الموضوع: بتشرب مياه من الحنفيه ؟؟!!

المشاركة الأصلية كتبت بواسطة ahmed a rahman

حضرتك لو عايز خلاصة الكلام ويكون كلام دكاتره

وتاخدها من واحد في دبلومة مكافحة العدوى ومسئول عن تأمين المنشآت الصحية وما بها من مرضى مناعتهم في الارض

تعالى نحط كذا قاعدة عشان نتكلم عليها
1. لا يوجد شيء اسمه تعقيم للمياه : كلمة تعقيم معناها القضاء على كافة اشكال الحياة الميكروبية بما فيها حويصلات البكتيريا وهذا مستحيل

2. ابنك الصغير لو شرب ميا معقمة (جدلا) في بقه الميا باظت تعقيمها (يعني فم ابنك هو اللي بوظ تعقيم الميا لان بق اي بني ادم فيه ملايين البكتيريات)

3. المياه المعدنية كارثة من كوارث الزمن
- مياه راكدة غير جارية : ومن ايام المقريزي عارفين ان الماء الجاري اذا وقف اصبح ماء آسن (معفن يعني)

- مياه تحتوي على املاح اعلى من المسموح (الحد الآمن)

لسه النهارده في معهد التدريب التابع لوزارة الصحة كنا بنجري تجربة على ملوحة الميا , وجبنا ميا معدنية بيعبيها الجيش (اللي بيتقال عليها انضف ميا) وعملنا لها اختبار ملوحة عن طريق وضع كام نقطة من محلول معين ونشوف لون الميا حيتغير بعد اد ايه

الدكتور ادامنا قعد يحط نقطة نقطة لحاد ما حاط الازازة كلها وقال لنا معلش يا دكاتره واضح ان الميا دي مفيش حاجه تغلبها

حضرتك متخيل يعني ايه
كمية من الاملاح المعدنة تعمل حمل على اي كلية بني آدم

4. في فرق بين كلمتين potable & palatable
الاولى معناها ان الميا طعمها حلو يعني طعم الميا اللي احنا متعودين عليه (اللي هو المفروض تكون بلا طعم)

الثانية معناها مياه صالحة للشرب بغض النظر عن طعمها

العلاقة اللي بينهم : لا توجد علاقة
يعني ممكن ميا تكون طعمها مقبول وحلو عشان نسبة الحمضيات مثلا تساوي نسبة القلويات انما هما الاثنين نسبتهم عاليا والميا دي كده تبقى مضرة وغير صالحة للشرب


5. الطرق التي تستخدم (لمعالجة المياه) مش تعقيمها
* الكلور : افضل طريقة للقضاء على الميكروبات في المياه يعني من الآخر الميا جايه اصلا من المواسير بالكلور بتاعها ......

* الفلتره : ودي طريقة جيدة مع مراعاة الفلاتر الجيدة
من احسن الفلاتر اللي في مصر الفلتر الكربوني باناسونيك سيبك من الفلاتر بتاعة الخيط والشمعة البيضا

* استخدام التأين والاوزون (الموضة اللي طالعين لنا فيها) العيب الكبير لها لا توجد مفعول ممتد بمعنى لو مليت ازازة ميا من الفلتر وحطيتها في التلاجة بعد نص ساعة الميا بقت ملوثة ثاني

* استخدام الاشعة فوق البنفسجية (ثاني موضة) نفس العيب الكبير
+ عيب ثاني ان الاشعة دي كتر استخدامها مسرطن
+ عيب ثالث البكتيريا ممكن يتعمل لها reactivation

6. خلاصة الكلام

اشتري فلتر باناسونيك كربوني ب 300 جنيه
تغيره كل 3 شهور
انا بغير فلاتر الميا كل اول 3 شهور : اول يناير, ابريل, يوليو, أكتوبر
ازارة الميا تبقى قاعدة في التلاجة مش اكتر من 24 ساعة بلاش حكاية المصريين ان الازازة اللي عليها الدور او الاسقع هي التي تشتغل النبطشية دي والثانية تستنى
ازازة الميا متقعدش برا التلاجة اكتر من ساعتين تلاتة وبعد كده تترمي

وعيش حياتك

سلام

باشا يعنى اجيب فلتر بانسونيك ده ب300ج واغيره كل 3شهورب300ج برضو؟!!
حاجه كمان
ازازه المياه متقعدش فى التلاجه اكتر من يوم والا ارمى المياه؟!!!!!
فهمنى بس لو سمحت النقطتين دول؟!!

No, I use a filter

ربنا يستر

أنا بستخدم فلتر سيراميك اسمه بريتش فلتر وتمنه كان حوالي 300 جنيه وزي الفل والشمعه بتاعته بتتغسل وتتحط تاني

يا جماعة هو حد لقى الفلتر البناسونيك ده فى حتة تانية غير التوحيد و النور , انا سألتهم قالولى ثمنه 415 المفهوش انديكيتور و 454 بالانديكيتور و الفلتر الداخلى 124 يترى حد لقى منه فى مكان تانى ارخص لان 300 ده بعيد خالص عن السعر اللقيته
ولا اروح اجيبه من التوحيد و النور !

سعر التوحيد والنور بيكون اغلي من محلات وسط البلد بالنسبه للاجهزة الكهربائية وبعض الادوات المنزليه

المشاركة الأصلية كتبت بواسطة amr5500

سعر التوحيد والنور بيكون اغلي من محلات وسط البلد بالنسبه للاجهزة الكهربائية وبعض الادوات المنزليه

طيب زى مين او فين فى و سط البلد