السلام عليكم و رحمة الله و بركاته
معلش يا اخوانى فى الله كان عندى مشكله كده محتاج اعرف ايه حلها او ايه سببها منكوا قبل مانعدى على التوكيل.
دلوقت العربية معايا بتسخن جدا فى الحر و مع التكييف و القرص شويه على الغيارات على ار بى ام 5 مش بزيد عن كده.
القصة باختصار انى كنت ماشى اول الاسبوع بالعربية و انا فاتح التكييف على اعلى درجة و قارص شويه على الغيار زي مابقولكوا على 5 ار
بى ام تقريبا ببدل الغيارات و بعدين مره واحده لقيت الحرارة على 110 تقريبا هديت شويه و اديت انتظار لكن ماوقفتش و قفلت التكييف راح
عداد الحرارة رجع لوضعه الطبيعى قبل ال90 بحاجة بسيطة!!
المهم رحت واقف و باصص على المياه فى القربة ماشوفتهاش زودت القربة اخدت حاجه بسيطة جدا ماتتعداش ربع كوباية يعنى.
رجعت على الشركة و قولت اشوف الدنيا فيها ايه على المنتدى لقيت موضوع مشابه بس و الناس مرجحة انه فى الكهرباء مشكله او فى
المروحة.
قولت بالليل و انا راجع اجرب برضه و اشوف المشكله هاتحصل تانى ولا لا و انا مروح و المره دى بقى مش كنت لواحدى كان معايا 4 فى
العربية و كنت ماشى مش بقرص على الغيار و التكييف تقريبا كان فى النص الحراره و و كنا بالليل خلاص و الحمد لله ماتكررتش - قولت يمكن
حاله عارضه و خلاص.
المهم عدت الايام و بعدين النهارده اتكرر الموضوع تانى و تفاصيله كالاتى:
راجع من الشغل بدرى شويه على الساعه 3 كده تقريبا و الحر كان زي الفل و قارص بنفس الطريقه على الغيار و مشغل التكييف على الاخر
و بعدين قبل البيت بشويه وقفت علشان انزل اجيب حاجه و بصيت على الحرارة و انا نازل و كانت طبيعية و بعد مابطلت العربية و جاي انزل
حسيت ان فى زنة فتحت الكبوت لقيت المروحتين شغالين و بعدين رحت افتح الكونتاكت لقيت امبير الحاره على 110 برضه.
فضلت مستنى جنبها حوالى 20 دقيقه لحد مارجعت لطبيعتها على الامبير و المراوح وقفت و فتحت قربة المياه لقيتها مليانه و قولت ابص على الزيت لقيت مستواه طبيعى و انا كنت مشيك عليها قبلها بيوم على البارد و كان برضه على المؤشر الطبيعى.
مش عارف ايه المشكله - سالت اشرف منصور جارى صاحب محل اولاد منصور اللى فى الجيزة قاللى لازم تتحط على الجهاز فى التوكيل.
طب يا جماعه حد عنده فكره ايه المشكله - او ممكن تكون المشكله فى ايه بالظبط
انا خايف يكون الموضوع كبير و حاسس ان المشكله ممكن تكون فى التكييف.
و حد عنده فكره الكشف على العربية عن طريق الجهاز بكام فى التوكيل و هل لازم احجزله ولا ممكن اروح على طول ؟
ياريت لو اي حد عنده فكره عن المشكله ياريت يرد عليا.
شكرا ليكم جميعا
سلام عليكم