الموضوع: مولد كهرباء أحتياطي للمنزل

النور لما بيقطع العصر الجو العام بيتعدل شوية بسيطة , لكن طبعا احنا بنبقي عاملين زى المكرونة لما بتستوى ..

يعنى لما كل التكييفات تتطفى الجو بيتعدل شوية خصوصا ان كل شقة بقي فيها اكثر من تكييف و بتوصل ل 4 تكييفات .

ساعتها بحس و الله باللى معندوش تكييف , يعنى هيجرى ايه لو النور قطع من الفجر ل 6 صباحا ! وقت طويل اهه و مناسب !

المشاركة الأصلية كتبت بواسطة ehab_mansour

السلام عليكم ورحمة الله وبركاته

فيه انواع كتييييير للمولدات منها الصيني ومنها الياباني وكذلك تختلف حسب قدراتها وتبدأ من نصف كيلو الي 100 كيلو او اكتر ودي للاستخدامات الصناعية
المنتشر واللي سعره مناسب لينا هو الصيني وده موجود منه في مصر ويعمل بالبنزين وبيدور مارش يعني سهل جدا في تشغيله وكنت اشتريت واحد من فترة لمسجد عندنا وكان قدرته 5 كيلو صيني وكان سعره في حدود 2000 جنيها وده قومنا عليه المسجد كله من مراوح واضاءة ومكبرات صوت ولكن للأسف موتور رفع المياة قدرته 2 حصان ما قدرش يقومه وكان عشان يقومه لازم تفصل كل الباقي والله المستعان

وفيه نقطة أخري حبيت أوضحها ان واحنا بنشتري المولد ده كان فيه أنواع كتيييييييير بنفس القدرة وبيتراح السعر من 1000 جنيه الي 9000 ألاف جنيها تقريبا ومنها الصيني ومنها الروسي ومنها الياباني وكلهم 5 كيلو لكن طبعا فيه فروق كتيييييييير بينهم من حيث الجودة وكذلك القدرة اللي بيخرجها المولد يعني بيكون مكتوب عليه انه 5 كيلو وهو مش بيخرج حتي 3 كيلو
لذلك اللي بيفكر يشتري مولد يكون عارف هو عايزه ليه لأن لو استخدامي للمولد فقط مثلا للانارة والمراوح والتليفزيون والريسيفر والراوتر والكمبيوتر وموتور مياة منزلي عادي ثلث حصان يبقي اللي قلت عليه ده(ب 2000 جنيها ) هيكون مناسب له وهيقوم كل ده
لكن لو عايز تشغل تكييف وبالاضافة لكل السابق او جزء منه يبقي لازم تشتري مولد قوي 7 كيلو مثلا روسي او ياباني وده مش هيقل عن 5 الي 10 ألاف جنيها
وعلي فكرة استهلاك المولد للبنزين مش عالي يعني بسيط جدا مش هتحس بيه وكل ما زادت قدرته زاد استهلاكه واي سؤال تحت أمركم علي قدر استطاعتي ومعرفتي البسيطة

بص يا أستاذ ايهاب هو المولد ال 5 كيلو ده يعني الخرج بتاعه تقريبا 20 أمبير. الموتور ال2 حصان ده بيحتاج حوالي 7 أمبير لوحده عشان يشتغل, و طبعا المراوح عشان مواتير برضه بتستهلك أمبير عالي ده غير ان لو اللمبات صفرا مش بيضا تبقى برضه بتستهلك كتير, و ده السبب ان المولد مش قادر يشغل كل حاجة مرة واحدة عشان الأحمال أعي من خرج الأمبير بتاع المولد. لكن لو حاولت تشغل نفس المولد ده لمنزل عادي حتلاقيه يستحمل مثلا تشغل تكييف قدرته متوسطة (1.5 الى 2 حصان) + التلاجة + اضاءة تلات أو أربع غرف + الأجهزة الأاكترونية البسيطة (تليفزيون, ريسيفر, كمبيوتر....الخ)

ببساطة اللي عايز يحسب هو محتاج مولد كام كيلو يقدر يحسبها كدة:

أستهلاك الاضاءة بتاعت البيت لو لمض صفرا يبقى الوات بتاعها = الفولت أمبير اللي محتاجاه أوتوماتيك, بمعني لو بتستخدم لمبة 100 وات لكل غرفة و عندك 5 غرف يبقى بتستهلك 500 وات = 500 فولت أمبير = نص كيلو فولت أمبير لاضاءة البيت كله. طبعا لو اللمبات بيضا أو موفرة حتستهلك أقل من كدة بكتير.

بالنسبة للتكييف , 1 حصان = 750 وات = 750 فولت أمبير = 0.75 كيلو فولت أمبير. يعني عشان أشغل تكييف 2 حصان محتاج كيلو و نص فولت أمبير و هكذا.

بالنسبة للأجهزة الالكترونية استهلاكها مش كبير, يعني مثلا التليفزيزن ال LCD استهلاكه في حدود 130 - 150 فولت أمبير, الكمبيوتر في حدود 60 - 70 فولت أمبير, حتى التلاجات و المراوح و الحاجات الي بمواتير مش حيكون استهلاكها عالي قوي. عموما اي جهاز في الدنيا لازم حتلاقي علية ستيكر مكتوب عليه الelectric requirements بتاعته سواء مكتوب الpower consumption و ده بالوات علي طول, يا اما مكتوب الفولت و الأمبير و في الحالة دي نضرب الرقمين في بعض عشان نعرف محتاج كام فولت أمبير.

