تعمل إيه لو طلبوا منك تتنازل عن الجنسية المصرية علشان تتجنس ؟

**abou_ruqi** · 29-06-2010 11:21 AM

المشاركة الأصلية كتبت بواسطة ahmedsameir

انا مقدرش اكون غير مصرى لان الرسول عليه الصلاة و السلام وصى علينا و قال (ص) :
(( استوصوا بأهل مصر خيرا فإن لهم نسبا وصهرا))

حدثني زهير بن حرب وعبيد الله بن سعيد قالا حدثنا وهب بن جرير حدثنا أبي سمعت حرملة المصري يحدث عن عبد الرحمن بن شماسة عن أبي بصرة عن أبي ذر قال قال رسول الله صلى الله عليه وسلم إنكم ستفتحون مصر وهي أرض يسمى فيها القيراط فإذا فتحتموها فأحسنوا إلى أهلها فإن لهم ذمة ورحما أو قال ذمة وصهرا فإذا رأيت رجلين يختصمان فيها في موضع لبنة فاخرج منها قال فرأيت عبد الرحمن بن شرحبيل بن حسنة وأخاه ربيعة يختصمان في موضع لبنة فخرجت منه

بس أنا طالب توضيح صغير , إيه علاقة الحديث الشريف , بالتنازل عن الجنسية المصرية ؟؟ وإزاي في تعارض بين الأتنين ؟

المشاركة الأصلية كتبت بواسطة x512

شكرا علي المعلومات المفيده ....بس ايه هو مصدر حضرتك؟

مصدر أنهي معلومة بالظبط ؟؟ البرنامج و ألا ازدواج الجنسية و ألا فيزا المصريين ؟؟؟

لو على البرنامج فعملين له موقع خاص بكل التفاصيل أهه

Malaysia My Second Home

**factorialx** · 29-06-2010 02:43 PM

لا ماليزيا رطوبة أوي ... رطوبه بغباء

أنا أستحمل الحر لكن مستحملش الرطوبه أبداااااا

**x512** · 29-06-2010 06:52 PM

اهلا بيك يا باشا وليك ترحيب خاص بقى مادام طلعنا بلديات

انا فعلا عارف موضوع ميت الكرمه وكمان انا عائلتى اصلها من هناك يعنى ناس كتير قرايبى مسافرين ايطاليا
وكلامك كله صح انا مش معترض عليه بس برضه السفر بره ميبقاش حل الا لما يكون مضمون وفكره الشغل بره مفيش اختلاف انها احسن مليون مره من هنا ومفيش مانع انك تشتغل بره علطول لكن موضوعنا هنا الجنسيه وانت مقولتش رايك فى الموضوع دا

انا مع ازدواج الجنسيه..يعني زي امريكا كدا لما تاخد الجنسيه هيبقي ليك امتيازات اكتر في امريكا ..غير انك اما هيتيجي مصر هتتعامل معامله رئيس الجمهوريه و تقدر تدي اتخن لوا فيكي يا مصر بالجزمه لو اتعرضلك حد يعني...انما لو الجنسيه هتسقط عني...زي المانيا مثلا بتشترط اسقاط الجنسيه الاولي ...ساعتها بقي هفكر و احسب المكاسب و الخساير علي المدي القريب و البعيد و اقرر

**abou_ruqi** · 29-06-2010 08:04 PM

المشاركة الأصلية كتبت بواسطة x512

انا مع ازدواج الجنسيه..يعني زي امريكا كدا لما تاخد الجنسيه هيبقي ليك امتيازات اكتر في امريكا ..غير انك اما هيتيجي مصر هتتعامل معامله رئيس الجمهوريه و تقدر تدي اتخن لوا فيكي يا مصر بالجزمه لو اتعرضلك حد يعني...انما لو الجنسيه هتسقط عني...زي المانيا مثلا بتشترط اسقاط الجنسيه الاولي ...ساعتها بقي هفكر و احسب المكاسب و الخساير علي المدي القريب و البعيد و اقرر

