الموضوع: سياره 4x4فى حدود 100 الف

انا - ملاحظ ان فى فعلا ناس بتدخل نظام جر شكل- ومش فاهم هدفهم ايه ؟
ممكن افهم ان فى مندوبين توكيلات بيدافعوا عن ماركاتهم- لكن ردود مستفزه على اراء ده اللى مش قادر استوعبه- للاسف ده طبع العرب عموما - راى انا وبعدى الطوفان- نقول الخلاف فى الراى لايفسد للود قضيه ولو حد خالفنا ندبحه
فى قصه كل ما فتكرها احس ان لسه بدرى علينا قوووووى- القصه حصلت فى اربيعنات القرن الماضى - اولها كمان - كاتب مصرى - واقتصادى محترم جدا - اسمه سيد ابو النجا- كان بيدرس فى انجلتر ا وساكن عند واحده ست عجوزه- المهم اختلف معاها وتقريبا اتخانق - حاجه فى السكن ما عجبتوش- وهو كان ساكن عندها من مده - المهم قرر انه يسيب البلد كلها لانه كات تقريبا خلص دراسته - يوم سفره لقى صاحبه البيت جايه المحطه وبتودعه بصحبه ورد- هو بيقول انا قعدت افكر لو اللى حصل ده كان حصل فى بلادنا كان رد فعل المالك للبيت كان حيكون ايه- للاسف ما بنعرفش نفصل بين ارائنا ومشاعرنا -
بس يا خونا انا لسه بادور - على عربيه - هههههههههه

المشاركة الأصلية كتبت بواسطة samcar

بس يا خونا انا لسه بادور - على عربيه - هههههههههه

طيب بص ياباشا فية واحد صاحبي لسة قافل معاه التليفون من شوية, هو معاة فرونتيرا موديل 2000 لونها كحلي و عربيتة نضيفة جدا لأن انا عارفها كويس من اول ما جابها علشان هوة بيشورني في كل حاجة فيها و كتير بنروح سوا نصينها المهم هو بيفكر يبيعها علشان مسافر يشتغل في دبي فترة ممكن تطول

المهم هي ماشية اقل من ال 200 الف كيلو بشوية على ما اذكر 185 الف مثلا (دة رقم لا يذكر في العربيات دي اللي مواتيرها بتعيش مئات الوف الكيلومترات) و موتورها تمام ماتفتحش و فتيسها تمام جدا برضة و صالون و عفشة وبودي ممتازين و هو بيصينها و بيصرف عليها كويس و تمشي في حدود ال 80 الف جنية زي ماتتفقوا سوا انا مافضلش اني اتدخل غير اني اعرفكم ببعض, و هو من الهرم

فلو حضرتك محتاج عربية للسفر واسعه و مريحه و قوية و أمان انا عارف ان دي حاتعجبك لانها تكييف قوي جدا و عفشة ناعمه (غير معظم ال 4*4 اللي عفشتة ناشفه) و موتور قوي و من ناحية الاتساع ابقى بص في صور عربيتي اللي انا حارفعها في البومات الاعضاء ان شاء الله

انا حاولت ابعتلك رسالة عالخاص لقيتك قافل الخاص و لم تختار استقبال رسائل من الاعضاء ابعتلي ايميلك او تليفونك اديلك نمرتة لو حضرتك مهتم

المشاركة الأصلية كتبت بواسطة hugan

العربيه الفورنتيرا عربيه جامده جدا
بس اظن ان استهلاكها في البنزين عالي جدا
ووقطع غيارها غاليه
لانها كانت مع مهندس زميلي
بعها بعد 8 شهور بسبب البنزين العالي الاستهلاك
انما كسياره دفع رباعي ممتازه
اظن في منها الايسوزو الروديو ودي 4 سلندر
مش عارف الكلام ده صح ولا غلط

هيه بتعمل جوة البلد بين 90 و 110 كيلو في الصفيحه لو عربية نضيفة وموتورها كويس
في طريق سفر بتعمل 140 - 150 كيلو في الصفيحه

قطع غيارها في البودي و العفشة رخيصة جدا لان بينها و بين الايسوزو الفاسترحاجات مشتركة كذلك الرفارف و الكبوت و الشبكة و الفوانيس و الزجاج الامامي و الابواب و التابلوة هما بتوع الفاستر او الايسوزو برضة