و عموما عشان متدوش نفسك بالحسابات دي كلها, في بيوت كتير جدا العداد بتاعها 10 أمبير يعني 2.5 كيلو فولت أمبير بالكتير, و بيبقوا مشغلين كل الأجهزة عادي و منورين البيت كله مفيش زيادة تحميل و لا حاجة, فباختصار ممكن نحسب ان البيت كله بالاضاءة بالاجهزة مش حيحتاج اكتر من مولد 2.5 كيلو و لو حتشغل تكيييف يبقى تزود 0.75 كيلو لكل حصان و في الأخر ممكن تزود 0.5 كيلو تحسبا لأي زيادة في الأحمال.

يا ريت بقى تقول لنا المولد حضرتك كنت جايبه منين؟؟؟؟؟؟؟؟؟؟؟؟؟؟؟؟

المشاركة الأصلية كتبت بواسطة Tifana2010

شوف يا درش المشكلة مش قطع كهرباء شوية وخلاص علشان نقطعها من
الفجر ل 6 صباحا فى وقت ما فيهوش احمال اصلا .
المشكلة ساعة الذروة لما كل الناس تستهلك كمية كبيرة من الطاقة الكهربية فى نفس الوقت (بالتكيفات و التلفزيونات و الغسالات وغيره من الاجهزة الكهربية) و حتلاقيها تقريبا الساعة 9 مساءا أو قبل كده بشوية
و مع عدم وجود محطات توليد ذات قدرات كافية ،لما تزيد الاحمال زيادة عالية ترتفع درجة حرارة المعدات بالمحطة بصورة ممكن تؤدى الى انفجارها و فى هذه الحالة يبقى خسرنا محطة التوليد تماما و نفقد الكهرباء حتى يتم الاصلاح او تركيب معدات جديدة
عشان كده الفصل بيكون فى اوقات الذروة اللى الناس كلها محتاجة الكهرباء فيه للاسف

علاج تخفيف الاحمال الوحيد هو انشاء محطات توليد أو زيادة قدرات المحطات الموجودة بالفعل
و الاعتماد على الطاقة النظيفة مثل طاقة الشمس والرياح
و ترشيد الاستهلاك طبعا
و ربنا يسترها معانا فى رمضان الجاى إن شاء الله بالظروف الحالية

أيوة يا أستاذي ما احنا عارفين انه تخفيف أحمال, و رغم ان دي غلطة الحكومة أساسا عشان بقالنا سنين الأستهلاك بيزيد تدريجيا و هما و لا فكروا يعملوا أي مشاريع جديدة للطاقة أو زيادة قدرة المحطات الموجودة, انما مش دي المشكلة دلوقتي. المشكلة ان في اي دولة متأخرة زينا لما تحتاج تقطع الكهربا عشان تخفف الأحمال الطبيعي انك بتعمل ده بشكل منظم بحيث الكهربا تقطع عن كل منطقة لمدة معينة بالتتابع في كل مناطق المدينة بحيث ان مدة الانقطاع تكون معقولة. انما أحنا عندنا طبعا الكلام ده مينفعش, مش معقول نقطع الكهربا عن المنطقة اللي ساكن فيها فلان بيه أو الحي اللي فيه الفيلا بتاعت علان باشا, و طبعا الموظفين بتوع الكهربا مش معقول حيقطعوا الكهربا عن بيوتهم و بيوت قرايبهم.......الخ, فالنتيجة بقى انه الكهربا تقطع كل يوم بالساعات على مناطق معينة و يتفلقوا بقى الناس اللي حيموتوا من الحر و لا اللي مش عارفين يزاكروا و مستقبلهم حيضيع. و كل صيف و انت طيب.

المشاركة الأصلية كتبت بواسطة midomahany

فى مولدات هوندا صغيرة من 1 ك.ف.أ وبسموه ( مولد شنطة)علشان حجمه صغير ، حتى 10 ك.ف.أ أو مولدات صينى باسعار من 500 جنية لغاية 15000 جنية زى ما انت عاوز
تحسب ازاى المولد اللى انت محتاجه
بص يا سيدى
لو عاوز تشغل لمبات كهرباء بس تعد عدد اللمبات اللى عندك وقوة كل لمبة بالـ وات يعنى كل لمبة 60 وات ، أو 80 وات .....إلخ
عدد اللمبات * قوة اللمبة الواحدة = ؟؟؟ وات مثلا عند 20 لمبة * 60 = 1200 وات تقسم على 1000 = 1.2 ك.وات يبقى حضرتك عاوز مولد أو generator قدرة 1.2 ك.وات تجيب الاعلى 2 ك.وات = 2 ك..ف.أ فى الكهرباء لما تكون 220 فولت اللى هية الكهرباء العادية اللى فى البيوت
المولدات دى فى منها بالحبل الشداد وفى منها بالمارش وممكن كمان تعمل لوحة اتوماتيك مع المولد اسمها A.T.S دى بتخلى المولد يشتغل اتوماتيك لما الكهرباء العمومية تقطع فى البيت خلال 15 ثانية من غير تدخل العامل البشرى بس دى تتعمل مع المولدات اللى بالمارش فقط
وأى استفسار أنا فى الخدمة
أخوكم
م.عصام مهنى

شكرا للتوضيح و يا ريت حضرتك تقول لنا الأماكن اللي نقدر نشتري منها المولدات دي.