وفي الأخر حتختار ألمانيا , علشان الكرامة والعدل لا يقدرا بثمن

**TaoTao** · 29-06-2010 09:53 PM

المشاركة الأصلية كتبت بواسطة abou_ruqi

وفي الأخر حتختار ألمانيا , علشان الكرامة والعدل لا يقدرا بثمن

الكرامة والعدل والأمن والمساواة
بمناسبة الأحداث اللطيفة اللي في البلد أخويا أول سنة يروح ألمانيا (كنا في عز الحملات ضد الإسلام والمسلمين وطبعاً الشائع عن الألمان إنهم عنصريين) سألته مرة ماحدش اتعرضلك أو مافيش مضايقات من الشرطة؟
قال: لأ أبداً.
أنا: يعني مافيش مضايقات أو تلميحات؟ ماشفتش أي موقف منهم خالص؟
أخي: لأ ، كنت مرة راجع بالليل متأخر في الكريسماس مع زميلي قاللي نكتة وضحكنا بصوت عالي .. طلع لنا واحد من الشرطة السرية ماعرفش طلع منين ...
أنا (في فزع): طبعاً قال لكم بطايقكم وقولوا حاحا !!
أخي: لأ .. ده مشي ورانا شوية في الطريق وبعد ما اتأكد إننا مش سكرانين اختفى
أنا: !!!!!!!!!!!!!!!!!! سكرانين؟!!!!!!! ماقالش ولا كلمة؟!!!!!!!!!!!!
أخي: أيوة أصل في أيام الكريسماس الناس بتبقى سكرانة طينة وممكن تأذي نفسها، فهو حب يتأكد إننا مش سكرانين أو محتاجين مساعدة. غير كدة ماتحسش إن فيه شرطة أساساً
أنا: (كنت هاعيط الصراحة)

وفي الآخر مش عاوز ياخد الجنسية :(
ماهو الواحد لو غاوي research كان زمانه بقى ألماني .. بس ماكانش في بالي إن الحال هايتدهور بينا لكدة :(

**abou_ruqi** · 29-06-2010 10:25 PM

في بلد تانية أعرفها , لو اتصلت بالبوليس علشان جيرانك عاملين ازعاج بيبعتوا أمين شرطة للجار المزعج , بياخد منه عشرين جنيه و يسيبه و يبقى في حمايته , ويفضل يعمل إزعاج طول الليل بالعشرين جنيه , لا وإيه ؟ وفي حماية البوليس

كل اللي أنت عملته هو إنك كرست الفساد و عطيت الجار شرعية للإزعاج

طبعا عرفتوا البلد دي ؟

**Ahmed Samy** · 29-06-2010 11:21 PM

المشاركة الأصلية كتبت بواسطة abou_ruqi

في بلد تانية أعرفها , لو اتصلت بالبوليس علشان جيرانك عاملين ازعاج بيبعتوا أمين شرطة للجار المزعج , بياخد منه عشرين جنيه و يسيبه و يبقى في حمايته , ويفضل يعمل إزعاج طول الليل بالعشرين جنيه , لا وإيه ؟ وفي حماية البوليس

كل اللي أنت عملته هو إنك كرست الفساد و عطيت الجار شرعية للإزعاج

طبعا عرفتوا البلد دي ؟

لأ دا أنا أعرف بلد عملت فيها حادثة بسبب "حفرة" في طريق عمومي و دفعت 100 جنيه علشان الأمين يكتب ان السبب حفرة

في بلد تانية بقى ....واحد ماشي على جسر في بلد ريفي ...اتكعبل في طوبة مش مثبته كويس و رجله اتجرحت ...

تم تغريم عمدة البلدة و العمدة السابق بملغ محترم

**abou_ruqi** · 29-06-2010 11:27 PM

المهم إن مساعد الشرطة في البلد دي اسمه "الأمين" وهي كنية رسول الله !!!! بلد التناقضات

**Ghamrawy** · 30-06-2010 12:29 AM

المشاركة الأصلية كتبت بواسطة Ahmed Samy

لأ دا أنا أعرف بلد عملت فيها حادثة بسبب "حفرة" في طريق عمومي و دفعت 100 جنيه علشان الأمين يكتب ان السبب حفرة

اه ه ه ه اعتقد البلد دى بلد عايشة فى ظلامات الجهل و التخلف و الانحطاط الضميرى و اعتقد ان اسمها رصم

معكوسة

زى الكلمات المتقاطعة

المشاركة الأصلية كتبت بواسطة Ahmed Samy

في بلد تانية بقى ....واحد ماشي على جسر في بلد ريفي ...اتكعبل في طوبة مش مثبته كويس و رجله اتجرحت ...

تم تغريم عمدة البلدة و العمدة السابق بملغ محترم

اكيد البلد دى سمعت عن حديث سيدنا عمر بن الخطاب "والله لو تعثرت بغلة في العراق لسألني الله عنها يوم القيامة" وكيف لم أمهد لها الطريق"

و طبعا البلد دى مش مصر أكيد

**aliabutaleb** · 30-06-2010 08:34 AM

المشاركة الأصلية كتبت بواسطة ahmed samy

في بلد تانية بقى ....واحد ماشي على جسر في بلد ريفي ...اتكعبل في طوبة مش مثبته كويس و رجله اتجرحت ...

تم تغريم عمدة البلدة و العمدة السابق بملغ محترم

عادي خالص
فيه بلد تانية واحدة ماشية وجنبها ابنها على كوبري على النيل بتبص ملقيتش الولد
أتاري فيه حفرة في أرضية الكوبري الولد وقع منها في النيل ومات
ولما جم يحققوا في الموضوع (أصلهم حقانيين أوي وكله واحد لازم ياخد حقه ويتحاسب كمان) بدأ خلاف بين هيئة الطرق والكباري في محافظتين بحجة إن كل هيئة بتقول الكوبري تبع التانية وكان المفروض هي اللي تسد الحفرة