الموضوع: سامحك الله يامصـــــــر .... اعمل ايه دلوقتي

السلام عليكم و رحمة الله و بركاته

أنا طبعا بقول لصاحب الموضوع , أن ان شاء الله ربنا يكون كاتبلك خير فى مكان تانى و ان شاء الله ربنا يكرمك و يفتحلك أبواب العمل و التوفيق و النجاح فى شركات أفضل و أحسن من الشركة دى و عسى ان تكرهوا شيئا و هو خير لكم و بصراحة أنا فى حياتى اتعرضت لحاجات كتيييييير جدا زى دى و كنت ببقى عاوز الحاجة و هموت عليها, بس لما الحاجة التانية تحصل , أكتشف أن هى فعلا الأصلح لى و أن أنا اللى كان عندى قصر نظر و ده بيحصل معايا بنسبة 100 فى ال 100 , عشان كده بقيت لما بخطط لحاجة , بخطط لها و بس و أسيب الباقى على ربنا , أدام أنا عملت اللى على , يبقى خلاص , مش هزعل من أى نتيجة .

أنا كنت عاوز آخد رأيكم فى المنتدى الرائع ده فى قضية محيرانى شويتين:

أنا ان شاء الله مهاجر كندا و بالفعل أخدت الفيزا و خلاص, لما آجى بعد 3 سنين و أقدم على الجنسية الكندية , لو هما اشترطوا أن انا اتنازل عن الجنسيةالمصرية- و ده لحد دلوقتى مابيحصلش بس محدش عارف بكره فى ايه ؟؟؟- زى ما فى دول كتيييير بتطلب و من ضمنها ألمانيا مثلا, ساعتها أعمل ايه؟؟؟

لأن بصراحة الموضوع ده شاغلنى أوى و خايف أتسرع و آخد فيه قرار غلط تحت ضغط الأيام و الظروف المهببة اللى احنا عايشين فيها فى مصر و يطلع بعد كده أن القرار ده كان غير صائب, لأن فى الحالات دى , مش أنا اللى هدفع التمن , لكن دا كل الأجيال اللى جاية هى اللى هتدفع التمن .

أرجو أن أسمع أرائكم لأن أكيد أى حد هيقول رأيه , ممكن يكشفلى نقطة تكون غايبة عن زهنى .

و جزاكم الله كل خير.

MASERATI