مشكله جديده مش عارف ايه السبب فيها

**dodo11113** · 15-08-2011 11:18 AM

امبارح روحت البنزينه اقيس الزيوت المهم قست زيت الفتيس والكرونه كله تمام والراجل قال بالمره اقيسلك زيت الماتور المصيببه بقى ان المقاس طلع من مكانه ناشف تماما فقلت للراجل يمكن عشان العربيه سخنه ونزلت بعد الافطار قيست الزيت لاقيت برده المقاس ناشف تماما كلمت الناس اللى اعرفهم حكتليهم على الموضوع واحد يقوللك لا كده العربيه بتاكل زيت وعايزه طقم شمبر وناس تانيه تقول ممكن الزيت اللى غيرته اخر مره مغشوش ومش عارف اعمل ايه علما بأن العربيه 2107 موديل 2007 وغيرت الزيت اخر مره عند واحد بتاع زيت xhp المهم رحت جيب جركن زيت التعاون ورحت مزود زيت خدت حوالى 2 كيلو فرجاء اللى عنده نصيحه يقولهالى

**dodo11113** · 16-08-2011 02:37 AM

اى رد يا جماعه اخوكم حيران

**Abdm** · 16-08-2011 12:12 PM

حضرتك بصيت على الطبة بتاعت الزيت من تحت اللى بينزل منها الزيت ممكن تكون بتسرب زيت وغالبا هو دة السبب وممكن حضرتك تغير المسمار بتاع الطبة بواحد جديد لو كان مفوت حاول تتأكد من الموضوع دة .
والله الموفق والمستعان

**mohamed2002** · 17-08-2011 02:25 AM

خدت 2 كيلو زيت؟! وموديل 2007 اكيد بتسرب زيت من الطبة

**ahmedemad15** · 18-08-2011 03:33 AM

ياعم دى حاجه فى طرمبه الزيت او الترس بتاعها دا موضوع سهل بس مهم عشان تحافظ على موتورك

**geco** · 22-08-2011 05:18 PM

بص يا باشا لما تشترى زيت موبيل يبقى تخلى اللى فى البنزينه هو اللى يغيرة مش تروح لواحد تانى
تانى حاجه تبص على الطبه او لو غيرت فلتر الزيت برضه تشوفه يمكن الراجل ماربطهوش كويس بس انت ماوضحتش حاجه لمبه الزيت نورت ولا لأ

**aymansaad** · 22-08-2011 05:29 PM

تابع مستوى الزيت وشوف فى اى ترشيح وشوف خرطوم الفايظ ايه اخبار الخارج

**blazer** · 23-08-2011 12:44 AM

حصلت معايا فى عربيتى السابقه 2107 موديل 1989
رحتى غيرت الزيت والفلتر وحطيت زيت جديد ومحصلش بعدها اى مشاكل
اتأكد ان الطبه مربوطه تمام وانها سليمه ومش بتسرب وان الفلتر تمام وربوط كويس
وحط زيت ال 4000 متحطش ال 10000

**dodo11113** · 23-08-2011 03:25 PM

لا لمبة الزيت ما نورتش واللى عرفته انها ما بتنورش الا لما يكون الزيت اقل من 2 لتر

**SYD** · 28-08-2011 07:27 AM

بص ياباشا النصب والسرقة مفيش اسهل منها

لما تيجي تشتري زيت بعد كدة أشتريه انت بنفسك وامسك الجركن بأيدك وشوف لو الغطا كان مفكوك قبل كدة ولا لا

لأنهم ولاد الذينة بيعبوا الجراكن الفاضية زيت ويعيدوا بيعها تاني والراجل يعمل نفسه فتح الجركن وقال كمان بيقطع الغطاء البلاستيك الداخلي بتاع الجركن

الحاجة التانية لو انت خايف من موضوع الشمبر والموتور خفيف

لما تفتح الكبوت هتلاقي العمة داخل فيها خرطوم فكه من العمة وشوف الخرطوم بيطلع بخر ؟؟؟
حاجة تانية
لو الموتور بيبخر هيملي العمة زيت

الطبيعي انه يبقي فيه بخر بس الأصول مش كتير يعني بص علي الخرطوم لو البخر كثيف يبقي الموتور رايح في داهية

ملحوظة أخيرة بس مالهاش علاقة بيك انت اساسا في تسريب لأن 2 كيلو معناها الموتور عايز عمرة وهتلاقي الدخنة بيضا من الشكمان

لادا ايجيبت الجميلة وغير ايجيبت في عربيات كتير موتورها بيخف بعد 50,000 وبتعمر
ودة لأن المصنع الجميل بتاع لادا لما بيخرط المواتير المفروض كل موتور يتخرط تتغير الفدية بتاعة مكنة الخرط لكن في لادا بيعملوا 4 مواتير بنفس الفدية وبالتالي اول موتور غير تاني موتور غير تالت موتور غير رابع موتور
يعني الأول ممكن يخف بعد 120,000 (دة الطبيعي بتاع اي موتور خلقه ربنا)
تاني موتور ممكن يخف بعد 90,000
تالت موتور ممكن يخف بعد 60,000
رابع موتور ممكن يخف بعد 30,000

يعني علي ما يبدأ يخف عند 30,000 وياكل نص كيلو زيت مع كل غيارة
علي مايوصل لل50,000 يكون بياكل 2 كيلو زيت مع الغيارة

انت طبعا مالكش فيه

انت تقريبا تسريب او زيت نوعه وحش او اساسا اتغشيت وانت بتغير الزيت واتحطلك اما زيت اساسا محروق او زيت ناقص

والله المستعان
،
،