواب عند الله , على الأقل حانقول يارب إحنا حاولنا .

يا عم انا مش فاهم المصريين ليه بيحبوا ينسرقوا ؟؟؟ يعني هل هي هواية انهم ينسرقوا؟؟ يعني ايه الممتع لما تلاقي نفسك بتتسرق و تقول رضى و عربية رخيصة يا عم العربية سعرها المفروض ميعديش 30 الف دي لو كانت سعرها كده كنت انا اللي جبتها لكن مش معقول 50 الف يعني ده كتير اوي زيادة عن اللزوم !! معلش انا محبتش اصدمك بس انت اتسرقت يا معلم !!

المشاركة الأصلية كتبت بواسطة ahmed_nubira

انت بتجيب الكلام دة منين فهمنى...انا كان معايا العربيه 7 سنين....وبتجيب 100 و 130 كمان ومره جبت 145 وكان اخرها....بس لو بتسافر 120 كويسه وتقيله على الارض....ومفيش بارشوتات ولا الحجات دى.....وموضوع انها تقيله ده موضوع تعود مش اكتر

ربنا يبارك لأصحابها فيها اللهم لآمين

هى نمرة تليفون روسيا كام يا جماعة

عاوز اكلمهم علشان اخد الجنسية الروسى

تحيا الادا مليون الف مرة
والى يقول غير كده هو حاجه من اتنين

يا غنى وربنا يزيده من فضله

يا ...... ونزهى


اما انصار الادا هما دول الشعب المصرى الاصيل الى فاهم وضع البلد الى عايش فيها وعارف حدوده كويس جداااااااااااا

يافرحتى يا هنايا اروح اجيبلى عربية ب 80 الف وبعد كام شهر الاقيها كلها خدوش وخبطات وخرابيش من بره وادفع دم قلبى فى صيانتها فى توكيل مصاص دماء او ميكانيكى حمار بودان كبيرة وديل طويل وهو مش فاهم اى حاجة ويبوظها اكتر
ولا ادفع فلوس ضرايب وتراخيص وغرامات علشان خاطر يبقى اسمى مواكب العصر

ياخى عن ام العصر ما اتواكب
انا بموت فى العصر الحجرى
وهابطل اللبس بدلة وانا سايق اللادا وهالبس فروة خروف

تحيا الاااااااااااااادا وربنا يخليكى لينا يا روسيا