الموضوع: بإي ذنب قتل خالد (ضحية جديده للتعذيب بالاسكندرية ) و السبب رفض التفتيش !

المشاركة الأصلية كتبت بواسطة shnory

علي جنب كده
من ناس في سيدي جابر
انا سمعت ان خالد فعلا كان معاه مخدرات وبلعها
والمخربين ضربوه بعدها
بالنسبه للفيديو والحشيش
اظن ان اي حد فينا لو شاف كاوتشه عايمه علي وش الميه حيكون هزاره مع اصحابه انها فيها مخدرات ويقعدوا يقسموها في خيالهم ويحلموا بفلوسها
وان الناس تاخد حتت من ظبطيه المخدرات دي حاجه عاديه ومش حتاثر علي الكميه اللي حيتعمل بيها القضيه
خصوصا ان كلهم شغالين في مكان واحد وبينهم عشره تفسر الهزار بينهم
انا كنت متخيل انهم واقفين في الشارع بيقسموا وبيبيعوا للناس لما سمعت عن الفيديو قبل ما اشوفه

يا شنر يا حبيب قلبي يا ابو فازة يا خليفة سوبر مان ياللي بتقع من 5 متر وبتنزل سليم اللهم لا حسد بل قر
حتى لو بلع مخدرات تفتكر المخدرات هي اللى عملت فيه كل الاصابات دي ؟؟؟؟؟؟؟؟؟
مش معقولة طبعا
واصحابك اكيد محدش منهم شاف ولا يبقوا من ضمن الاندال اللى اتفرجو اوسكتوا
او سمعوا وبس وسمع من سمع من سمع انت عارف في النهاية اللى بيوصل عمره ما بيكون الحقيقة
احنا ادامنا روايتين وبافتراض صدق رواية الشرطة عن انه بلع مخدرات
اظن مش المخدرات اللى قالت للمخبرين يضربوه بلعنف ده
ولا المخدرات اللى كسرت وشه وقطعت وشه بالمنظر ده وعلى فكرة الطب الشرعي لا يمكن يشرح الاماكن الىل الجثة متخيطة فيها لان بافتراض انه بلع مخدرات هايبقي الشق في البلعوم والمرئ مش في الشفة والدقن
وبردو مش المخدرات اللى قالت للمخبرين يكملوا الضرب في الشارع والبيت او ياخدوا الجثة على القسم ويرجعوا يرموها ويطلبوا الاسعاف
اما عن شهود الشرطة فواحد منهم خارج من قضية مخدرات وعليه مراقبة والتاني بتاعوصلات دش وبردو خارج من شهر حبس وعليه مراقبة وبتاع السايبر شوية يخاف على اكل عيشه وعلى نفسه يحصل خالد ينفي رواية الشرطة واول ما مخبر يزوره يرجع ياكد رواية الشرطة
في كل الاحوال مهما كان ما عمله خالد لا يبرر كل هذا العنف في معاملته


وعلى فكرة الناس متاكدة ان رواية الشرطة غلط من اللى بيشوفوه كل يوم في اقسام الشرطة ومن ظباط الشرطة في كل مكان
يا راجل اكتر من مرة والله اشوف عربيات النجدة الاتاري دي بيمسكوا واحد ويربطوه من ايديه من الخلف ويرموه في شنطة العربية ويقفلوا الشنطة عليه ويمشوا

وعلى فكرة بردو لو انت طلبت عربية النجدة لانك علمت حادثة ابقي قابلني لو حد تف في وشك
والله من اسبوعين تلاتة عملت حادثة بعربيتي وكان سواق تاكسي غبي خبطني من الامام يعني وشي في وشه لان الباشا ماشي عكسي
المهم الحادثة كانت 5 و 5 دقايق واتصلت بالنجدة بعدها بحوالي 5 دقايق وفضلت لغاية 7 ونص بتصلب بالبهوات وكل شوية يقولي عربية النجدة في الطريق واخر مرة بيقولي العربية جاية من القسم الفلانى
هنا ممسكتش نفسي وانفجرت فيه انت بتهرج القسم ده يبعد اقل من 10 دقايق وبقالي ساعتين ونص اسمك ايه يا بني ادم علشان همسح بيك الارض وانفيك
التهديد المحترم
واتصلت بابن عمي ظابط مرور بعت لي امين شرطة من المرور بعدها ب 10 دقايق وبعدا ما المشكلة اتحلت وقلت عوضي على الله وسامحت في الاضرار اللى حصلت للعربية جه الباشا امين الشرطة من القسم اللى المفروض انه النجدة ولقيته جاي في تكتك وراس امه والف جزمة لازم نروح القسم نعمل محضر بالصلح وللاسف اخد الرخص من امين الشرطة بتاع المرور قلت ما هي ناقصة عطلة وبجملة يوم حلو من اوله
اتنيلنا رحنا القسم وعملنا الصلح وطول الطريق للقسم تهزيأ في الشرطة وانهم مش بيشوفوا شغلهم وووو كل ده وامين الشرطة جنب بيدافع عن تاخيره ولما رحنا القسم راح جاب الدفتر فوجئت ان النجدة مبلغة عن الحادثة الساعة 7 و 10 يعني بعد ما اتصلت بيهم بساعتين


شفت النجدة وسرعتها
يا باشا
دول لو ليهم مصلحة ولا مستشار ولا حتي معاون نيابة ابن امبارح اللى اتصل بيهم كانوا اتقلبوا كلهم في دقايق
انما علشان مواطن عادي محدش بيعبرك ايا كنت مين



اما موضوع ان ظابط المباحث كان بيهرج فلا يا شنر
ركز في الفيديو تاني وهتلاقي المخبر الىل على يمين الظابط بيضحك مع زميله اللى واقف جنبه وبعدها المخبر بيمد ايده ويقطع حتة حشيش ويديها لزميله اللى واقف جنبه ويضحكوا

اما انهم لما ياخدو حتت حشيش من الضبطية وانه عادي لا طبعا
بتقول مش هياثر على القضية طبعا مش هياثر
لان الباشا اخد اللى هو عايزه قبل ما يعمل المحضر ويثبت الوزن والا القضية تبقي فشنك فهو بدري بدري كدة بياخد اللى هو عايزه وبعدين يوزن الباقي
اما انه ياخد من الحشيش حتي لو مش هيبوظ القضية فدي لوحدها كارثة لان الباشا هيعمل بيها حاجة من تلاتة:
1- هيشربها وبالتالي يبقي مفيش فرق بينه وبين اي واحد بيتقبض عليه في تهمة تعاطي والمفروض هو كمان يتقبض عليه بتهمة التعاطي
2- هايبيعها وكدة يبقي ربنا كرمه واتنقل من تهمة تعاطي لتهمة اتجار
3- هيركنها في المكتب لغاية ما يمسك واحد زي حالاتك ويطلعها ويثبتها انه وجدها اثناء تفقد الحالة الامنية ووجد المواطن شنر واقف بيعدل الدش ومرتبك فقام بالتوجه اليه لسؤاله عن سبب عدله للدش فارتبك وحين طالبه باثبات شخصيته وقعت منه لفافة سلوفانية وبفضها تبين انها تحوي مادة تشبه جوهر الحشيش
وقليل ان ما حصلت خالد
عرفت يا باشا ان في كل الاحوال اللى حصل وبيحصل كل يوم ده كارثة