انما الموتور مختلف و دة قطع غيارة اغلى بس مش قوي يعني زيها زي اي عربية حديثة, يعني مش حاتبقى زي الباسات و لا الاوكتافيا مثلا (سير الكاتينة ب 375 - التيل الامامي ب 170 - بلية الكاتينة ب 700 - كلاتش ب 1150- حساس كولنت ب 120 - ثرموستات ب 115 -..........) يعني عادي جدا مش رخيص و مش غالي قوي في معظم حاجتة للاستهلاك العادي انما في حاجات معينة بتبقى غالية شوية و التوكيل بيعامل صحابها معاملة اللي راكبين 4*4 عالي و بيدفعهم جامد بس من الخبرة الواحد اتعلم و عرف ناس تانية عندهم حاجتها الاصلية باسعار ارخص و في مجملهم هم بتوع الاوبل و الايسوزو

الشيفرولية فرونتيرا هيه هيه الايسوزو الروديو هيه برضة الاوبل فرونتيرا او الهوندا الباسبوت هما كلهم نفس السيارة بالمللي فرق الماركه بس

خللي بالك ان اوبل و شيفرولية و ايسوزو هما في الاول و الاخر شركة واحدة GM (General Motors) و في الاساس العربية دي هي الايسوزو الروديو اصلا بس بيجمعوها في بعض البلاد باسماء تانية (شيفرولية فرونتيرا في مصر مثلا - هولدن فرونتيرا في استراليا - فوكسهول فرونتيرا في انجلترا - اوبل فرونتيرا في المانيا) وزي ما قلت لك في الاخر هي شركه واحد جنرال موتورز

و بتنزل منها 4 سلندر ديزل 2400 سي سي و الجديد منها اسمها ويزارد بتنزل 3100 سي سي ديزل بس 6 سلندر لاين (بالطول) بس دي مواتير ضعيفة, اقوى و احسن موتور هوة ال 6 سلندر V6 بنزين دة بيبقى 3200 - 3500 cc اربعه كامه 24 صباب بيولد 180 -205 حصان (ال 3200 بيبقي 180 حصان و ال 3500 بيبقى 205 حصان)

و هي قوية و حمالة أسية جدا و بتتحمل الطرق غير الممهدة بقوة لكنها في الرمال الناعمه متوسطة (التويوتا و الباجيرو و النيسان افضل منها شوية بس الشيروكيي اقل منها في تحمل الغرز لان الشيروكيي اساسا عربية جبال و مدقات مش رملة)
انما انا جربتها في الصحرا و شايفها ممتازة بالمقارنة بالرانجلر اللي طلعت بيها في الصحرا كتير برضة

شوف الفيديو دة و انت تعرف اسمها الأصلي "روديو" لية ( الروديو هو رياضة رعاه البقر في ركوب الثيران او ترويض الخيول البرية في امريكا):
YouTube - Top truck chaIlenge idaho 2008. Isuzu Rodeo on motorcycle track

المشاركة الأصلية كتبت بواسطة hugan

بس 90 /110 كتير جدا

الجراند شيروكيي بتعمل حوالي 50 كيلو في الصفيحه جوة البلد
و الشيروكيي الستة سلندر اكتر حاجة بسيطة
يعني دي نعمه بالمقارنة بيهم

وللا حضرتك تقصد ان كتير الكيلو مترات دي و ماتعملهمش او مكانتش بتعمل كدة مع صاحبك؟؟؟

المشاركة الأصلية كتبت بواسطة hugan

بس التيجو مش وحشه

أحم ... أحم

بلاش نجيب سيرة الصيني ربنا يجعل كلامنا خفيف عليهم

بس زي ما حضرتك قلت مافيش و جه مقارنة

المشاركة الأصلية كتبت بواسطة hugan

لكن انا متفق معك انها اداء ممتازه
لاني ركبتها من زميلي في مرسي علم
ودخلت بيها مدقات غايه في الصعوبه ما شاء الله عليها

بص انا لما قررت اجيب عربية 4*4 تانية بجانب اللانسر و الأكورد من 3 سنين قعدت شهرين تلاتة ادرس احسن الاختيارات و البدائل لغاية ما قررت اجيب فرونتيرا ووقعت قدامي دي بالصدفة كانت بتاعه فندق المريديان كانت بتتأجر بسائق تبع البزنس سنتر للفندق و ليها ملف صيانة في التوكيل من الزيرو وعاملة 154000 كم كانت غالية شوية بس كانت احسن المعروض و ربنا وفق فيها الحمد لله
المهم ان اللي عاوز اقولهولك اني خدت وقتي اشوف اية الافضل و لقيت ان دي من حيث الاداء والقوة و برضة النعومه و الراحه و الرفاهيه هي احسن المتاح في السوق و في حدود الامكانيات السعرية و مصاريفها معقولة كصيانة و اصلاح مش مبالغ فيها و ان كانت حاجتها مش متوفرة قوي و في الاول بس لكن بعد كدة عرفت الناس اللي بتشتغل في حاجتها